ىقىلاس وجايۇلى. ءبىر ءارىپ ءبىر ۇلتتى وزگەرتەدى
«...سامالتاۋ قايران جەرىم ارتتا قالدى،
اداسقان ورىسىنەن ءبىز ءبىر ءۇيىر» .
وسى ءبىر ءان ەسكە ورالعان سايىن كوكىرەگىم ۋداي اشىپ، الەمتاپىراق كۇيگە تۇسەمىن.
ءتىلى وزگەرگەن ۇلتتىڭ ءتۇرى دە وزگەرەدى ەكەن. ء(بىز بۇل جەردە بەت ءپىشىنىمىزدى ء(وڭىمىزدى) وزگەرتكەن ورىستىڭ 14 ءارپى حاقىندا ايتىپ وتىرمىز).ء ارىپتى دىبىستىڭ تاڭباسى نەمەسە نوتاسى دەسەك تە بولادى. دەمەك، ءارىپتىڭ وزگەرۋى اۋەزدىڭ (داۋىستىڭ) وزگەرۋىنە دە ءوز اسەرىن تيگىزبەي قويمايدى. كۇماندانعان ەكەنسىز، كونە گرامموفونعا جازىلعان مۇستافا مەن مۇحتاردىڭ داۋىسىن تىڭداپ كورىڭىز. ساڭقىلداپ شىققان ساڭلاقتار ۇنىنەن كۇدىگىڭىز سەيىلىپ، ءبىز اڭداتقان ويدىڭ توبەسىنەن ءدال تۇسەرىڭىز انىق. بۇدان شىعاتىن ءپاتۋا بايلامى – ءبىر ءارىپ ءبىر ۇلتتىڭ انتروپولوگياسىن تولىعىمەن وزگەرىسكە ۇشىراتا الادى. مۇنى عىلىمدا قاتەلەسپەسەم ەنتەلەحيا دەيدى.
راس، بۇگىنگى قازاق – باسقا قازاق. تىك ىشەگى مۇزداعان، بەتون بەتتى، سۇپ-سۇر سۋىق قازاق. باسقا ورىسكە تاپ بولعان ءتول بولمىسىڭنىڭ ءوز ۇيىرىنەن اداسىپ شۇرقىراسا الماعان احۋالىنا ءسات سايىن جولىعاسىڭ. سوسىن ءدال قازىرگى قازاق قوعامىندا قازاق بولۋدان قيىن ەشتەڭە جوق ەكەندىگىن تۇسىنەسىڭ.
حوش دەلىك....
بۇدان ءبىر عاسىر بەدەرىندە عۇمار قاراش بالاسى:
«...ءاربىر ىستە قازاق ءيسى اڭقىعان،
تىرلىكتى كوزىمىزبەن كورەمىز بە؟» - دەگەن ساۋال جولداعان ەدى.
جاسىرىپ نەمە كەرەك، اتالعان اساۋ سۇراققا كۇنى بۇگىنگە دەيىن مەملەكەتتىك مازمۇندا تولىققاندى جاۋاپ بەرىلگەن جوق. بۇل بىلگەن ادامعا ماڭگىلىك ەلدىڭ مۇراتىن ەكى-اق اۋىز ولەڭگە سىيدىرعان قۇدىرەتتى ساۋال بولاتىن.
ال قارىمتا جاۋاپ قاتۋعا قازاقيا ەلى قاشان دايار بولادى؟ ءتىل مەن ءدىلدى ايتپاعاندا ىشكەن اسىمىز بەن كيگەن كيىمىمىزدەن كىمدەردىڭ ءيىسى شىعادى ءوزى؟...
بۇل ءار قازاق بالاسىنىڭ ۇياتى مەن ۇجدانىنا تۇسكەن ۇلى سىن بولۋى كەرەك.
قازاق توپىراعىندا جاراتىلعان دانىشپاندارىمىز بۇگىنىمىزبەن كەلەر ۋاقىتىمىزعا دا ءوز بولجامدارىن جاساپتى. ايتقاندارى كەلسىن، دۋالى اۋىزدارىمىزدىڭ دەنى جاقسىلىققا جورىپتى. راس، كوپ دۇنيەنىڭ قۇيىسقانى بوساپ، كوبەسى سوگىلىپ كەلەدى.
«قازاق اڭقيتىن» كۇن دە الاشقا الىستا ەمەس سەكىلدى...
