19 ساۋىردە نۇرسۇلتان نازارباەۆ پرەزيدەنت جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانى قۇرۋ تۋرالى جارلىققا قول قويدى. رۋحاني جاڭعىرتۋ بويىنشا باعدارلامانى ىسكە اسىرۋ جونىندەگى ۇلتتىق كوميسسيانى باسقارۋ ادىلبەك جاقسىبەكوۆكە تاپسىرىلدى. ادىلبەك رىسكەلدىۇلى ءبىر اي بۇرىن كونستيتۋتسيالىق رەفورمالار بويىنشا كوميسسيانى باسقارىپ، ناتيجەلى جۇمىس جۇرگىزگەن بولاتىن. جاقسىبەكوۆ باستاعان كوميسسيا كونستيتۋتسيانىڭ 91-بابىنىڭ 2-تارماعىنىڭ رەداكتسياسىنا مەملەكەتتىڭ تاۋەلسىزدىگىن، رەسپۋبليكانىڭ بىرتۇتاستىعى مەن اۋماقتىق تۇتاستىعىن وزگەرتۋگە تيىم سالاتىن تولىقتىرۋلاردى ەنگىزىپ، پارلامەنتتەن وتكىزىپ، ول رەداكتسيانى پرەزيدەنت قولداپ، قولىن قويعان بولاتىن. ادىلبەك جاقسىبەكوۆ مەملەكەتشىل تۇلعا ەكەنىن پرەزيدەنت اپپاراتىنىڭ قىزمەتكەرلەرى، ءار جىلدارى ونىڭ قول استىندا قىزمەت ەتكەن ارىپتەستەرى ايتىپ تا جۇرەدى. جاقسىبەكوۆ مەملەكەتتىك ماڭىزدى ماسەلەلەر بويىنشا وتە ءپرينتسيپشىل بولىپ كەلەتىنىنىڭ تاعى ءبىر مىنا فاكت كورسەتەدى. 2008 جىلدىڭ اياعىندا جاقسىبەكوۆ رەسەي فەدەراتسياسىنا ەلشى بولىپ تاعايىندالعان كەزدە، كرەملمەن كەلىسسوز جۇرگىزۋ، رەسەي الدىندا ۇلتتىق مۇددەنى قورعاۋدىڭ ديپلوماتيالىق اۋىر جۇگىن ارقالاۋ ادىلبەك رىسكەلدىۇلىنىڭ موينىنا ءتۇستى. دەگەنمەن، بۇل ديپلوماتيالىق جۇمىستى ابىرويمەن اتقارىپ جۇرگەن ونى، قورعانىس ءمينيسترى ەتىپ تاعايىندادى. جاقسىبەكوۆ قورعانىس مينيسترلىگىندە دە ۇلكەن جۇمىس اتقارىپ، قازاقستاننىڭ تاريحىندا تۇڭعىش جاۋىنگەرلىك پاراد ۇيىمداستىرىپ، قازاق قارۋلى كۇشتەرىنىڭ الەۋەتىن، دايىندىعىن پاش ەتتى. بۇل جاۋىنگەرلىك پارادتى جەرىمىزگە كوز الارتىپ وتىرعان كۇشتەرگە سەس كورسەتۋ ءۇشىن ۇيىمداستىرىلعانىنىڭ سول كەزدە ساراپشىلار ايتىپ، قوعام جاقسى قابىلداعانى بەلگىلى. جاقسىبەكوۆ جوعارعى دەڭگەيدەگى مىقتى ساياسي ۇيىمداستىرۋشى رەتىندە پرەزيدەنتتىڭ ءار تاپسىرماسىن مۇقيات ورىنداي بىلەتىن تۇلعا. رۋحاني جاڭعىرتۋ بويىنشا باعدارلامانى ىسكە اسىرۋ جونىندەگى ۇلتتىق كوميسسيانى جاقسىبەكوۆتىڭ باسقاراتىنى - بۇل باعدارلامانى ىسكە اسىرۋدا ناقتى تەتىكتەرىدىڭ ىسكە قوسىلعانىن بىلدىرەدى. ادىلبەك جاقسىبەكوۆ قازاق قوعامى اراسىندا اسا قاتتى تانىلماسا دا، قازاق مەملەكەتىنىڭ ۇلتتىق مۇددەسىنە «ۇندەمەي ءجۇرىپ ءىس تىندىراتىن ىسكەرلىك قاسيەتى» ونى ساياسي وليمپ بيىگىندە ۇنەمى تانىمال ەتىپ ۇستايدى. پرەزيدەنتتىڭ دە جاقسىبەكوۆكە سەنىم ارتىپ وتىرعان سىرى وسىندا جاتىر.

نۇرعالي نۇرتاي

دەرەككوزى: Qamshy.kz