كاسىپوداق جارعىسىن جانە كاسىپوداق قۇرىلىمىن وزگەرتۋ تۋرالى ۇسىنىسىمىز ءالى قارالماي كەلەدى. قازىر اۋدانداردا، وبلىستا 20-30 جىل بويى تاپجىلماي وتىرعان كاسىپوداق توراعالارى مۇعالىم ماسەلەسىمەن اينالىسپايدى. ولارعا دەگەن سەنىم مۇلدە جويىلعان. تەك اكىمدەر مەن ديرەكتورلاردىڭ «كوسەۋىنە» اينالىپ كەلەدى. سوندىقتان مۇعالىم مارتەبەسىمەن اينالىساتىن ۋاقىت جەتتى.

كەيبىر كاسىپوداقتارعا ءۋاج ايتا باستاساڭىز «ازىن-اۋلاق مۇعالىمدەردەن جينالعان قاراجاتپەن ارەڭ كۇن كورىپ وتىرمىن» دەپ باستايدى اڭگىمەلەرىن. وندايلاردى كاسىپوداققا مۇلدە جولاتپاۋ كەرەك! ارەڭ كۇن كورىپ وتىرعاندار باسقا سالاعا بارىپ جۇمىس جاساسىن. دەگەنمەن بۇگىنگى تاڭدا كاسىپوداقتىڭ وبلىستىق، اۋداندىق سالالارى مۇلدە جۇمىس اتقارمايدى دەۋگە بولادى، باستاۋىش كاسىپوداق ۇيىمى تۋرالى مۇلدە ايتپاي-اق قويايىن. ءتۇرلى كونتسەرت پەن كەرەكسىز سەمينارلار، مەرەكەلىك شارا ۇيىمداستىرۋدان ارىگە بارمايدى.

باسپاسوزدە جاريالانعان تۇركىستانداعى مۇعالىمدەردىڭ جاپپاي سەنبىلىككە شىققانىن وقو كاسىپوداعى، اۋداندىق كاسىپوداق تەرىسكە شىعارىپ، مۇعالىمدەردىڭ سەنبىلىككە، كونتسەرتكە ءوز ەرىكتەرىمەن بارعانىن مالىمدەدى. الەۋمەتتىك جەلىدەگى سول جەردىڭ مۇعالىمدەرىنىڭ جان ايعايىن ولار قايدان ءبىلسىن؟. ءوز ەرىكتەرىمەن، كاستيۋم-شالبارمەن ءجۇرىپ كوشە تازالاعان ادامدى قايدان كوردىڭىزدەر؟! ءوز ەركىمەن تازالايتىن ادام جۇمىس كيىممەن كەلەدى.

ەلىمىزدە كونستيتۋتسيا بويىنشا ءماجبۇرلى ەڭبەككە تىيىم سالىنعان. قازاقستان رەسپۋبليكاسى كونستيتۋتسياسىنىڭ 24-بابى 1- تارماعىنا سايكەس «اركىمنىڭ ەڭبەك ەتۋ بوستاندىعىنا، قىزمەت پەن كاسىپ ءتۇرىن ەركىن تاڭداۋىنا قۇقىعى بار. ەرىكسىز ەڭبەككە سوتتىڭ ۇكىمى بويىنشا نە توتەنشە جاعدايدا نەمەسە سوعىس جاعدايىندا عانا جول بەرىلەدى».

وقو، تۇركىستان قالاسىنداعى ءبىلىم بولىمىنە قاراستى №9 نەكراسوۆ اتىنداعى مەكتەپ-گيمنازياسىنىڭ مۇعالىمىنىڭ سوتتا جەڭىپ تۇرعان شەشىمىنە قاراماستان مەكتەپتىڭ باستاۋىش كاسىپوداق ۇيىمىنىڭ توراعاسى «زاششيتي ناشەگو ديرەكتورا» دەپ قول قويىپ، ءمور باسىپ اكىمدەرگە حات جولداعان. ماسقارا!

كەلەسى جاعداي قىزىلوردا وبلىسى. جاڭاقورعان اۋدانى بەسارىق بەكەتىندەگى №247 مەكتەپتە ورىن الىپ وتىر. بۇل مەكتەپتە ديرەكتور جاپپاي «رەپرەسسيا» جۇرگىزگەن. زاڭدى ورەسكەل بۇزۋعا جول بەرگەن. مۇعالىمنىڭ سىرتىنان «ەڭبەك شارتىن» جاساعان. اتا-انا مەن وقۋشىلارعا ارىز جازدىرعان. بىراق وقۋشىنىڭ «ديرەكتوردىڭ ايتۋىمەن جازدىم، كەشىرىڭىزشى» دەپ ارتىنان ارىزىن قايتارىپ العانىنا قاراماستان مۇعالىمگە قاتاڭ سوگىس بەرىلەدى. بىرنەشە سوگىس بەرىپ، ارتىنشا قىزمەتىنەن بوساتىپ، 6 ساعاتپەن مۇعالىم ەتىپ قالدىرعان. بۇل جاعدايدا دا ءبىزدىڭ قۇقىق قورعاۋشى باستاۋىش كاسىپوداق توراعاسى ديرەكتوردىڭ جانىنان تابىلىپ «زاڭدى» شەشىمدەر شىعارىپ بەرىپ وتىرعان. ازىرگە بۇل ىستەردىڭ الدى سوتتا قارالىپ جاتىر، ارتى سوتقا بەرىپ جاتىر.

كەلەسى جاعداي الماتى وبلىسى قاراساي اۋدانىندا ورىن العان. ديرەكتورمەن بىرىگىپ زاڭسىزدىققا جول بەرىلگەن. ول جاعدايمەن بارلىقتارىڭىز تانىسسىزدار. ارتىنشا كاسىپوداق توراعاسى ورنىنان الىندى. بىراق ونىڭ ورنىنا المالىباق اۋىلدىق وكرۋگىنىڭ اكىمىن توراعا ەتىپ سايلادى! اكىمنىڭ كاسىپوداقتا نەcى بار؟ قانداي قاتىسى بار؟ پەداگوگتار قايدا؟

ەندى بارىپ سول كاسىپوداق ءتورايىمى «مۇعالىمدەردىڭ سەنبىلىككە شىعاتىنىن اۋدان اكىمى بەلگىلەيتىنىن، اۋدان باسشىسىنىڭ بۇيرىعىمەن وتكىزىلەتىنىن» مالىمدەدى. نە بۇل؟ نە ماسقارا؟ بۇل كانديداتتىڭ تىكەلەي ءوتىپ كەتكەنىنە كىنالىلەر جاۋاپقا تارتىلۋى ءتيىس! الماتى وبلىستىق كاسىپوداق توراعاسىن جاۋاپقا تارتۋ كەرەك، توراعالاردىڭ كانديداتۋراسىن قاراعاندا قايدا قاراعان؟ ەندى ول مۇعالىمدەرمەن جينالىس، سەمينار وتكىزۋدىڭ ورنىنا اكىمدەردىڭ جينالىسىندا ءجۇر.

ءاي اينالايىن، كاسىپوداقتى باسقاراتىن حانىمدار مەن مىرزالار! قازىر قانداي عاسىر ەكەنىن جاقسى بىلەسىزدەر. ءبىر اقپارات شىقسا، ول قولما قول رەسپۋبليكا كولەمىنە تارايدى. سونى نەگە ويلامايسىزدار؟ اقشانى ەمەس، ار-مەن ۇياتتى ءبىرىنشى ورىندارعا قويعاندارىڭىز ءجون-اۋ. جالپى مۇعالىمدەردىڭ كاسىپوداققا دەگەن سەنىمدەرى جوعالىپ بارادى. وعان سەبەپ اكەلەرىنەن مۇراعا قالعان ورىنداي ءبىر ورىنعا 20-30 جىلداپ وتىرىپ السا، ولارعا كىم سەنەدى؟! كاسىپوداق توراعالارى 3 جىلعا عانا سايلانۋ كەرەك. 3 جىلدان سوڭ اراسىنا ءبىراز جىلدار قوسىپ، الدىڭعى كاسىپوداقتىڭ توراعا ەتىپ سايلانباۋى كەرەك. جارعىعا كاسىپوداق قۇرىلىمىنا مودەرنيزاتسيا مەن جەتىلدىرۋ ەنگىزۋ كەرەك. كاسىپوداق مەكتەپ ديرەكتورى مەن اكىمنىڭ، اركىمنىڭ قولشوقپارى بولماۋى ءتيىس!

رەسپۋبليكالىق كاسىپوداق وبلىستىق، اۋداندىق، باستاۋىش كاسىپوداق ۇيىمدارىنىڭ توراعالارىنا زاڭدى جاتتاتىڭىزدار. تەست الىڭىزدار، كىتاپتار شىعارىپ بەرىڭىزدەر، ينسترۋكتسيا بەرىڭىزدەر، ايتەۋىر ۇيرەتىڭىزدەر، دۇرىستاپ جۇمىس جاساسىن. قولشوقپار بولعاندى قويدىرىڭىزدار.
قۇرمەتتى ۇستازدار، ەگەر كاسىپوداق سىزدەرگە كومەك كورسەتە الماسا، كوڭىلىڭىزدەن شىقپاسا، جارعىدا مىناداي جولدار بار:

كاسىپوداق – قوعامدىق ۇيىم، ونىڭ قىزمەتى مەنشىكتى جارعىسىمەن رەتتەلەتىن بولعاندىقتان، «قازاقستاندىق سالالىق ءبىلىم جانە عىلىم قىزمەتكەرلەرىنىڭ كاسىپتىك وداعى» قوعامدىق بىرلەستىگى جارعىسىنىڭ 4.11-تارماعىنا سايكەس كاسىپوداق قۇرامىنان باستاۋىش كاسىپوداق ۇيىمىنا جەكە ءوتىنىش بەرۋ ارقىلى كاسىپوداق مۇشەلىگىنەن شىعا الاسىز.

م. تەمىربەك، «اعارتۋشى» قق مۇشەسى

Abai.kz