وسى وچەركتى 2014 جىلدىڭ قازان ايىنىڭ سوڭىندا جازىپ ەدىم. جازىپ بولىپ، اككاۋنتقا سالعان كۇنى گەنەرال-پولكوۆنيك نۇرلان جولامانوۆ ۇستالىپ كەتتى دە، مەن بۇل وچەركتى سول زاماتتا الىپ تاستاعان ەدىم. مۇمكىن قورقاقتىق بولار... كىم بولىپ بارامىز ءوزى... اقىرى ويلاپ-ويلاپ ءوز كوزىممەن كورىپ، ءوز قۇلاعىممەن ەستىگەن نارسەلەردى قايتادان وقىرمان نازارىنا ۇسىنعاندى ءجون كوردىم. وندا تۇرعان نە بار. تەرگەۋ ىسىندە شارۋام جوق. بىراق، مەن ساپارلاس بولعان گەنەرال مىناداي كىسى ەدى...

گەنەرال-پولكوۆنيك جولامانوۆتىڭ ءبىر كۇنى
(وچەرك)

جاكسىلاردىڭ قاسىندا جۇرگەن دە ءبىر عانيبەت. گەنەرال-لەيتەنانت نۇرلان جولامانوۆپەن ساپارلاس بولدىم. 
گەنەرالدىڭ ءوزى تۋرالى
جولامانوۆ ەسىمى قازاق حالقىنا جاقسى تانىس. ول قازاقستان تاريحىندا تۇڭعىش رەت اسكەري پارادتى مەملەكەتتىك تىلدە وتكىزگەن ادام. وسىنىسىمەن دە قازاق حالقىنىڭ جادىندا ماڭگىلىككە قالىپ وتىر. 
ورىستاردا «ۆ روسسي گەنەرالوۆ منوگو، ا تولكۋ وت نيح» دەيتىن ءسوز بار. وسى ءسوزدى قازىر ءبىزدىڭ ەلدەگى گەنەرالدارعا دا بايلانىستى ايتۋعا بولادى. ارينە، بۇل ءسوز گەنەرالداردىڭ ساپاسىنا بايلانىستى ايتىلىپ وتىر. پرەزيدەنت سەنىم ارتىپ، جوعارى اسكەري شەن بەرەدى. ونى اقتاي المايتىندارى دا بار. تەمىر توردىڭ ارعى جاعىندا وتىرعاندارى قانشاما. اششى دا بولسا شىندىق. سول سەبەپتى حالىق الگىندەي ءسوز شىعارعان. حالىق دەگەنىمىز قاشاندا دانا عوي. 
گەنەرال جولامانوۆتى مۇنداي گەنەرالداردىڭ ساپىنا قوسۋعا بولمايدى. وزىندىك جولى بار. ءوزى ورىنبوردىڭ قازاعى. ورىنبور دەگەن ءسوزدى ەستىگەندە قانى قىزبايتىن قازاق جوق. ورىنبور دەگەنىمىز قازاق رەسپۋبليكاسىنىڭ تۇڭعىش استاناسى. ونى قايتالاپ ايتا بەرۋدەن جالىقپاۋ كەرەك. پاتريوتيزم تاقىرىبى دا وسى جەردەن باستالۋى كەرەك. وسىنداي قاسيەتتى جەردە ءوسىپ-ونگەن جولامانوۆتىڭ تاربيەسى، تانىم-تۇسىنىگى دە بولەك. ءبىر قاۋىم قازاق مەكەندەگەنىمەن، ءبىر قازاق مەكتەبى جوق وڭىردە تۋىپ وسسە دە قازاق ءتىلىن، حالىقتىڭ سالت-ءداستۇرىن جاقسى بىلەدى. ءبىلىپ عانا قويمايدى، ونى قىزمەتتە، تۇرمىستا قولدانادى. 
ءبىر جينالىس كەزىندە دەكرەتكە ايەلدەرمەن قاتار ەر ازاماتتاردىڭ دا شىعىپ جاتقاندىعى ءسوز بولدى. ولاردىڭ ىشىندە وفيتسەرلەر دە بار ەكەن. ونىڭ ىشىندە قازاق وفيتسەرلەرى. مۇنى ەستىگەن گەنەرال: «بۇل دەگەن ماسقارا عوي. قازاق جىگىتتەرىنىڭ دەكرەتتە وتىرعانى قالاي. نامىس قايدا؟ مۇنى حالقىمىز ەستىسە نە بولادى؟ وتانىمىزدى كىم قورعايدى؟» دەپ قازاقشا ايتقاندا تالاي ادامنىڭ نامىسى وينادى. 
مۇنى ءجاي عانا ايتىپ قويا سالمادى. سول وفيتسەرلەردىڭ نامىسىن وياتۋ ءۇشىن ۆەدومستۆولىق «وتان ساقشىسى – چاسوۆوي رودينى» گازەتىنىڭ جۋرناليستەرىنە تاپسىرما بەرىپ، ارنايى ماقالا جازدىردى. سونداي ماقالانىڭ ءبىرىن ء«الدي-ءالدي بوپەشىم» دەگەن تاقىرىپپەن جۋرناليست، جازۋشى، پولكوۆنيك كەنجەبەك سەيىتمۇحامەدوۆ جازىپ، جاريالادى. بۇل جەردە گەنەرالدىڭ جان-دۇنيەسىن تۇسىنۋگە بولادى. بۇگىنگى زاماننىڭ ەر-ازاماتتارى ۇساقتالىپ كەتتى. وت باسى، وشاق قاسىنا ءتۇسىپ قالدى. وسىندايدا دەپۋتات داريعا نازارباەۆانىڭ «قازىرگى كەزدە ايەلدەردى ەمەس ەركەكتەردىڭ وزدەرىن قورعاۋ كەرەك» دەپ ايتقان ءسوزى ويعا ورالادى. شىندىق سول. ايەلدەرىن جۇمىسقا جەگىپ، وزدەرى ۇيدە وتىرىپ بالا باعاتىن ەركەكتەردىڭ سانى ارتىپ كەلەدى. قوعامدىق پروبلەما... ول ەندى وفيتسەرلەردىڭ اراسىندا دا پايدا بولۋدا...
شەكارا قىزمەتىنە كەلىسىمەن قازاق تىلىنە كەڭىنەن كوڭىل ءبولدى. ءوزىنىڭ كابينەتىنىڭ قاسىنان قازاق ءتىلى كلاسىن اشتى. ءوزى ارى وتكەندە، بەرى وتكەندە ول كلاسقا باس سۇعىپ، ساباقتى قاداعالاپ كەتەدى. وسىندايدا ونىڭ كوزىنەن اباي اتامىزدىڭ «جاسىمدا عىلىم بار دەپ ەسكەرمەدىم، پايداسىن كورە تۇرا تەكسەرمەدىم. ەر جەتكەن سوڭ تۇسپەدى ۋىسىما، قولىمدى مەزگىلىنەن كەش سەرمەدىم» دەگەن ويىن وقۋعا بولاتىنداي. رەسەي جەرىندە تۋىپ وسكەندىكتەن ءوزى قازاق تىلىندە وقىپ، ءبىلىم الا المادى. وسى وكىنىش گەنەرالدىڭ ءون بويىنان بايقالادى. ايتپەسە، جينالىس كەزىندە قازاق ءتىلى كلاسىنىڭ مەڭگەرۋشىسى مايور راۋشان ۋاتباەۆاعا قاراپ «مەنىڭ دە قازاق تىلىندە ەركىن سويلەگىم كەلەدى» دەپ ايتپاس ەدى عوي. قازاق ءتىلى كلاسى سوڭعى ۇلگىدەگى تەحنيكامەن جابدىقتالعان. ارينە، قازاق تىلىنە ارنالىپ كەرەمەت كلاسس اشىلدى ەكەن دەپ، اسكەريلەردىڭ بارلىعى قازاق تىلىندە سويلەپ كەتتى ەكەن دەپ ويلاپ قالماڭىزدار. نيەت عوي. كوللەكتيۆتە قازاق تىلىنە دەگەن نيەت تۇزەلدى. قۇرمەت كوتەرىلدى. ارينە، مۇنداي كەرەمەت كابينەتتەر باسقا دا ۆەدومستۆولاردا جەتەرلىك. بىراق، بارلىعى جاپپاي قازاق تىلىندە سويلەپ جاتقان جوق. نەگە؟ ول ەندى جوعارى دەڭگەيدە شەشىلەتىن ماسەلە. ال تومەنگى جاقتا العىشارتتار جاسالدى. 
مەن ءوز باسىم قازاق تىلىنە كوشۋ قازىرگى ۋاقىتتا تەحنيكالىق ماسەلە دەپ سانايمىن. ول ساياسي تۇرعىدا الدەقاشان شەشىلىپ، شەشىمىن تاۋىپ قويعان. رەسپۋبليكالىق «قازاقستان» تەلەكانالى قازاق-ورىس تىلدەرىندە جۇمىس ىستەيتىن ەدى. سول كانالدىڭ ۋ-شۋسىز تازا قازاق تىلىنە اۋىسقانىن ەشكىم دە بايقاماي قالدى. سەبەبى، بارلىعى ويلاستىرىلىپ ىستەلدى. وعان ەشكىم قارسى دا بولعان جوق. مىنە، وسىنداي تاسىلمەن بارلىق مەملەكەتتىك ورگانداردى مەملەكەتتىك تىلگە كوشىرىپ جىبەرۋگە بولادى دەپ سانايمىن. بۇعان گەنەرال جولامانوۆ باسقارىپ وتىرعان شەكارا قىزمەتى الدەقاشان دايىندالىپ قويعان.
ءىلىم-ءبىلىم جاعىنان ورىستاردى، ماسكەۋدى مويىنداتۋ وڭاي شارۋا ەمەس. اسىرەسە قازاق بالاسى ءۇشىن ونىڭ اسكەري وقۋ ورىندارىن التىن مەدالمەن ءبىتىرۋ ەكىنىڭ ءبىرىنىڭ ماڭدايىنا جازىلا بەرمەيدى. سوناۋ ءبىر 1996 جىلى گەنەرال-مايور مالىك ساپاروۆ رەسەي قارۋلى كۇشتەرى باس شتابى اكادەمياسىن التىن مەدالمەن ءبىتىرىپ كەلگەندە بۇكىل قازاق ءبىر قۋانىپ ەدى. ءى پەتردىڭ جارلىعىمەن قۇرىلعان سول اكادەميانى التىن مەدالمەن بىتىرگەن ساناۋلى قازاقتىڭ ءبىرى وسى گەنەرال-لەيتەنانت نۇرلان ايتمانۇلى جولامانوۆ. 
جالپى، سول كەزدە ن.جولامانوۆ تۋرالى جۋرناليست سەرىك جۇمابەكۇلى «ورىس اسكەريلەرىن تاڭقالدىرعان قازاق وفيتسەرى» دەپ كەڭ كولەمدى ماقالا جازعاندىعى ەسىمىزدە (ەگەمەن قازاقستان، 26.09.2001ج.).

«دارحان» زاستاۆاسى نەمەسە گەنەرالدىڭ ءبىر كۇنى
16-قازان، 2014 جىل. شەكارا قىزمەتىنىڭ شاعىن ۇشاعى استانادان شىمكەنتكە بەت تۇزەدى. ۇشاققا مىنىسىمەن گەنەرال جينالىس اشتى. ينسپەكتسيا باستىعى پولكوۆنيك ولەگ كولەسنيكوۆ، ديرەكتور كەڭەسشىسى ايدار قيقىموۆ، تاربيە باسقارماسى باستىعىنىڭ ورىنباسارى پولكوۆنيك دارحان ءدىلمانوۆ الداعى ءىس-شارانىڭ دايىندىعى تۋرالى باياندادى. سارىاعاش شەكارا وتريادىنىڭ قۇرامىندا جاڭادان زاستاۆا اشىلعالى وتىر. وعان مارتەبەلى قوناقتار شاقىرىلعان. ونىڭ ىشىندە سەناتورلار يكرام ادىربەكوۆ، حالىق قاھارمانى مۇحتار التىنباەۆتار كەلەدى دەپ كۇتىلۋدە. 
شىمكەنتكە كەلىسىمەن ۆەرتولەتكە اۋىسىپ مىندىك. تىكۇشاققا العاش ءمىنۋىم. قىزىق بولادى ەكەن. سامولەتتەر اۋەلى گۇرىلدەپ، سودان كەيىن زىمىراپ بارىپ ۇشاتىن بوسا، مۇندا ءبارى كەرىسىنشە. اۋەلى دىڭىلداپ موتورى وتالادى. ول ءبىرشاما ۋاقىت قىزىپ بولعان سوڭ قايىقتىڭ ەسكەگىندەي ەبەلەكتەرى اينالا باستايدى. ولاردىڭ بىرتە-بىرتە قىزاتىندىعى سونشا، ءتىپتى كوزگە كورىنبەي قالادى ەكەن. تىكۇشاق تا تاۋىقتىڭ جۇمىرتقاسى قۇساپ ءبىر ورنىندا شايقالا باستايدى ەكەن. بىرەسە وڭعا، بىرەسە سولعا، بىرەسە العا، بىرەسە ارتقا شايقايدى. سودان ءبىر ۋاقىتتا كرانمەن كوتەرگەندەي تىك كوتەرىلە باستايدى. بۇعان تاڭعالىپ وتىرعان گەنەرال جوق. ەكى كوزى يلليۋميناتوردا. وڭتۇستىكتە ءالى كۇن جىلى. قوڭىر كۇز. ەگىننىڭ تولىق جينالىپ بىتكەندىگى بايقالادى. 
شىمكەنت پەن «دارحان» زاستاۆاسىنىڭ اراقاشىقتىعى 140 شاقىرىمداي بولادى ەكەن. تىكۇشاق جيىرما مينۋتتاي ۇشتى. 
گەنەرال زاستاۆا كەشەندەرىن كوكتەن تاماشالاعىسى كەلگەن بولۋى كەرەك، ۆەرتولەت ونىڭ توبەسىن ءۇش رەت اينالىپ ۇشتى. اتشاپتىرىم القاپتى الىپ جاتقان زاستاۆا عيماراتتارى كوكتەن عاجاپ كورىنەدى ەكەن. قوراپ ءتارىزدى اقشاڭقان جايلار كوز تارتادى. 
ۆەرتولەت قالبالاقتاپ كەلىپ جەرگە قوندى. الاڭعا سۋ سەۋىپ قويعان ەكەن، سوندا دا شاڭ كوتەرىلدى. شاڭنىڭ اراسىنان وترياد، زاستاۆا باسشىلارى كورىنەدى. باس كيىمدەرىن قولدارىمەن ۇستاپ العان.
ۆەرتولەتتىڭ ەسىگى اشىلعانى سول ەدى، ديرەكتور ورىنباسارلارى پولكوۆنيك مۇحتار ءسابيدولدانوۆ، سەرىكحان قايىرحانوۆتار كەلىپ بايانداۋ جاسادى. ولاردىڭ ارعى جاعىندا وڭىرلىك باسقارما باستىعى پولكوۆنيك ارمان قاليەۆ، سارىاعاش وتريادىنىڭ باستىعى ارداق جۇماشەۆتار ساپ تۇزەپ تۇر. 
گەنەرال بىردەن ىسكە كىرىستى. اۋەلى ەرتەڭگى بولاتىن سالتاناتتى شارانىڭ جوسپارىمەن تانىستى. زاستاۆادا دايىندىق جۇمىستارى ويداعىداي اتقارىلىپتى. قازاقىلىقتىڭ لەبى ەسەدى. ابىلايحاننان بەرى قارايعى بارلىق حاندار مەن باتىرلاردىڭ پورترەتتەرى پلاتستىڭ جيەگىنە ءىلىنىپتى. ولاردىڭ ءومىرباياندارى مەن ناسيحات سوزدەرى جازىلعان. ءوز باسىم وسى جەردە ءبىرىنشى رەت ابىلايحان بابامىزدىڭ تاقيا كيىپ تۇرعان بەينەسىن كورىپ تاڭقالدىم. بۇل جۇمىستاردى «وڭتۇستىك» وڭىرلىك باسقارماسىنىڭ ء«زامپوليتى» پولكوۆنيك ابدىساعيت تولەگەنوۆ پەن قىزمەتشى قوشان جۇماباەۆ دەگەن ازاماتتاردىڭ اتقارعاندىعى ايتىلدى. 
«سارىاعاش» وتريادىنىڭ باستىعى پودپولكوۆنيك ارداق جۇماشەۆتىڭ «تۇزەل، تىك تۇر» دەگەن كومانداسىنان كەيىن سالتاناتتى شەرۋدىڭ دايىندىعى باستالىپ كەتتى. شەكاراشىلار بارابان دۇرسىلىمەن جارىسا ءجۇرىپ ءوتتى. سىرت قاراعان ادامعا ءبارى دە تاماشا سەكىلدى. بىراق، گەنەرال كەمشىلىكتەر تاپتى. ونىڭ تالابى باسقا. شىنىندا گيمن ويناعاندا كەيبىر اسكەري قىزمەتشىلەر اۋىزدارىن اشپاي تۇرىپتى. راس ەكەن. ساپتا جۇرگەندە كەيبىر شەكاراشىلار اياقتارىن دۇرىس كوتەرە الماپتى. راس ەكەن. ءبىر ساربازدىڭ فۋراجكاسى ءوزىنىڭ باسىنان ۇلكەن بولىپ شىقتى. وسىنىڭ بارلىعىن گەنەرال قاي ۋاقىتتا بايقاپ ۇلگەردى دەپ تاڭقالدىم. ديكتوردىڭ سوزدەرىنە بايلانىستى دا ەسكەرتپەسىن ماعان ايتتى:
- سوزىندە ديناميكا جوق. سلابىي تەكست، ءوزىڭىز دايىنداڭىز.
دايىندادىم. «اتىراۋدان التايعا دەيىنگى، الاتاۋدان ارقاعا دەيىنگى، شاپقان تۇلپاردىڭ تۇياعى تالاتىن، ۇشقان قۇستىڭ قاناتى كۇيەتىن قازاق دالاسىن اتا-بابالارىمىز اق بىلەكتىڭ كۇشىمەن، اق نايزانىڭ ۇشىمەن قورعاپ، بىزگە امانات ەتىپ قالدىردى. كەڭ بايتاق جەرىمىزدىڭ شەتكى شەبىن قورعاۋ مىندەتى بۇگىنگى تاڭدا قازاقستاندىق شەكاراشىلارعا جۇكتەلىپ وتىر» دەپ باستالاتىن سوزگە گەنەرال ءوزىنىڭ ريزالىعىن ءبىلدىردى. قانات ەسىمدى ديكتور بۇل ءسوزدى ناقىشىنا كەلتىرىپ، مانەرلەپ وقىعاندا ءتىپتى قانات بىتكەندەي بولدى. 
كەزەك عيماراتتارعا كەلدى. اۋەلى كازارمانى ارالادىق. گەنەرال ستەندتەردىڭ ءمان-ماعىناسىنا قاراپ، بىرقاتارىنىڭ ورنىن اۋىستىردى. «قازاقستان - 2050» ستراتەگياسىنا ارنالعان ستەندتى كوزگە تۇسەتىن جەرگە ىلگىزدى. شەكارا قىزمەتى ديرەكتورىنىڭ ورىنباسارى پولكوۆنيك سەركىحان قايىرحانوۆ كورنەكى قۇرالداردى رەت-رەتىمەن تانىستىرىپ شىقتى. كازارماداعى دايىندىق جامان ەمەس سەكىلدى. 
ودان كەيىنگى كەزەك قارۋ-جاراق، اسكەري تەحنيكا كورمەسىنە كەلدى. ءبارى دە تاپ-تازا، مۇنتازداي. قارۋ-جاراقتار جىلتىراپ تۇر. بىراق، گەنەرال ءمىن تابا ءبىلدى. ءاربىر تەحنيكانىڭ حاراكتەريستيكاسىن ايتاتىن وفيتسەرلەردىڭ دايىندىعىنا كوڭىل تولمادى. جاتتاندى سوزدەر. تانىستىرىپ تۇرعان تەحنيكاسىنىڭ قانشالىقتى ماڭىزدى ەكەندىگىن تۇسىنبەيدى. ونىسى راس. گەنەرالدىڭ ءوزى «بۇل تەحنيكا نە ءۇشىن الىندى، قىزمەتى قانداي؟ جىلجىمالى مەديتسينالىق كومەك كولىگى. الىس زاستاۆالارداعى، اۋىلدىق مەكەندەردەن جىراقتا ورنالاسقان، تاۋلى، ءشولدى ايماقتا ورنالاسقان بولىمشەلەردەگى جەكە قۇرامنىڭ دەنساۋلىعىن تەكسەرۋ ءۇشىن قولايلى تەحنيكا» دەپ، اڭگىمەنى وسىدان باستاۋ كەرەك» دەگەندە گەنەرالمەن ءبارى كەلىسكەندەي بولدى. پولكوۆنيك مۇحتار سابيدولدانوۆقا بىرقاتار ەسكەرتپە-سىن ايتىلدى. 
بۇدان كەيىنگى كەزەك قىزمەتتىك جانۋارلاردىڭ مەكەن-جايىنا كەلدى. اتقورا ءوزىنىڭ تازالىعىمەن كوزگە ءتۇستى. مۇندا تۇرعان «ەلەس»، «گروزا» سەكىلدى اتتاردىڭ دەنە تۇرقىنا قاراعاندا، جاعدايلارى جامان ەمەس سەكىلدى. گەنەرال بۇل جەردەن ەشقانداي كەمشىلىك بايقامادى. كينولوگتاردىڭ قىزمەتى، قىزمەتتىك يتتەردىڭ جاي-كۇيى دە ويداعىداي بولىپ شىقتى. 
وفيتسەرلەر ۇيىنە كەلدىك. كىشكەنتاي بالالار ءماز-مەيرام. جۇگىرىپ ءجۇر. گەنەرال پاتەرلەردى ارالادى. قىزمەتتىك پاتەرلەردىڭ ىشىندە ءبارى بار. گازپليتا، توڭازىتقىش سەكىلدى تۇرمىستىق تەحنيكالارعا دەيىن قويىلعان. جيھازدار دا جاپ-جاڭا، دۋش، تۋالەت ءبارى پاتەردىڭ ىشىندە. اۋىلدا ەمەس، قالادا، ءتىپتى استانادا تۇرىپ جاتقاندايسىڭ. ىستىق سۋ، سالقىن سۋ اعىپ تۇر. كەزىندە سوۆەت وكىمەتى قالا مەن دالانىڭ ايىرماشىلىعىن جويامىن دەپ، اۋىلدىق جەرلەرگە ەتاج ۇيلەر سوعىپ ءبىراز اۋرە-سارساڭعا ءتۇسىپ ەدى. ونىڭ دارەتحاناسى كوشەدە بولاتىن. كوشەدەگى تۋالەت بولعان سوڭ ونىڭ جاعدايىنىڭ قانداي بولعاندىعى ەستە. ال مىنا شەكارا بويىنداعى «بلاگوۋسترويكالاردىڭ» جاعدايى ءتىپتى بولەك. زامپوليتتەرگە تاپسىرما بەرىلدى. ءۇي يەلەرى ەرتەڭ دەلەگاتسيا كەلگەندە دۇرىستاپ سويلەي ءبىلۋى كەرەك. 
وسىنداي جۇمىستارمەن-اق كەش باتتى. تۇنگى ساعات ون ەكىنىڭ شاماسىندا گەنەرال بولمەسىنىڭ جارىعى جانىپ تۇردى. پولكوۆنيك قايىرحانوۆ، كەڭەسشى قيقىموۆتىڭ سوزىنە قاراعاندا گەنەرال ەرتەڭگى سويلەيتىن ءسوزىن پىسىقتاپ جاتىر ەكەن. 
بۇل كەزدە ءبىز كۇنى بويعى جۇرىستەن بولار كەنجەبەك ەكەۋمىز تيتىقتاپ شاپشاعان ەدىك. گەنەرالدىڭ سوزىنە كومەكتەسكەن بولدىق. بىراق، ءماتىننىڭ باسىم بولىگىن ول ءوزى دايىندادى.
وسىلايشا گەنەرالدىڭ ءبىر كۇنى وتە شىقتى...

ءسوز سوڭى

ەرتەڭىنە «دارحان» زاستاۆاسىنىڭ اشىلۋ سالتاناتى بولدى. سەناتورلار يكرام ادىربەكوۆ، مۇحتار التىنباەۆ، وڭتۇستىك قازاقستان وبلىسىنىڭ اكىمى اسقار مىرزاحمەتوۆتار قۇتتى بولسىن ايتىپ، زاستاۆانىڭ لەنتاسىن قيىپ، سيمۆوليكالىق كىلتىن تاپسىردى. سەنات اپپاراتىنىڭ جاۋاپتى قىزمەتكەرى ونەرباەۆ شەكاراشىلاردىڭ قىزمەتىنە ساتتىلىك تىلەدى. گەنەرال-لەيتەنانت جولامانوۆ شەكارانى نىعايتۋ تۋرالى پرەزيدەنت بەرگەن تاپسىرمانىڭ ورىندالىپ جاتقاندىعىن، سوڭعى ءبىر جىلدىڭ ىشىندە شەكارا بويىندا 20-عا جۋىق شەكارا نىساندارىنىڭ سالىنىپ، پايدالانۋعا بەرىلگەندىگىن تىلگە تيەك ەتتى. 
وتىزعا جۋىق جۋرناليستەر دە بۇل مەرەكەنىڭ كۋگەرلەرى بولدى. جولامانوۆتىڭ ءبىر قاسيەتى – جۋرناليستەر قاۋىمىن وسىنداي شارالاردان تىس قالدىرمايدى. «ايقىن» گازەتىنىڭ ءبولىم مەڭگەرۋشىسى قايىرجان تورەجانمەن، «حابار» اگەنتتىگىنىڭ ءتىلشىسى گريگوري بەدەنكومەن، ستۆ تەلەارناسىنىڭ ءتىلشىسى ليۋدميلا سكوروحودوۆامەن گەنەرال-پولكوۆنيك ەسكى تانىستار سەكىلدى امانداستى. اڭگىمەسىن ايتتى. 
سالتاناتتى شاراعا قاراپ تۇرىپ «تويدىڭ بولعانىنان بولادىسى قىزىق» دەگەن ماتەل ويىما ءتۇستى. راس. قاي نارسەنىڭ دە بولادىسى قىزىق. سالتاناتتى شارا تۇك بولماعانداي ءبىر جارىم ساعاتتىڭ ىشىندە ءوتتى دە كەتتى. كەشەگى قاربالاس تىرلىكتىڭ بارلىعى ۇمىتىلدى. 
گەنەرالعا دەگەن كەشەگى رەنىشىمىز تەز ۇمىتىلدى. وعان ىشتەي مىقتى دەنساۋلىق تىلەدىم... وسىنداي گەنەرالدار تۇرعاندا ەلىمىزدىڭ قاۋىپسىزدىگىنە الاڭداۋعا ەشقانداي نەگىز جوق. 
شەكارا قىزمەتى تالاي قيىن ساتتەردى باستان وتكەردى. «ارقانكەرگەن» وقيعاسى، شىمكەنت تۇبىندەگى شەكارا ۇشاعىنىڭ اپاتقا ۇشىراۋى ەلدىڭ ەسىندە. وسىنداي ساتتە ەلباسىنىڭ گەنەرال-پولكوۆنيك جولامانوۆقا تاڭداۋ جاساۋى كەزدەيسوقتىق ەمەس، كەرىسىنشە زاڭدىلىق. 
تاۋەلسىز ەلدىڭ شەكاراسىن نىعايتۋ، شەكارا قىزمەتىن دامىتۋ جانە شەكاراشىنىڭ بەدەلىن كوتەرۋ باستى مىندەتتەردىڭ قاتارىندا تۇرعاندىعى انىق.

مۇحتار اناربەكۇلى 
پولكوۆنيك، قازاقستان جۋرناليستەر وداعىنىڭ مۇشەسى
استانا-شىمكەنت-دارحان-استانا