سۇلەيمەنوۆتىڭ ءتىلى نەگە قىشىدى؟
سىرتتان قارىز الۋعا داندەگەن ۇكىمەتىمىز بۇگىن بەرەشەگىمىزدىڭ قانشاعا جەتكەنىن تاعى ءبىر مارتە ەسىمىزگە سالدى. قر ۇلتتىق ەكونوميكا ءمينيسترى تيمۋر سۇلەيمەنوۆ ۇكىمەت وتىرىسىندا قازاقستاننىڭ قارىزىن جىپكە ءتىزدى. ءمينيستردىڭ ايتۋىنا قاراعاندا، مەملەكەتتىڭ موينىنداعى بەرەشەك 12,3 تريلليون تەڭگەگە جەتكەن. بۇل جالپى ىشكى ءونىمنىڭ 24,6 پايىزىنا تەڭ دەگەن ءسوز.
قازاقتىڭ ءتىلىن ماندىتىپ بىلمەيتىن مينيستر مىرزا 12,3 تريلليون دەگەن سومادان دىم قورىقپايتىنىن، دابىل قاعۋدىڭ قاجەتى جوقتىعىن، بۇل جاعدايدى باسقارۋعا قابىلەتتى ەكەنىن ايتىپ اقتالعان. جالپى، ءبىزدىڭ ەلدە دوللار باعامى وسەردەن بىرەر كۇن بۇرىن "دوللار تۇراقتى بولادى" دەگەن سىڭايدا رەسمي مالىمدەمە جاسالۋشى ەدى. سۇلەيمەنوۆتىڭ كەنەت سىرتقى قارىزدى ءسوز ەتە قالۋىنىڭ استارىندا نە جاتىر. "12,3 تريلليوننىڭ ۇستىنە تاعى جاماۋ جامالادى" دەگەن بەلگى ەمەس پە بۇل؟
ەلباسى قىتايدا ءىس-ساپاردا ءجۇر. وسى جولى كورشىدەن تاعى قارىز الىپ قايتسا، بىلتىرعىداي جەر داۋى قايتادان باستالىپ كەتپەي مە؟ قىتاي بىزگە قارىز بەرسە، ونىڭ وتەۋى وڭاي بولماسى انىق.
سۇلەيمەنوۆ سونداي-اق، مەملەكەت باسشىسىنىڭ جولداۋدا ايتقان ماكروەكونوميكالىق تۇراقتىلىقتى ساقتاۋ تاپسىرماسىنىڭ ورىندالىپ جاتقانىن دا ايتىپ ءوتتى.
"الەمدىك تاۋار جانە قارجى نارىعىندا ساقتالىپ وتىرعان تۇراقسىزدىق ءبىزدىڭ جاساعان بولجامىمىزدى شەكتەۋگە يتەرمەلەپ وتىر. جىلدىڭ باسىنداعى 4 ايدا ەكونوميكادا تىركەلگەن ءوسىم ودان ارى قاراي دا جالعاسا بەرەدى دەپ ايتۋعا بولمايدى. ول ءۇشىن مەملەكەتتىك اپپاراتتىڭ بەلسەندى جۇمىس ىستەۋى كەرەك", – دەدى مينيستر.
بۇل دا ەسى بار جاندى ويعا قالدىراتىن ءسوز. ء"تورت ايداعى ەكونوميكالىق ءوسىم جالعاسپايدى" دەۋدىڭ استارىندا "تاعى قارىز الۋدان باسقا امالىمىز جوق" دەگەن ويدىڭ جاتپاعانىنا كىم كەپىل؟
انشەيىندە جاق اشپاس قر ۇلتتىق ەكونوميكا ءمينيسترى تيمۋر سۇلەيمەنوۆتىڭ ءتىلى نەگە قىشي قالدى؟ كەشە قورعاس كەدەن بەكەتىنىڭ اكتسيالارىن ساتىپ جىبەرىپ ەدىك، بۇگىن، ياكي ەرتەڭ نەمىزدى كورشىلەرگە بەرەر ەكەنبىز؟
ءشارىپحان قايسار
Abai.kz
