جۇما, 29 ناۋرىز 2024
46 - ءسوز 6979 0 پىكىر 25 قاڭتار, 2015 ساعات 11:40

داۋرەن قۋات. «ءوي ءبىر "قىرت" ەكەنسىز...»

اتىراۋدا "التىن وردا" گازەتىن شىعارىپ جۇرگەن كەزىم. ءبىر كۇنى تۇندە تولەن - تالعات ەشەنۇلى قوڭىراۋ شالىپ: "ساعان قازىر ءبىر كەرەمەت اقىن  ولەڭىن وقيدى", - دەدى دە، تەلەفون تۇتقاسىن ماعان بەيتانىس جىگىتكە بەرە قويدى. الگى جىگىت امان جوق، سالەم جوق، دۇركىرەتىپ ولەڭىن وقي جونەلدى. شىنىمدى ايتسام، ۇناتپاي، قابىلداي الماي، قيتىعىپ ارەڭ تۇردىم. بىراق "...ەنتىككەن ورماندارداي" دەپ كەلەتىن ۇيقاس جولىن ۇستاپ قالىپپىن. ۇناعانداي بولدى. الايدا، "ناحالدىعىن" اسا جاقاتپادىم. الماتىعا ساپارمەن كەلگەنىمدە كەزدەستىم. كەزدەسىپ، تانىسقان بەتتە ءىشىم جىلىپ سالا بەردى. ناعىزدىڭ ءوزى ەكەن. "يديوت". كۇلدىرىپ-ءبۇلدىرىپ سويلەمەسە وتىرا المايتىندىعى ءتىپتى قىزىقتىردى. اقجارقىن. سالدىر-سالدىر ەتەدى. سوندا دا قيتىعىنا ءتيىپ قويعاندى ءجون كوردىم (ەسە قايتارۋىم كەرەك ەمەس پە؟ ويتكەنى ول ماعان ءتۇن جارىمىندا داڭعىرلاپ ولەڭ وقىپ، مازامدى الدى) دە: "اقبەرەن، بىلەسىڭ بە؟ ناعىز اقبەرەن اقىن ماحامبەت قوي" دەدىم. "اباي شە؟" دەدى ول سىلكىنىپ. "اباي دا اقىن. بىراق ماحامبەت اباي سياقتى جيدەبايدىڭ باسىندا ء"جيدىپ" وتىرا الماس ەدى ءبارىبىر". اقبەرەننىڭ ءجۇزى الاۋلاپ كەتتى. كەيىن جاقىن ءبىلىسىپ، قاتار جۇرگەن كۇندەردىڭ بىرىندە الگى اڭگىمە ارامىزدا قايتادان ءوربي قالدى. 

- سوندا ءسىز ماحامبەتتى ابايدان جوعارى قوياسىز با؟
- جوق، اقوش، ءبىرىن بيىكتەتىپ، ءبىرىن الاسارتۋعا بولمايدى.
- ءسىز ءسويتتىڭىز عوي.
- سەنى سويلەتۋ ءۇشىن قىرتا سالعانىم ەمەس پە؟))
- ءوي ءبىر "قىرت" ەكەنسىز عوي. حاحاحاحا!
ول راحاتتانىپ كۇلىپ جىبەردى. جان سارايى كەڭىپ، كوڭىلى ءوسىپ قالعانداي مەرەيلەندى. سوسىن "باسە-باسە" دەي بەردى.
سول 2006-2007 جىلداردان بەرى قاراي بىرگەمىز. ول قازىر مەنىڭ تۋعان ىنىمدەي بولىپ كەتتى. ەركەلەتەمىن، كەيدە دىڭكىلدەپ ۇرىسىپ تا الامىن. جاقسى كورگەندىكتەن، ارينە. 
ىلگەرىدە، تانىستىعىمىز ەندى باستالىپ كەلە جاتقان جىلدارى، ونى ماعان جاماندايتىندار دا بار ەدى: "تىم پىسىق بالا، جۇزىكتىڭ كوزىنەن وتەدى، ت.ب." دەپ. تەگىندە ءوز باسىم بىرەۋ تۋرالى بىرەۋدىڭ ايتقانىنا قاراپ وي تۇيۋدەن اۋلاقپىن. اقوش تۋراسىنداعى "تۋ-تالاقاي" سوزدەرگە دە قىڭباعانىم سوندىقتان. كەرىسىنشە، وعان جانتارتىپ جاقىنداي ءتۇستىم. اقوش ەكەۋمىزدىڭ جاقىنداسىپ كەتكەنىمىز سونشالىقتى، ادەبيەت، قوعام تۋرالى ويلاردان ويىسىپ، ءوزىمىز باسىپ وتكەن ءومىر وتكەلەكتەرىن دە ەمەن-جارقىن اڭگىمەلەرىمىزگە وزەك ەتەتىن بولدىق. مەن سوندا اقبەرەن كەشكەن تاعدىردىڭ تۇياققاپتى تۇستارىن كوبىرەك ءبىلىپ قالدىم. "بولماعان بالالىق شاقتاعى" دارمەنسىز ۇرپەكباس بالانى كوردىم. سول بالانىڭ جاسىماي، سىنباي ەر جەتكەنىنە تاسىندىم. بۇل كۇندە اقبەرەن دەگەن جۇرت تانىعان اقىن، دىڭداي ازامات. اينالاسىنداعى قۇربى دوستارى قانداي! پاسسيونارلىق رۋحتاعى ازاماتتار ءبارى. امان بولىڭدار! اقوش، سەنىڭ شىعارماشىلىعىڭدى تالاسبەك اعاڭ قالاي تانىدى، قالاي باعالادى؟! سونى ۇمىتپا. ۇلى ادامنىڭ ىقىلاسى ساعان بەكەرگە اۋماسا كەرەك. "اباي.كز" پورتالىنىڭ شاڭىراعىن كوتەرىسىپ، ۋىعىن شانشىعاننىڭ ءبىرى ءوزىڭ ەدىڭ، قازىر "ۇلتتىڭ" ءسوزىن ۇستاپ وتىرسىڭ. يىعىڭداعى ءزىل باتپان جۇكتى جۇدەمەي، ارىپ-اشىماي كوتەرە ءبىل. تالانتتى باۋىرىمسىڭ. تالانت دەگەن ءتاڭىردىڭ سەنىمى. ول سەنىمدى اقتاي ءبىلۋ كەرەك. جۇلدىزىڭ جانسىن!

بالاقاي اقبەرەن. "بولماعان بالالىق شاقتىڭ" كەيىپكەرى كەزى.

(جازبا اۆتوردىڭ facebookتەگى پاراقشاسىنان الىندى)

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3544