سەمەيدەگى ابايدىڭ مەملەكەتتىك قورىق-مۇراجايىندا فيلولوگيا عىلىمدارىنىڭ دوكتورى، پروفەسسور، «قازاق كسر حالىق اعارتۋ ءىسىنىڭ ۇزدىگى»، «قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى» بەلگىلەرىنىڭ يەگەرى، قازاقستاننىڭ ەڭبەك سىڭىرگەن قايراتكەرى اراپ ءسلامۇلى ەسپەنبەتوۆتىڭ «التاي-ەرتىس كىتاپحاناسى» سەرياسىمەن شىققان ەكى تومدىق كىتابىنىڭ تۇساۋكەسەر كەشى ءوتتى.

ا.ەسپەنبەتوۆ - ادەبيەتتانۋ سالاسىندا ەلۋ جىلعا جۋىق قاجىرلى ەڭبەك ەتىپ كەلە جاتقان رەسپۋبليكاعا بەلگىلى عالىم، ۇلاعاتتى ۇستاز، بىلىكتى باسشى رەتىندە تانىلعان ازامات. ول بۇگىنگى كۇنگە دەيىن 200-دەن اسا عىلىمي ماقالالارى مەن كىتاپتارى جارىق كوردى. «التاي-ەرتىس كىتاپحاناسى» ايدارىمەن شىعىس وڭىرىندە تۋعان قالامگەرلەردىڭ كىتاپتار توپتاماسى 2012 جىلدان بەرى شىعىپ كەلەدى. بۇگىنگى كۇنگە دەيىن 57 اۆتوردىڭ كىتابى جارىق كورگەن بۇل توپتاماداعى ا.ەسپەنبەتوۆ ەڭبەكتەرى ەكى تومدىق جيناق بولىپ شىقتى.

جيناقتىڭ ءبىرىنشى تومىنداعى مونوگرافيا ۇلى اقىن ابايدىڭ سوزدەرىن ويلارىنا سەرىك ەتكەن شاكارىم قۇدايبەردىۇلى مەن سۇلتانماحمۇت تورايعىروۆ شىعارماشىلىعىنا ارنالعان. ەكىنشى تومداعى زەرتتەۋلەر ابايتانۋ، الاشتانۋ تاقىرىپتارى جانە عالىمنىڭ ۇستازدارى مەن تۇستاستارىنا ارنالعان. ا.ەسپەنبەتوۆتىڭ ەكى تومدىق شىعارمالار جيناعى – كوتەرىلگەن عىلىمي ماسەلەلەرىنىڭ وزەكتىلىگى مەن اۋقىمدىلىعى، قۇندى دەرەكتەردى ۇقىپتى تەكسەرۋ، مۇراعات دەرەكتەرىن بايىپپەن تالداۋعا ارنالعان ادەبيەتتانۋداعى تولىمدى ەڭبەك.

كەشتە ا.ەسپەنبەتوۆتىڭ جارىققا شىققان ەڭبەگى تۋرالى شاكارىم اتىنداعى سەمەي مەملەكەتتىك ۋنيۆەرسيتەتىنىڭ «شاكارىمتانۋ» ورتالىعىنىڭ ديرەكتورى، ف.ع.ك. ا.سماعۇلوۆا، م.قوزىباەۆ اتىنداعى تاريحي-الەۋمەتتىك زەرتتەۋ ورتالىعىنىڭ ديرەكتورى، ت.ع.ك. م.كارىموۆ بايانداما جاساپ، «اباي قورى» پرەزيدەنتى و.كارىبجانوۆ، شاكارىم اتىنداعى سەمەي مەملەكەتتىك ۋنيۆەرسيتەتىنىڭ جوعارعى وقۋ ورنىنا دايارلاۋ ورتالىعىنىڭ ديرەكتورى، م.ع.ك.، دوتسەنت ە.ەسەنجولوۆ، سەمەي قالاسى اكىمى اپپاراتىنىڭ باسشىسى ش.جۇماقسانوۆ، قازاق يننوۆاتسيالىق گۋمانيتارلىق-زاڭ ۋنيۆەرسيتەتىنىڭ وقىتۋشىسى، ف.ع.ك. ر.مۇقاجانوۆا، م.اۋەزوۆ اتىنداعى پەداگوگيكالىق كوللەدج ۇجىمى اتىنان ءۇ.ءشارىپوۆا، عالىمنىڭ ۇستازى ح.سىدىقوۆ ءوز پىكىرلەرىن ءبىلدىردى. سونىمەن قاتار سەمەي قالاسىنىڭ اقىندار ورتالىعىنىڭ جەتەكشىسى د.ومارباەۆا جانە جاس اقىندار ىستىق لەبىزدەرىن ولەڭمەن جەتكىزدى. كەشكە قالامىزدىڭ زيالى قاۋىم وكىلدەرى، جوعارى وقۋ ورىندارىنىڭ وقىتۋشىلارى، مەكتەپ ۇستازدارى مەن ستۋدەنتتەر قاتىستى. كەشتى قالالىق مادەنيەت ءۇيىنىڭ ءانشىسى ن.يمانباەۆ، ءا.قاشاۋباەۆ اتىنداعى سەمەي فيلارمونياسىنىڭ انشىلەرى ب.تۇكتىباەۆ، ق.ورالباەۆ، كۇيشى ا.مىرزاحانوۆ انمەن كوركەمدەدى.

ابايدىڭ مەملەكەتتىك قورىق-مۇراجايىنىڭ ۇجىمى اتىنان ەستەلىككە مۇراجاي قورىنان سىي تارتۋ ەتىلدى.

اباي-اقپارات.