سەيسەنبى, 2 ماۋسىم 2020
COVID-19 قازاقستاندا. جۇقتىرعاندار — 11571. جازىلعاندار — 5587. قايتىس بولعاندار — 41
مايەكتى 3751 0 پىكىر 10 قاڭتار, 2017 ساعات 11:01

الدا قازاقستاندى نە كۇتىپ تۇر ەكەن؟..

قازاقستانداعى ۇلتتىق قاۋىپسىزدىك كوميتەتىنىڭ بۇرىنعى توراعاسى نارتاي دۇتباەۆتىڭ ۇستالىپ، قاماۋعا الىنۋى، تاياۋدا ورنىنان تايدىرىلعان مينيستر ق. بىشىمباەۆتىڭ ۇستىنەن تەرگەۋدىڭ ءجۇرىپ جاتۋى، كەزىندە «ەكىنشى بەريا» اتالعان اسلان ءمۋسيننىڭ ەلشىلىكتەن بىردەن زەينەتكە كەتىرىلۋى،  زەينەتكەرلەر قورىنىڭ باسشىسى ر. ەرداناەۆتىڭ اقشا جەپ قاماۋعا الىنۋى،  ت.ب. شەنەۋنىكتەردىڭ ءجيى پارامەن ۇستالىپ جاتۋى، «تىركەۋ» تۋرالى زاڭنىڭ اياعىنىڭ كۇن وتكەن سايىن ۇلكەن ايعايعا ۇلاسا باستاۋى، بىرەۋلەردىڭ اشىقتان-اشىق استانا جەزوكشەلەرىن باي قىتايلارعا ساۋدالاماق بولۋ ارەكەتى، ورتا ءبىلىم بەرەتىن مەكتەپتەرگە زورلاپ ەنگىزىلگەن ء«ۇش تىلدىلىك»، ت.ب. قوعامداعى تۇيتكىلدەر قوردالانىپ كەلىپ، ەلدى جايلاعان ەكونوميكالىق داعدارىستىڭ سوڭى ۇلكەن ساياسي داعدارىسقا اينالىپ بارا جاتۋى نەلىكتەن

وسى ارادا باسىن اشىپ الاتىن ءبىر نارسە، حالىقتى وزدەرىنە اشىق قارسى قويىپ وتىرعانداردىڭ ءوزىنىڭ تەك بيلىك تاراپىنان بولىپ وتىرۋى - تاعى دا امالسىز ويعا قالدىرادى.

سوندا بۇل ارانداتۋشى بيلىك وكىلدەرى اشىقتان اشىق قازىرگى پرەزيدەنت ن. نازارباەۆقا قارسى شىعىپ وتىرعانداي اسەر ەتەدى.

سونىمەن بيلىكتىڭ جوعارى ەشەلونىندا تاق تالاسى مەن باق تالاسى باستالىپ كەتكەن جوق پا دەگەن  كۇدىك قىلاڭ بەرەدى.

ونىڭ ۇستىنە ءدال وسى تۇستا  مۇحتار ءابىلازوۆتىڭ فرانتسيا اباقتىسىنان بوساپ شىعىپ، بىزدەگى ساياسي جۇيەگە اشىقتان اشىق قارسى شىعىپ، كۇن سايىن ءارتۇرلى دەڭگەيدەگى ساياسي اقپاراتتار  تاراتۋى، ونسىز دا ىشتەرىنەن ازەر تىنىپ جۇرگەن حالىقتار اراسىنا، اسىرەسە، ءوز وتانىندا وگەي بالانىڭ كۇيىن كەشىپ وتىرعان وسى مەملەكەتتى قۇرۋشى قازاق ۇلتىنىڭ  اراسىنا ۇلكەن ءبىر دۇربەلەڭ اكەلمەي مە دەگەن دە كۇدىك جوق ەمەس.

الەمدىك ساياسي اقۋالدىڭ كۇردەلەنۋى، ءبىزدىڭ بيلىككە ۇنەمى «اكەلىك قامقورلىق» جاساپ كەلگەن جانە شەتەل تاراپىنان ءارتۇرلى ەكونوميكالىق سانكتسيالارعا ۇشىراعان  رەسەيدىڭ ءوزىنىڭ ەكونوميكالىق جاعدايىنىڭ كۇن سايىن ناشارلاۋى، اقش-قا سان قۇبىلعان ترامپتىڭ پرەزيدەنت بولىپ كەلۋى، ۋشىعىپ تۇرعان سيريا مەن ۋكراينا جاعدايى دا ءتۇپتىڭ ءتۇبى قازاقستانداعى ساياسي اقۋالعا ءوز اسەرىن تيگىزبەي قويمايتىن سياقتى ما، قالاي؟

ۇلت بايلىعىن ۇرلاۋمەن، توناۋمەن، ولارىن ۇنەمى شەتەل اسىرۋمەن كەلگەن، شەتەلدەردەگى قاپتاعان وفشورلارعا جۇزدەگەن ميللياردتاعان دوللارلار جاسىرعان ناعىز قازاقستاندىق ەليتانىڭ دا تاعدىرى قىل ۇستىندە تۇرعانداي اسەر ەتەدى...

ەندى ولار قيت ەتسە، ۇرلاعاندارىن شەتەل اسىرىپ، وزدەرى ارتىنان قاشىپ بارىپ، جاسىرىنا قوياتىن قۋلىقتارىنىڭ دا بولاشاعى سەنىمسىز ءارى بۇلدىر بولايىن دەگەندەي مە، قالاي؟..

جۇماش كوكبورى

Abai.kz

0 پىكىر