سەيسەنبى, 22 ماۋسىم 2021
قوعام 3915 0 پىكىر 10 قاڭتار, 2017 ساعات 13:38

زاڭنىڭ قاشان قابىلدانعانىن قاسىموۆتىڭ ءوزى بىلمەيدى

تەرروريستەردى تىركەۋ ارقىلى ىزدەستىرىپ جۇرگەن قازاقستاننىڭ ىشكى ىستەر ءمينيسترى قالمۇحامبەت قاسىموۆتى ۇكىمەت باسشىسى ساعىنتاەۆ سوگىپ تاستادى.

ۇكىمەت وتىرىسىندا پرەمەر-مينيستر باقىتجان ساعىنتاەۆ ازاماتتاردى تۇرعىلىقتى جەرى بويىنشا تىركەۋ جۇمىستارىنىڭ ەل ءىشىن دۇرلىكتىرىپ تاستاعانىن ايتىپ، جاۋاپتى مينيسترلىك باسشىلارىنىڭ ءبىرسىپىراسىن «سىلكىلەپ» الدى.

ۋاقىتشا تىركەۋگە قاتىستى ءتۇسىندىرۋ جۇمىستارىن دۇرىس ءام دەر كەزىندە جۇرگىزۋ كەرەكتىگىن جەتكىزگەن باقىتجان ءابدىرۇلى وسى ماسەلەگە تىكەلەي جاۋاپتى ءىىم ءمينيسترى قالمۇحامبەت قاسىموۆتان زاڭنىڭ قاي ۋاقىتتا قابىلدانعانىن سۇرادى.

سويتسەك، ەل-جۇرتتى الەككە سالعان زاڭنىڭ قاشان قابىلدانعانىن قاسىموۆ مىرزا بىلمەيدى ەكەن. بۇل تۋرالى «ult.kz» پورتالى حابرالادى.

«بىزدە زاڭعا قاشان قول قويىلدى؟»، – دەپ سۇرادى باقىتجان ءابدىرۇلى.

«جەلتوقساننىڭ 28-ءى»، - دەدى مينيستر قالمۇxامبەت قاسىموۆ.

«جوق، جەلتوقساننىڭ 22-ءسى كۇنى ءبىز ءتيىستى زاڭعا قول قويدىق. ال العاشقى ءتۇسىندىرۋ ماتەريالدارىن ءبىز قاي كەزدە بەردىك؟ حقكو ءبىرىنشى دۇربەلەڭنەن كەيىن بەردىك. سىزدەر اتالعان نورمانىڭ xالىققا تىكەلەي قاتىسى بار ەكەنىن بىلدىڭىزدەر عوي. ءتۇسىندىرۋ جۇمىستارىن جەلتوقساننىڭ 22-سىندە باستاي المادىڭىزدار ما؟ اشىعىن ايتۋ كەرەك، xالىق نە ىستەرىن بىلمەدى. سودان قىزمەت كورسەتۋ ورتالىقتارىنا لاپ بەردى»، - دەدى ب.ساعىنتاەۆ.

ايتپاقشى، قازاقستان ۇكىمەتى ەلەكتروندىق جۇيەدە قىزمەت كورسەتۋگە كوشكەلى ءبىراز بولعانى بەلگىلى. ال تىركەۋ ماسەلەسىندە ونلاين رەجيمدە تىركەۋ قىزمەتى ىسكە قوسىلماعان ەكەن. بۇعان توقتالعان ۇكىمەت باسشىسى ونلاين رەجيمدە ۋاقىتشا تىركەلۋ قىزمەتىن تەزدەتىپ ىسكە قوسۋدى تاپسىردى.

«حالىقتى ول قىزمەتتى كىمنىڭ ازىرلەيتىنى قىزىقتىرمايدى. ۇتو ما، ءىىم مە، وندا جۇمىسى جوق. حالىق بىلاي دەيدى، سىزدەر زاڭدى قابىلدادىڭىزدار، ءبىز سول زاڭعا سايكەس تىركەۋگە تۇرۋعا كەلدىك. بولدى. ۋاقىتشا تىركەۋدى ەنگىزگەن ءجون. دەگەنمەن، وسى جۇمىستى ۇيىمداستىرۋ xالىقتىڭ كوڭىلىنەن شىقپادى. ءبىز قايتادان شالىس باستىق»، - دەدى ۇكىمەت باسشىسى.

ايتا كەتەلىك، قاسىموۆتىڭ باق-تاعى مالىمدەمەسى دە ەكىۇشتى ويعا جەتەلەيدى. «ەگەر پوليتسيا قىزمەتكەرىنە ەسىك اشپاساڭىزدار، تەكسەرۋدىڭ باسقا امالىن تابامىز!» - دەگەن قاسىموۆ مىرزا حالىققا ءتۇسىندىرۋ جۇمىستارىن دۇرىس جۇرگىزبەگەنى ءۇشىن ۇكىمەت باسشىسى مەن حالىقتان كەشىرىم سۇرامادى. مەيلى.

ايتا كەتەيىك، اتالعان زاڭ قابىلدانعان كۇننەن باستاپ «زاڭنىڭ نە ءۇشىن قابىلدانعانىن تۇسىندىرگەن» ۇكىمەت، پارلامەنت، پرەزيدەنت اكىمشىلىگى تاراپىنان ەشبىر ادام ازىرگە تابىلماي تۇر.

نۇرزات توعجان

Abai.kz

0 پىكىر