قازاقستان تاۋەلسىزدىگىنىڭ 25 جىلدىعىنا وراي!

بۇگىن كوكىرەك كوزى وياۋ كوپشىلىك قاۋىمنىڭ كوزايىمىنا اينالعان «ادەبيەت پورتالى» 3 جاسقا تولىپ وتىر! ونىڭ تۇساۋىن وسىدان تۋرا ءۇش جىل بۇرىن قازىرگى قازاق ادەبيەتىنىڭ ءبىر توپ اۋزى دۋالى اقساقالدارى مەن قارىمدى قالامگەرلەرى كەسىپ، باتاسىن بەرگەن بولاتىن.

وسى كۇنگە دەيىن «ادەبيەت پورتالىنا» ءتورت تىلدە 4 مىڭعا جۋىق ەلەكتروندى كىتاپ جۇكتەلىپ، 4 مىڭنان استام اۆتوردىڭ جەكە پاراقشاسى اشىلعان. جانە دە 300-گە تارتا كىتاپتاردىڭ قىسقاشا مازمۇنى، 800-دەن استام ادەبيەت تاقىرىبىنداعى اۋديو-ۆيدەو جازبالار ورنالاستىرىلعان.  قازىرگى كۇنى مىڭ جارىمنان استام بلوگەر تىركەلىپ، وزدەرىنىڭ جەكە بلوگىن جۇرگىزىپ وتىر. سونىمەن قاتار، پورتال ادەبيەت الەمىندە كۇندەلىكتى بولىپ جاتقان جاڭالىقتاردى ۇزدىكسىز جاريالاپ، اقىن-جازۋشىلارمەن تۇراقتى سۇحبات جۇرگىزىپ، ولاردىڭ سياسى كەپپەگەن شىعارمالارىن دەر كەزىندە وقىرمانعا ۇسىنىپ كەلە جاتىر.

كەشە عانا قازاقستان رەسپۋبليكاسىنىڭ تاۋەلسىزدىگىنە 25 جىل تولعانىن ەسكەرە كەلە، «ادەبيەت پورتالىنىڭ»  25 ەرەكشەلىگىن نازارلارىڭىزعا ۇسىنامىز:

 1. «ادەبيەت پورتالى» - قازاق ەلىنىڭ ادەبي مۇراسىنا قىزىعۋشىلىق تانىتقان كەز-كەلگەن كوزى اشىق، كوكىرەگى وياۋ وقىرماننىڭ باسىن بىرىكتىرەتىن، سول ادەبي مۇرانى زاڭدى تۇردە ءبىر جەرگە جيناقتايتىن ادەبي پلاتفورما;

2. 100 پايىز مەملەكەت قولداۋىمەن اشىلعان جانە ۇكىمەتتىڭ قامقورلىعىمەن قىزمەت اتقارىپ وتىرعان جوبا;

3. پورتال 4 تىلدە، ياعني قازاقشا، ورىسشا، تۇرىكشە جانە اعىلشىنشا قىزمەت ەتەدى;

4. «ادەبيەت پورتالىنىڭ» ەلەكتروندى بازاسىندا 4 مىڭعا جۋىق كىتاپ قورى جيناقتالعان;

 5. پورتالدا 4 مىڭنان استام اۆتوردىڭ جەكە پاراقشالارى بار، ولارعا سول اۆتوردىڭ كىتاپتارى، ماقالالارى مەن سۇحباتتارى، سونداي-اق، سول قالامگەر تۋرالى جازىلعان بارلىق ماتەريالدار توپتاستىرىلعان;

 6. «ادەبيەت پورتالىندا» «ادەبي اۋدارما» اتتى ارنايى جوبا جۇرگىزىلىپ وتىرادى. وندا ۇكىمەت تاراپىنان قازاق ادەبيەتىندەگى ۇزدىك شىعارمالار بىرقاتار شەت تىلدەرىنە، سونداي-اق الەم ادەبيەتىنىڭ جاۋھارلارى قازاق تىلىنە اۋدارىلىپ وتىرادى;  

 7. پورتالدىڭ تاعى ءبىر ارنايى جوباسى – «يلليۋستراتسيا» دەپ اتالادى. مۇندا قىلقالام شەبەرلەرىنىڭ ادەبي شىعارمالارعا نەگىزدەپ سالعان تۋىندىلارى توپتاستىرىلادى;

8. ەپيستوليارلىق جانرداعى «حات» ارنايى جوباسى ارقىلى پورتالعا تاريحي تۇلعالاردىڭ ءبىر-بىرىنە جازىسقان قۇندى حاتتارى ىرىكتەلىپ الىنىپ، وقىرمان نازارىنا ۇسىنىلادى;

9. «اۋديوكىتاپتار» جوباسىندا قازاق حالىق ەرتەگىلەرىنىڭ، باتىرلار جىرلارى مەن جىراۋلار پوەزياسىنىڭ، قازىرگى زامان ادەبيەتىندەگى كلاسسيكالىق تۋىندىلاردىڭ اۋديونۇسقالارى شوعىرلاندىرىلعان. كەز كەلگەن وقىرمان ولاردى ونلاين تۇردە تىڭداپ، باسقالارمەن بولىسە الادى;

10. پورتالدى بارىنشا قولجەتىمدى قىلۋ ماقساتىندا «اشىق مىنبەر» اتتى ادەبي بلوك اشۋ مۇمكىندىگى قاراستىرىلعان. وندا كەز كەلگەن وقىرمان پورتالعا تىركەلۋ ارقىلى ءوز بلوگىن اشىپ، ءتۇرلى جازبالارىن، باسقا اقىن-جازۋشىلاردىڭ شىعارمالارىن ورنالاستىرىپ نەمەسە ورتاق تالقىلاۋعا ۇسىنا الادى;

11. «بەينەپوەزيا» جوباسىندا تانىمال اقىندار مەن جاس اقىنداردىڭ ءوز ولەڭدەرىن وقىعان ۆيدەوسى تۇراقتى تۇردە جاريالانىپ وتىرادى. بۇل ءوز كەزەگىندە جالپى وقىرماننىڭ پوەزياعا دەگەن قىزىyشىلىعىن وياتىپ، ولەڭگە دەگەن تالعامىن جوعارىلاتۋعا سەپتىگىن تيگىزەدى;

12. «بالالار ادەبيەتى» بولىمىندە ماقال-ماتەلدەر مەن جۇمباق-جاڭىلتپاشتاردان باستاپ الەمدىك كلاسسيكاداعى بالالارعا ارنالعان شىعارمالاردىڭ مول ەلەكتروندى قورى بار;

13. پورتالدىڭ جۇمىس جاساعان 3 جىلعى ناتيجەسى – تانىمال تۇلعالاردان الىنعان 50-دەن استام سۇحبات جيناقتالىپ تۇر. ونى وقىرماننىڭ كەز كەلگەن ۋاقىتتا وقۋعا مۇمكىندىگى بار;

14. «ادەبيەت پورتالىندا» تۇراقتى تۇردە ءتۇرلى ادەبي كونكۋرستار ۇيىمداستىرىلىپ تۇرادى. وسىنداي كونكۋرستاردىڭ ارقاسىندا ادەبي ورتاعا جاڭا ەسىمدەر بەلگىلى بولىپ، ادەبي كوشكە جاس تالانتتار قوسىلىپ جاتىر;

 15. «كەيىپكەرلەر» ارنايى جوباسىندا ىقىلىم زامانداردان بەلگىلى اۋىز ادەبيەتى كەيىپكەرلەرى مەن قازىرگى ادەبي كەيىپكەرلەر تۋرالى ناقتى ءارى تولىق اقپاراتتار الۋعا بولادى;

16. پورتالدا ءار پايدالانۋشىعا ءوز كىتابىن نەمەسە قولىندا بار باسقا اۆتوردىڭ كىتابىن جۇكتەپ، كوپشىلىككە ۇسىنۋ مۇمكىندىگى بەرىلگەن. سونىمەن قاتار، پايدالانۋشى ءوزى قالاعان اۆتورعا كۋراتور بولىپ، سول اۆتوردىڭ پاراقشاسىن تولىقتىرۋعا، كىتاپتارىن ورنالاستىرىپ، فوتو-ۆيدەوماتەريالدارىن توپتاستىرۋعا قۇقىعى بار;

17. «قىسقاشا مازمۇن» ارنايى جوباسىندا پورتال تۇتىنۋشىلارى ءوزى وقىعان ادەبي شىعارمانىڭ قىسقاشا مازمۇنىن جازىپ، ورنالاستىرا الادى. ول قازىرگى ۋاقىتتىڭ تاپشى زامانىندا كوپتەگەن كىتاپتار تۋرالى حابار الىپ، شىعارمانىڭ نە جايىندا ەكەنىن ءبىلىپ جۇرۋگە تاپتىرماس جوبا;

18. پورتال جاس اقىن-جازۋشىلارعا اقپاراتتىق قولداۋ كورسەتىپ، قازاق ادەبيەتىن ينتەرنەت كەڭىستىگىندە جۇيەلى تۇردە ناسيحاتتاۋعا بارىن سالىپ كەلەدى; 

19. پورتال قۇرىلعان 3 جىلدا 20-عا جۋىق بەلگىلى قالامگەرمەن «ونلاين كونفەرەنتسيا» ۇيىمداستىردى. وعان وقىرماندار بەلسەندى تۇردە قاتىسىپ، وزدەرىنىڭ سۇيىكتى اقىن-جازۋشىلارىنا كوكەيدە جۇرگەن سۇراقتارىن قويىپ، تۇششىمدى جاۋاپتارىن الدى;

20. «فوتوگالەرەيادا» قازاق ادەبيەتى كلاسسيكتەرىنىڭ ومىرىنەن سىر شەرتەتىن تاريحي سۋرەتتەر توپتاستىرىلعان;

21. سونىمەن قاتار، پورتال پايدالانۋشىلارى وسى ۋاقىتقا دەيىن ادەبي تۋىندىلار جەلىسىمەن تۇسىرىلگەن، تاربيەلىك جانە ەستەتيكالىق ءمانى زور كوركەم فيلمدەردى كورىپ، تاماشالاي الادى;

 22. «جانرلار» بولىمىندە ادەبيەتتەگى بارلىق جانرلار توپتاستىرىلىپ، ولاردىڭ ارقايسىسىنا جەكە-جەكە انىقتاما بەرىلگەن. بۇل قازاق ءتىلى مەن ادەبيەتى كافەدرالارىندا وقيتىن ستۋدەنتتەرگە تاپتىرماس وقۋ قۇرالى دەپ ايتۋعا بولادى;

 23. «جىر جاۋھارى» جوباسىندا قازاق ادەبيەتىندەگى كلاسسيك اقىنداردىڭ ولەڭدەرىن مانەرلەپ وقۋدان سايىس ۇيىمداستىرىلادى. وعان قاتىسۋشى ءبىر كلاسسيكتىڭ ولەڭىن ۆيدەوعا نەمەسە اۋديوعا جازىپ، پورتالعا جولداي الادى. كونكۋرس قورىتىندىسى بويىنشا ۇزدىكتەردى ماراپاتتاۋ شاراسى ۇيىمداستىرىلادى;

 24. «پورتالدا» الەم ادەبيەتىنىڭ ۇزدىك تۋىندىلارى دا وقىرمانعا ءجيى ۇسىنىلىپ وتىرادى; 

25. «ادەبيەت پورتالى» ءوز قىزمەتى ارقىلى تانىمدىق-تەوريالىق، پەداگوگيكالىق-اعارتۋشىلىق ميسسيانى ۇستانادى. وقۋشىلار، ستۋدەنتتەر، وقىتۋشىلار جانە جالپى قاۋىم وزىنە كەرەكتى اقپاراتتى وسى پورتالدان تابا الادى. 

Abai.kz