جاقىندا ءبىر توپ بەلسەندى بالانى سۇندەتكە وتىرعىزۋعا قارسى شىعىپتى. داۋدىڭ باسىندا مۇرات تەلىبەكوۆتىڭ "قازاقستان مۇسىلماندار وداعى" تۇر.

ورىس ءتىلدى ءبىرسىپىرا باق "قازاقستاندا سۇندەتكە وتىرعىزۋعا تىيىم سالۋدى ۇسىندى" دەپ ۇراندادى. سويتسەك، قمو جەتەكشىسى مۇرات تەلىبەكوۆكە ءبىر توپ بەلسەندى كەلىپ، وزدەرىنىڭ ۇسىنىسىن ايتقان. بالانى سۇندەتتەۋ - ادام قۇقىقتارى مەن ابىرويىنا نۇقسان كەلتىرەدى-ءمىس.

اتەيستەردى قازاقستاندىق فەمينيستەر توبى دا قولداپ وتىرعان كورىنەدى.

تەلىبەكوۆ مىرزانىڭ بۇل "جاڭالىعىن" رەسەي مەن قىرعىزستاننىڭ اقپاراتتىق سايتتارى دا جارىسا جازىپ جاتىر. (argumenti.ru, rosbalt.ru, kyrgyztoday.org)

ءبىز داۋلى ۇيىمنىڭ توراعاسى مۇرات تەلىبەكوۆ مىرزاعا حابارلاسىپ، ماسەلەنىڭ ءمان-جايىن سۇرادىق.

- مۇرات مىرزا، سىزدەر سۇندەتتەۋگە تىيىم سالۋ تۋرالى باستاما كوتەرىپ جاتىر ەكەنسىزدەر. سول تۋرالى سويلەسەيىكشى...

- جاقسى، جاقسى.

- قازاقستان مۇسىلماندار وداعى سۇندەتكە قارسى شىعىپتى دەگەن اقپارات جەلىدە گۋلەپ ءجۇر. ءسىز وداقتىڭ توراعاسىسىز. ءوزىڭىز سۇندەتتەلمەپ پە ەدىڭىز؟ كوپتىڭ كوكەيىندەگى ساۋال وسى.

- وسى جەردە مىنانى ايتا كەتۋ كەرەك. قازىر جالپى جۇرتتىڭ، قاراپايىم حالىقتىڭ عانا ەمەس جۋرناليستەردىڭ دە ينتەللەكتۋالدى دەڭگەيى تومەندەپ بارادى. مۇنىڭ سەبەبى نەدە ەكەنى بەلگىسىز. مۇمكىن، ۇلكەن اۋديوۆيزۋالدى اقپاراتتىڭ اعىمى. ميدى جۇمىس ىستەتۋگە، ىزدەنۋگە قاجەتتىلىك جوق.

- وقىعانىمىزدان تۇيگەنىمىز - سىزگە ءبىر توپ بەلسەندى كەلىپتى. ءسىز ولاردى قولداپسىز...

- جوق. مەن ولاردى قولداعان جوقپىن. كەرىسىنشە، ولارعا سۇندەتكە قارسى شىعۋدىڭ دۇرىس ەمەس ەكەنى ايتتىم. ولاردىڭ اداسىپ جۇرگەنىن ايتتىم. وكىنىشكە وراي ويىمدى جەتكىزە الماعان سەكىلدىمىن.

- ولار كىمدەر؟ قاي ۇلتتىڭ وكىلدەرى؟

- مەن ولاردىڭ ۇلتتارىنا ءمان بەرمەپپىن.

- كەشىرىڭىز، بىراق بۇل تۋرالى اقپاراتتاردىڭ بارلىعىندا كەرىسىنشە قازاقستان مۇسىلماندار وداعى قولدادى دەپ ءجۇر عوي.

- راس ايتاسىز. وكىنىشكە وراي قازىر مەنىڭ سوزدەرىمدى بۇرمالاپ، مەنى جاعىمسىز كەيىپتە كورسەتكىسى كەلەتىن ءبىر توپ باق بار. مىنە، سولاردىڭ جاساپ وتىرعان ءىسى.

- ولار ءسىزدىڭ ءسوزىڭىزدى بۇرمالاعان بولسا، قارسى شارا قولدانۋىڭىز كەرەك قوي...

- شىنىندا ولاردىڭ ارقايسىسىمەن سوتتاسىپ جاتۋعا مەندە ۋاقىت تا جوق. ماعان نە كەرەك. ايتىپ، ايتىپ قويادى. ماعان ۋاقىت قىمبات. اقىماقتارعا ۋاقىت جۇمساعىم دا جوق.

- مۇرات مىرزا، ءبىر سۇحباتتا، ءسىز ماعان قمو-دا 500-مىڭنان استام مۇشەمىز بار دەپ ەدىڭىز. ءتىپتى، پرەزيدەنتتىك سايلاۋ كەزىندە ءسىزدى 1 ميلليوننان استام ادام قولداعانىن ايتقانسىز. كورىپ جۇرگەنىمىزدەي، بارلىق اقپاراتتاردا مۇرات تەلىبەكوۆ ءجۇر. باسقا مۇشەلەرىڭىز نەگە ءۇنسىز؟

- جاقسى. باسقالاردى دا ايتايىن. امانباەۆ، سارسەنباەۆ، جەتپىسباەۆ، يۆانوۆ، پەتروۆ، سيدوروۆ ت.س.س. بۇل نەنى وزگەرتەدى؟

- مەيلى. مۇرات مىرزا، سۇحبات بەرگەنىڭىزگە راقمەت!

- وزدەرىڭىزگە دە راقمەت!

نۇرزات توعجان

Abai.kz