جيىرما تاجىك ءجۋرناليسى شەتەلدەن باسپانا سۇرادى
جيىرما تاجىك ءجۋرناليسى ءتۇرلى سەبەپتەرمەن، سونىڭ ىشىندە بيلىكتىڭ قىسىمىمەن ەلدەن كەتكەن. تاجىكستان ايەل جۋرناليستەرى كواليتسياسىنىڭ باسشىسى مۋحايو نوزيموۆا 3 مامىردا باق وكىلدەرى اراسىندا جۇرگىزىلگەن زەرتتەۋ قورىتىندىسىن جاريالادى.
نوزيموۆانىڭ حابارلاۋىنشا، شەتەلدەگى جۋرناليستەرگە دە حابارلاسىپ، ولاردىڭ ەلدەن كەتۋ سەبەپتەرىن سۇراعان. ء"تۇرلى سەبەپتەر ايتىلدى - بيلىك قىسىمى، ءسوز بوستاندىعىنىڭ جوقتىعى، باق قوجايىندارىنىڭ جۋرناليستەردى قولداماۋى، مەديا وكىلدەرىن قورعاۋ ينستيتۋتىنىڭ جۇمىس جاساماۋى، جالاقىنىڭ ازدىعى", - دەدى ول.
"جۋرناليستەردى بىرەۋدى قارالاۋ ءۇشىن قولداناتىنىن سەزگەندە، جۋرناليستەر وسەك تاراتۋدىڭ قۇرالىنا اينالعاندا، قولدايتىن ادام تابىلماعاندا، تاۋەلسىز باق-تار بيلىكتىڭ باقىلاۋىنا وتكەندە، ءسوز ەركىندىگى تۋرالى ايتۋ ورىندى ما؟" - دەدى نوزيموۆا.
كەزدەسۋگە قاتىسۋشىلاردىڭ كەيبىرى جوعارىدا اتالعان سەبەپتەر شىندىققا جاناسپايدى دەپ ەسەپتەيدى. "ميللات" تاۋەلسىز گازەتىنىڭ باس رەداكتورى ادولات ميرزونىڭ ايتۋىنشا، شەتەلدەن باسپانا سۇراعان تاجىك جۋرناليستەرى جۇمىسسىز قالعان سوڭ، باسقا ەلدەرگە كوشۋدى ءجون كورگەن.
اباي-اقپارات
