قازاقستان رەسپۋبليكاسىنىڭ سىرتقى ىستەر مينيسترلىگى اعىمداعى جىلدىڭ 24 ناۋرىزىندا فرانتسيانىڭ وڭتۇستىگىندە اپاتقا ۇشىراعان Germanwings اۋە كومپانياسىنىڭ Airbus A320 ۇشاعىندا قازاقستاننىڭ 3 ازاماتى بولعانىن راستادى. بۇل تۋرالى ۆەدومستۆونىڭ ءباسپاسوز قىزمەتى حابارلادى.
«قر ءسىم قازاقستان ازاماتتارى - يمانقۇلوۆ ەربول بازارالىۇلىنىڭ (1965 جىلى دۇنيەگە كەلگەن), يسەنعاليەۆا ايجان سارىمقىزىنىڭ (1966 جىلى دۇنيەگە كەلگەن) جانە يمانقۇلوۆ ءادىل ەربولۇلىنىڭ (1989 جىلى دۇنيەگە كەلگەن) قازا تابۋ فاكتىسىن راستايدى. قازا تاپقانداردىڭ وتباسىلارى مەن جاقىندارىنا قاتتى قايعىرىپ، كوڭىل ايتامىز.

بۇدان باسقا، گەرمانيا ۇكىمەتىنىڭ حابارلاۋىنشا، ۇشاقتىڭ ىشىندە بلەس ەلەنا ەسىمدى ازاماتشا بولعان. الدىن الا بولجام بويىنشا، ول دا قازاقستان ازاماتى بولىپ تابىلادى. قازىرگى كەزدە بۇل اقپارات سايكەستەندىرىلگەن ورگاندارمەن تەكسەرىلۋدە.

سىرتقى ىستەر مينيسترلىگى قازا تاپقان قازاقستاندىقتاردىڭ وتباسىلارىنا بارىنشا كومەك كورسەتەدى. قازا تاپقانداردىڭ تۋىستارىنا جەدەل جەلى نومىرلەرى بويىنشا حابارلاسۋدى سۇرايمىز:

1. قر-دىڭ بەرليندەگى كونسۋلدىعى - +4915208833631 (نەگىزگى كونتاكت);

2. قر-دىڭ يسپانياداعى كونسۋلدىعى (بارسەلونا) - +34674482333.

بۇدان باسقا، كونسۋلدارمەن بايلانىسقا شىعۋ مۇمكىن ەمەس بولعان جاعدايدا، تۋىستارى ءسىم-ءنىڭ كەزەكشى ديپلوماتىنا +77172720111 تەلەفون ءنومىرى بويىنشا حابارلاسا الادى»، دەلىنگەن حابارلامادا.

سونداي-اق...

ەلباسى Germanwings اۆياكومپانياسى ۇشاعىنىڭ اپاتقا ۇشىراۋى سالدارىنان قازا تاپقان قازاقستان ازاماتتارىنىڭ تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى.

بۇل تۋرالى اقوردانىڭ رەسمي سايتىندا حابارلاندى.

جەدەلحاتتا ۇشاق اپاتىنان قازاقستاندىقتاردىڭ قازا تاپقانى تۋرالى حاباردى مەملەكەت باسشىسىنىڭ كۇيزەلە قابىلداعانى ايتىلعان.

نۇرسۇلتان نازارباەۆ ولاردىڭ تۋعان-تۋىستارى مەن جاقىندارىنا قازاقستان حالقىنىڭ جانە جەكە ءوزىنىڭ اتىنان شىن نيەتپەن كوڭىل ايتتى.

سونداي-اق مەملەكەت باسشىسى قازا تاپقانداردىڭ وتباسىلارىنا قاجەتتى كومەك كورسەتۋ، مارقۇمداردىڭ سۇيەگىن انىقتاۋ جانە وتانىنا جەتكىزۋ جونىندە قازاقستان رەسپۋبليكاسىنىڭ ءتيىستى مەملەكەتتىك ورگاندارىنا تاپسىرما بەردى.

اباي-اقپارات.