جامبىل وبلىسى بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتى (تاراز، 2014 جىل) «ۇلت رۋحانياتى» (حح عاسىر باسىنداعى قازاق ادەبيەتى) دەگەن اتپەن وقۋ قۇرالىن باسىپ شىعارىپتى. ارينە، قۇپتارلىق قادام.

الايدا، وسى وقۋ قۇرالىنان نۇرجان ناۋشابايۇلى تۋرالى ماقالانى وقىعاندا ەكى كوزىم اتىزداي بولدى. وقۋ قۇرالىنىڭ اۆتورلارى تۇرسىناي ابدىقادىروۆا مەن عاليا سىزدىقباەۆا 1997 جىلى قوستانايدا جارىق كورگەن مەن قۇراستىرعان نۇرجاننىڭ «الاش» دەپ اتالاتىن كىتابىنا جازعان العى ءسوزىمدى تۇگەل دەرلىكتەي كوشىرىپ الىپتى. ايتەۋىر، ماقالا ىشىندە كەزدەسەتىن «كىتاپتى قۇراستىرعان اقىلبەك شاياحمەت» دەگەن سويلەمدى سول كۇيىندە قالدىرىپتى. ماقالانىڭ سوڭعى جاعىنا «ەل اۋزىندا مىناداي ءبىر اڭىز بار» دەپ ىبىراي التىنسارين قۇدالىققا بارعاندا نۇرجاندى ەرتىپ اپارعان ەكەن دەگەن اڭگىمەنى قوسىپتى. الايدا، ونى دا ءوز جانىمىزدان قوستىق دەگەندەرى بولماسا، سول العىسوزدە بۇل اڭگىمە دە ايتىلعان.

اقىننىڭ «الاش» دەپ اتالاتىن كىتابى قوستاناي قالاسىندا 1997 ج. باسىلعانىمەن، بۇل جيناق رەسپۋبليكاعا تۇگەل تارالىپ ۇلگەرمەدى. نۇرجان اقىننىڭ «ۇيىقتاما، ويان، الاشىم!» دەپ اتالعان جيناعى جاقىندا استاناداعى «فوليانت» باسپاسىنان قر مادەنيەت مينيسترلىگىنىڭ «ادەبيەتتىڭ الەۋمەتتىك ماڭىزدى تۇرلەرىن باسىپ شىعارۋ» باعدارلاماسى بويىنشا ەكى مىڭ دانا تارالىممەن جارىق كوردى. وسى كىتاپتا اتالعان العىسوزدى كەڭەيتىپ جازعان بولاتىنمىن. «كىتاپتى قۇراستىرعان جانە العىسوزىن جازعان احمەت بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ پروفەسسورى، حالىقارالىق شىعارماشىلىق اكادەمياسىنىڭ كوررەسپوندەنت-مۇشەسى، قر مادەنيەت قايراتكەرى، قازاقستان جازۋشىلار وداعى باسقارماسىنىڭ مۇشەسى اقىلبەك شاياحمەت» دەپ بۇل كىتاپتا دا تايعا تاڭبا باسقانداي انىق كورسەتىلگەن.

كىتاپ نازىمدار، تولعاۋلار، عازالدار، تەرمەلەر، اندەر، ايتىستار جانە مىسالدار دەپ اتالعان بىرنەشە بولىمنەن تۇرادى. سونىمەن قاتار جيناقتا كەزدەسەتىن كىتابي، ءدىني جانە كىرمە سوزدەردىڭ سوزدىگى بەرىلگەن.

مەنىڭ جانىما باتاتىنى، ماقالا سوڭىندا پايدالانعان ادەبيەتتەر تىزىمىندە دە نۇرجان اقىننىڭ كىتاپتارى دا، ول تۋرالى بىرنەشە عىلىمي-زەرتتەۋ ەڭبەك جازعان مەنىڭ اتى-ءجونىم دە مۇلدە كورسەتىلمەپتى.

سوندا مۇنى قالاي تۇسىنۋگە بولادى؟ بىرەۋدىڭ ەڭبەگىن پايدالانعان كۇندە دە، ايتىپ ۇرلاسا، ايىبى از بولار ما ەدى؟!

اقىلبەك شاياحمەت،

احمەت بايتۇرسىنوۆ اتىنداعى

قوستاناي مەملەكەتتىك ۋنيۆەرسيتەتىنىڭ پروفەسسورى.

Abai. kz