"نارتاي دۇتباەۆقا قاتىستى قىلمىستىق ءىستى تەرگەۋ بيىل 4 شىلدەدە اياقتالدى. ءىستى اقمولا وبلىستىق اسكەري گارنيزونى قارادى", - دەپ حابارلادى ۇقك. تەرگەۋ "قۇپيا" گريفىمەن جۇرگىزىلگەن.

ۇلتتىق قاۋىپسىزدىك كوميتەتىن 2001 جىلدىڭ جەلتوقسانىنان 2006 جىلدىڭ اقپانىنا دەيىن باسقارعان دۇتباەۆ 2016 جىلى 26 جەلتوقسانىندا ۇستالدى. سول كۇنى ىستەگى ەكى كۇدىكتى - شەنەۋنىكتەر نۇرلان حاسەن مەن ەرلان نۇرتاەۆ قاماۋعا الىندى. ۇشەۋى دە مەملەكەت قۇپياسىن جاريالاعان، بيلىگىن جانە قىزمەت بابىن اسىرا پايدالانعان دەگەن كۇدىكپەن ۇستالدى.

وتكەن اپتادا حابارلانعانداي، استاناداعى سوت دۋتباەۆ پەن باسقا دا سوتتالۋشىلاردى تۇتقىندا ۇستاۋ مەرزىمىن 26 شىلدەگە دەيىن سوزعان.

Abai.kz