الماتى وبلىسىندا جازعى ساۋىقتىرۋ شارالارىنىڭ ءالسىز ۇيىمداستىرىلعانى ءۇشىن ءبىلىم باسقارماسىنىڭ باسشىسى جانە بىرنەشە اۋدان اكىمىنىڭ ورىنباسارلارى ەسكەرتۋ الدى دەپ حابارلايدى Tengrinews.kz. تىلشىسى.

جازعى لاگەرلەردىڭ مەكتەپ وقۋشىلارىن قابىلداۋعا دايارلىعى – جەرگىلىكتى اتقارۋشى ورگانداردىڭ بارومەترى بولىپ تابىلادى دەپ مەكتەپ وقۋشىلارىنىڭ جازعى ساۋىقتىرۋ شارالارىن ۇيىمداستىرۋ بويىنشا وتكەن جيىندا الماتى وبلىسى اكىمىنىڭ ورىنباسارى جاقسىلىق ومار باعا بەردى. ايماقتاردىڭ اتالعان شاراعا دايىندىعى سەلەكتورلىق جيىندا تىڭدالدى. الماتى وبلىسىنىڭ اۋدان جانە قالا اكىمدەرىنىڭ ورىنباسارلارى جازعى ساۋىقتىرۋ شارالارىنا دايىندىقتارى جايىندا جاپپاي ەسەپ بەردى. وبلىستىڭ ءبىلىم باسقارماسى ورىنباسارىنىڭ ايتۋىنشا بيىل مەكتەپ وقۋشىلارىنىڭ دەمالىسى مەن ساۋىقتىرۋ شاراسىن ۇيىمداستىرۋدا 272 616 وقۋشىنى قامتۋ جوسپارلانىپ وتىر. سونىڭ ىشىندە تۇرمىسى تومەن وتباسىلارى مەن مۇمكىندىگى شەكتەۋلى وقۋشىلارعا باسىمدىق بەرىلەتىندىگى ايتىلدى. دەگەنمەن ۇيىمداستىرۋ شارالارىنىڭ دايارلىعىنا قاراماستان پانفيلوۆ، جامبىل، بالقاش اۋداندارى ساۋىقتىرۋ شارالارى بويىنشا تومەن كورسەتكىشپەن تۇر.

الماتى وبلىسى اكىمىنىڭ ورىنباسارى اتالعان جاعدايعا بايلانىستى جەرگىلىكتى اتقارۋشى ورگانداردىڭ دايارلىقتارى ولاردىڭ جۇمىسىنىڭ بارومەترى ەكەندىگى جانە اۋدان، قالا اكىمى ورىنباسارلارى مەن ءبىلىم ءبولىمى قىزمەتكەرلەرىنىڭ دەڭگەيىنىڭ كورسەتەتىنىن باسا اتاپ ءوتتى. سونىمەن قاتار، جاقسىلىق ومار دايىن تۇرعان لاگەرلەردىڭ وزىنەن كەمشىلىكتەر شىعىپ جاتقانىن ايتىپ، نارازىلىعىن ءبىلدىردى.

"بۇگىنگى جيىن بىرنەشە اۋدان اكىمىنىڭ ورىنباسارلارىندا قاجەتتى اقپاراتتار جوقتىعىن انىقتادى.  ال اقپاراتى جوق مامان جاعدايمەن تانىس ەمەس دەگەندى بىلدىرەدى. بۇل تىزىمگە ءوز ىستەرىنە نەمقۇرايلى قاراعان اۋداندارداعى ءبىلىم بولىمدەرىنىڭ باسشىلارىن دا قوسۋعا بولادى.  بىز مۇنى جاي قالدىرا المايمىز. قاجەتتى شارالار قولداناتىن بولامىز", - دەدى وبلىس اكىمىنىڭ ورىنباسارى. جاقسىلىق ومار وقۋشىلاردىڭ دەمالىسىنا بارلىق جاعداي جاسالماي، ەشقانداي لاگەر ىسكە قوسىلمايتىنىن ايتتى. سونىمەن قاتار، 10 ماۋسىم الماتى وبلىسى وقۋشىلارىنىڭ ساۋىقتىرۋىنىڭ بىرىڭعاي كۇنى بولىپ بەكىتىلگەندىگىن اتاپ ءوتتى.

اباي-اقپارات