تۇركيا سىرتقى ىستەر ءمينيسترى مەۆليۋت چاۆۋشوگلۋ سيريا پروبلەماسىن رەتتەۋگە ارنالعان كەلىسسوزدەر 23 قاڭتاردا استانادا وتەتىندىگىن ءمالىم ەتتى. بۇل جايىندا قازاقپارات بلۋمبەرگ اگەنتتىگىنە سىلتەمە جاسا وتىرىپ حابارلايدى.

بۇعان دەيىن تۇرىك ءسىم باسشىسى رەسەي ساراپشىلارى سيريا بويىنشا كەلىسسوزدەرگە دايىندىق ماسەلەلەرىن تالقىلاۋ ءۇشىن 9-10 قاڭتاردا تۇركياعا كەلەتىندىگىن ءمالىم ەتكەن بولاتىن.  سونداي-اق بۇعان دەيىن، رف پرەزيدەنتى پۋتين مەن تۇرىك كوشباسشىسى تايىپ ەردوعان ەكەۋى سيريادا قاقتىعىسۋشى تاراپتارعا استانادا بەيبىت كەلىسسوز ۇدەرىسىن جالعاستىرۋدى ۇسىنۋ جايلى ۋاعدالاسقانى حابارلانعان بولاتىن. ءپۋتيننىڭ ايتۋىنشا، بۇل جەنەۆا كەلىسسوزدەرىن تولىقتىرادى. 

قازاقستان پرەزيدەنتى نۇرسۇلتان نازارباەۆ پۋتينمەن جانە ەردوعانمەن تەلەفون ارقىلى سويلەسۋ بارىسىندا بۇل باستامانى قولداپ، قازاقستان ەلورداسىندا مۇنداي كەلىسسوزدەر جۇرگىزۋ ءۇشىن قاجەتتى جاعداي جاساۋعا دايىن ەكەنىن مالىمدەگەن ەدى.

كەيىنگى ءبىر اقپارات سيرياداعى كەيبىر ساياسي كۇشتەر استاناعا كەلۋدەن باس تارتىپ جاتىر دەگەندى ايتادى.

اباي-اقپارات