8-قاباتتان قۇلاپ قايتىس بولعان قىز تۋرالى مالىمدەمە
الماتى قالالىق ءىىد-ءنىڭ رەسمي وكىلى سالتانات ازىربەك 8-قاباتتان قۇلاپ قايتىس بولعان تىلەۋگۇل قۋانىشتى ءبىر توپ جىگىت الىپ قاشقان دەگەن اقپاراتتى جوققا شىعاردى.
ەسكە سالايىق، قايعىلى وقيعا 31 شىلدەگە قاراعان ءتۇنى "العاباس" شاعىن اۋدانىندا ورىن العان بولاتىن. 19 جاستاعى تىلەۋگۇل قۋانىش الدىمەن اناسىنا ءوزىن الىپ قاشىپ بارا جاتقانىن جازسا، بىرنەشە ساعاتتان كەيىن جەڭگەسىنە قوشتاسۋ ءماتىنىن جازىپ، سمس-حابارلاما جىبەرگەن.
"قىزدى بىرنەشە ادام الىپ قاشقان دەگەن اقپارات شىندىققا جاناسپايدى. بەينەباقىلاۋ كامەرالارىنىڭ تۇسىرىلىمدەرىن زەرتتەدىك، وندا قىز بەن ءبىر عانا جىگىتتىڭ كوپقاباتتى ۇيگە كىرىپ كەلە جاتقانى انىق كورىنەدى. قازىر ء"وزىن ءوزى ولتىرۋگە يتەرمەلەۋ" دەرەگى بويىنشا قىلمىستىق ءىس قوزعالىپ، سوتقا دەيىنگى تەرگەۋ امالدارى جۇرگىزىلىپ جاتىر، سوت-مەديتسينالىق ساراپتاما تاعايىندالعان", - دەدى س.ازىربەك.
ال، قىزبەن بىرگە بولعان جىگىتتى پوليتسەيلەر قازىر تەرگەۋ ۇستىندە. تەرگەۋ مالىمەتتەرى قۇپيا بولعاندىقتان، ءىستىڭ انىق-قانىعى ازىرگە ايتىلمادى. ەگەر قىزدىڭ ولىمىنە بىرگە بولعان جىگىتتىڭ قاتىسى بار ەكەنى انىقتالسا، ول سوت شەشىمىمەن قاماۋعا الىنۋى مۇمكىن.
اباي-اقپارات
