بىلىسبەكوۆ مىرزانىڭ ايتۋىنشا، ەلىمىزدە جاڭا راديكالدى توپتاردىڭ پايدا بولۋىنا ءام قالىپتاسۋىنا ءدال وسى سالافيلىك اعىم سەبەپكەر بولىپ وتىر.
"اۋەلى ەكستريميستىك يدەولوگيانىڭ تارالۋ بازاسىن جويۋ كەرەك. كوبىنە كوپ بۇل - جاڭا راديكالدى توپتاردىڭ قۇرىلۋىنا سەبەپكەر بولىپ وتىرعان - سالافيلىك اعام بولىپ وتىر", - دەدى بىلىسبەكوۆ مىرزا ۇكىمەت وتىرىسىندا.
باس سالىپ قاماي بەرگەننەن گورى كەرى ناسيحات جۇمىستارى (كونرتپروپوگاندا) تيىمدىرەك بولادى.
"2016 جىلى پروفيلاكتيكا جۇمىستارى كەزىندە ءداستۇرلى ەمەس ءدىني اعىمداردىڭ 32,1%-ى انىقتالدى. جالپى العاندا مەملەكەتتىك باعدارلاما اياسىندا جات اعامدا جۇرگەندەردىڭ 90,7%ى انىقتالدى", - دەيدى ۇقك توراعاسىنىڭ ورىنباسارى نۇرعالي بىلىسبەكوۆ مىرزا.
ەل اراسىندا ءداستۇرلى دىننەن بەزىپ، اقيقاتتى الىستان ىزدەگەندەردىڭ ىشىندە ءدال وسى سالافيلىك اعىم وكىلدەرى تۋرالى الىپ-قاشپا اڭگىمە كوپ ەكەنى امبەگە ايان.
بىلىسبەكوۆ مىرزا كەلتىرگەن دەرەكتەردەن كوزىمىز شالىپ قالعانى - حالىقارالىق تەرروريستىك شارالارعا، سوعىسقا قاتىسپاق بولعان 91 قازاقستاندىق قۇرىقتالىپتى.
شەتەلگە ءدىني ساۋات اشۋعا كەتكەن 81 ستۋدەنت تە ەلگە قايتارىلعان.
"ەسەپتىك كەزەڭدە انىقتالعانداي، ەلىمىزدە جاسالماق بولعان 12 تەرروريستىك اكتىنىڭ جول كەسىلگەن. قۇزىرلى ورگانداعىلار 123 راديكالدى تەمىر تورعا توعىتتى", - دەيدى بىلىسبەكوۆ مىرزا ءوز بايانداماسىندا.
وكىنىشكە وراي، الماتى مەن اقتوبە قالالارىندا بولعان شەتىن وقيعالاردىڭ الدى الىنباعانى جانە بۇل قىرعىنعا سالافيلىك اعىمنىڭ قاتىسى بارى تاعى دا راستالدى.
بىلتىرعى الماتىداعى اتىستى جاساعان كۇلىكباەۆ قامالدى دەسەك تە، ەلدەگى جالعىز تەرروريست ول ەمەس-ءتى.
قر مادەنيەت جانە سپورت مينيسترلىگىنە قاراستى ءدىن ىستەر كوميتەتىنىڭ توراعاسى عالىم شويكيننىڭ ايتۋىنشا، قازاقستانداعى سالافيتتەردىڭ سانى 15 مىڭ ادامعا جەتكەن.
اسىرەسە، الەم جۇرتى يسلام ءدىنىن تەرروريزمگە تەلىپ جۇرگەندە، بوتەن اعىمداعىلاردىڭ بۇلىگى ءورشي ءتۇستى.
سالافيزمگە مەملەكەت تاراپىنان قۇقىقتىق توقتاۋلار سالىنۋ كەرەك دەيمىز ءبىز. الايدا، بۇگىنگى سالافيزم تىكەلەي مەملەكەتتىك قۇرىلىمدارمەن سىبايلاسىپ كەتتى دەگەن سىبىستار ءجيى ايتىلادى.
جوعارىدا اتالعان تەراكتىلەردىڭ ارتىندا سالافيزم باعىتىن ۇستانۋشىلار تۇرعانىن مەملەكەت باسشىسى نۇرسۇلتان نازارباەۆتىڭ ءوزى ايتقان بولاتىن. سالافيلىك نەمەسە ۋاحابيلىك سەكىلدى كەيبىر راديكالدى ۇيىمدارعا ءالى كۇنگە دەيىن مەملەكەت تاراپىنان تىيىم سالىنباي كەلەدى. مۇنىڭ سەبەبى نەدە؟
اراب ءتىلىن شالا-شارپى بىلەتىندەر دىنتانۋشىعا اينالعان زاماندا قازاقى ۇلتتىق قۇندىلىقتارىمىزدىڭ ءبارىن جوققا شىعارۋعا تىرىسىپ «شيرك»، «سەرىك قوسۋ» تاعى بەردەمەلەر دەيتىندەر، تەحنولوگيالىق جەتىستىكتەردىڭ ءوزىن ىسىرىپ تاستاپ، جۇرتتى ورتا عاسىرلىق فەوداليزمگە قاراي كەرى بۇرىپ اكەتۋ ءۇشىن جانۇشىراتىن شولاق دامبالدى دىنشىلەرگە رەسمي ورگان تىيىم سالۋعا مىندەتتى ەمەس پە؟ ەندەشە نەگە ءالى كۇنگە زاڭ جوق؟
نۇرگەلدى ابدىعانيۇلى
Abai.kz
