جەكسەنبى, 9 مامىر 2021
مايەكتى 2714 0 پىكىر 10 قاڭتار, 2017 ساعات 10:15

اشتىق جاريالاعانداردىڭ جاعدايى ناشار

اقتاۋداعى Oil Construction Company كاسىپورنى مۇنايشىلارىنىڭ قازاقستان تاۋەلسىز كاسىپوداقتار كونفەدەراتسياسىن (قتكك) تىركەۋدى تالاپ ەتىپ جاريالاعان اشتىق اكتسياسى بەسىنشى كۇنگە ۇلاستى. مۇنايشىلاردىڭ كەيبىرى دەنساۋلىعىنىڭ سىر بەرە باستاعانىن، بىراق تالاپتارى ورىندالمايىنشا ءنار تاتپايتىندارىن، دارىگەرلىك كومەكتى دە قابىلدامايتىندارىن ايتادى.

34 جاستاعى جۇمىسشى رۋسلان ءابۋوۆتىڭ دەنساۋلىعى كۇرت ناشارلاپ كەتىپ، مۇنايشىلار جەدەل جاردەم كولىگىن شاقىردى. جۇمىسشىلار ولجاس بولەۋباەۆ، تىنىشتىق سۇتەنوۆ، نۇرپەيىس يشمانوۆ، عابيت جۇماعۇلوۆ تا دەنساۋلىقتارىنىڭ ناشارلاي باستاعانىن ايتتى.

كەزەكشى دارىگەر ساۋلە ساۋمەنوۆا اشىعۋدىڭ سالدارىنان جۇمىسشىلار اعزاسىندا سۋسىزدانۋ پروتسەسى ءجۇرىپ جاتقانىن ايتتى. الايدا مۇنايشىلار اۋرۋحاناعا بارۋدان باس تارتىپ وتىر.

وڭتۇستىك قازاقستان وبلىستىق اۋدانارالىق ەكونوميكالىق سوتى قاڭتاردىڭ 4-ءى كۇنى كەڭسەسى شىمكەنت قالاسىندا ورنالاسقان قازاقستان تاۋەلسىز كاسىپوداقتار كونفەدەراتسياسىن جابۋ تۋرالى شەشىمىن جاريالاعان.

قتكك قۇرامىندا بولعان Oil Construction Company جۇمىسشىلارى رەسمي كاسىپوداققا كىرگىسى كەلمەيتىندەرىن ايتىپ، تاۋەلسىز كاسىپوداقتى جابۋعا قارسىلىق ءبىلدىرىپ وتىر.

قتكك باسشىسى لاريسا حاركوۆا كاسىپوداق ۇيىمى بيلىك بەلگىلەگەن جارتى جىل ىشىندە قايتا تىركەۋدەن ءوتىپ ۇلگەرمەي قالعانى سەبەپتى سوت شەشىمىمەن جابىلعانىن ايتادى. قتكك 2003 جىلى "ماڭعىستاۋمۇنايگاز" كومپانياسىنا قاراستى ءۇش كاسىپورىننىڭ نەگىزىندە قۇرىلعان. كاسىپوداق ۇيىمنىڭ دەرەگىنشە، ونىڭ قۇرامىندا 2100 مۇشەسى بولعان.

اباي-اقپارات

0 پىكىر