اتامباەۆ بيلىگى تەكەباەۆتان جەڭىلدى

كوپ جۇرت قىرعىزدىڭ كەلەسى پرەزيدەنتى ومىربەك تەكەباەۆ بولادى دەپ بولجاپ جۇرگەن. كۇنى كەشە عانا قىرعىز سوتى ومىربەك تەكەباەۆ پەن دۇيشەنقۇل چوتونوۆقا 8 جىلدان ۇلەستىرىپ بەردى.

16 تامىزدا بىشكەكتەگى ءبىرىنشى ماي اۋداندىق سوتىنىڭ سۋدياسى ايبەك ەرنيس ۋلۋ قىرعىزستانداعى وپپوزيتسيالىق ساياساتكەر، "اتا مەكەن" پارتياسىنىڭ جەتەكشىسى ومىربەك تەكەباەۆ پەن قىرعىزستاننىڭ وڭتۇستىك كورەياداعى بۇرىنعى ەلشىسى دۋيشەنكۋل چوتونوۆ سەگىز جىلعا سوتتالدى. سۋديا جەمقورلىق ايىبى تاعىلعان ەكى سوتتالۋشىنىڭ دا دۇنيە-مۇلكىن تاركىلەۋ جانە جازالارىن وتەپ بولعاسىن ءۇش جىل مەملەكەتتىك قىزمەتتەن شەتتەتۋ تۋرالى شەشىم شىعاردى.

(ومىربەك تەكەباەۆتىڭ الماسبەك اتامباەۆقا قاراتا ايتقانى)

10 تامىزدا مەملەكەتتىك ايىپتاۋشىلار ومىربەك تەكەباەۆتى 10 جىلعا، دۋيشەنكۋل چوتونوۆتى سەگىز جىلعا سوتتاۋدى سۇراعان.

ومىربەك تەكەباەۆ بيىل 26 اقپاندا ۇستالىپ، قىرعىزستاننىڭ مەملەكەتتىك ۇلتتىق قاۋىپسىزدىك كوميتەتىنىڭ اباقتىسىنا جابىلعان. پرەزيدەنت المازبەك اتامباەۆتىڭ نەگىزگى سىنشىسى رەتىندە تانىلعان تەكەباەۆتىڭ ۇستىنەن ءىس قوزعاۋعا رەسمي تۇردە رەسەيلىك ەكى ازاماتتىڭ ارىزى سەبەپ بولعان. الەكسەي مودين مەن لەونيد ماەۆسكي دەلدال ارقىلى ومۋربەك تەكەباەۆقا ءبىر ميلليون اقش دوللارىن بەرىپ، "مەگاكوم" كومپانياسىنىڭ اكتسيالارىن العاندارىن مالىمدەگەن.

تەكەباەۆ وزىنە تاعىلعان ايىپتى جوققا شىعارىپ، ەلدە بيىل كۇزدە وتەتىن پرەزيدەنت سايلاۋى الدىندا ساياسي قۋدالاۋعا ۇشىراعانىن ايتادى. تەرگەۋ ورگاندارى قىلمىستىق ءىستىڭ ناقتى ايعاقتار نەگىزىندە قوزعالعانىن مالىمدەپ كەلەدى.

ءجا، قىرعىزداعى ساۋاتتى ساياساتكەرلەردىڭ دەنى دەرلىك ومىربەك تەكەباەۆ پەن دۇيشەنقۇل چوتونۆوقا تاعىلعان ايىپتارمەن كەلىسپەيتىنىن اشىق ايتىپ جاتىر.

ەكس-پرەزيدەنت روزا وتىنباەۆ باستاعان ساياساتكەرلەر بۇل سوتتى "ۇر دا جىق سوت بولدى" دەپ باعالادى.

راسىندا قىرعىز ساياساتىندا شيرەك عاسىردان بەرى جۇرگەن وپپوزيتسيا ليدەرى ومىربەك تەكەباەۆ قىرعىز پارلامەنتىندە دەپۋتات، ۆيتسە-سپيكەر دە بولعان.

2010 جىلعى توڭكەرىستەن كەيىن 40-قا جۋىق ازامات ۋاقىتشا وكىمەت قۇرىپ، ونىڭ باسىندا روزا وتىنباەۆ، المازبەك اتامباەۆ، ومىربەك تەكەباەۆتار بولدى.

ومىربەك تەكەباەۆتىڭ ءوزى بولسا، بۇل اتامباەۆتىڭ تاپسىرىسى بويىنشا جۇزەگە اسىرىلعان سوت دەگەندى ايتتى.

باسقا باسقا ەمەس، قىرعىز ساياساتكەرلەرىنىڭ پىكىرى تومەندەگىدەي بولدى:

روزا وتىنباەۆا، ەكس-پرەزيدەنت:

-ءبىز ادىلدىك ءۇشىن كۇرەسىپ كەلەمىز. ومىربەك تەكەباەۆ ناعىز دەموكراتيالىق قوعامدى قۇرۋشى كۇرەسكەر. ومىربەك تەكەباەۆتى ەشبىر دالەلسىز، جالاڭ ايىپپەن سوتتاپ جىبەرۋدەن ساياسي استار بايقالادى. بۇلاي بولماۋى ءتيىس ەدى.

سادىق شەرنياز، جوعارقى كەڭەس دەپۋتاتى:

-ومىربەك تەكەباەۆ شىندىق ءۇشىن كۇرەسىپ جۇرگەن ازامات. ناعىز دەموكرات. ول كىسى ءدال وسى سوت جۇيەسىن رەفورمالاۋدى باستاعان. بۇگىن تەكەباەۆتى سوتتادى. جۇرت تىنىش وتىر. قىرعىز زيالىلارى نەگە ءۇن شىعارمايدى. سەبەبى، ۇندەمەسە مەدال، وردەن الادى. ۇندەمەسە بالاسى قىزمەتكە تۇرادى. ءسويتىپ. ۇندەمەي وتىرا بەرەيىك. ەرتەڭ بۇلار سەنى مەن مەنى سوتتاپ جاتقاندا دا جۇرت ۇندەمەيتىن بولادى.

كەنەشبەك دۇيشەباەۆ، ۋاقىتشى ۇكىمەتتىڭ مۇشەسى، گەنەرال-لەيتەنانت:

-بۇگىنگى بولعان جايت وتە وكىنىشتى. ءبىز مۇندايدى مۇلدە كۇتپەدىك. وسىدان 7 جىل بۇرىن ءبىز بۇل ءۇشىن كۇرەسكەن جوقپىز.

ءسويتىپ، تەكەباەۆتىڭ سوتى - قىرعىز تاريحىندا انتي-دەموكراتيالىق ءام ۇر دا جىق سوتتىڭ ناعىز ۇلگىسىن كورسەتتى. ءبىر انىعى - ومىربەك تەكەباەۆ قىرعىزداعى پرەزيدەنت سايلاۋىنىڭ ەڭ باستى ۇمىتكەرى ەدى.

ايتپاقشى، ومىربەك تەكەباەۆ قاماۋعا الىنعان ۋاقىتتان بەرى قىرعىزستاندا بىرنەشە ميتينگ ءوتتى. بارلىعىندا دەرلىك تەكەباەۆتى بوساتۋدى تالاپ ەتكەن ۇراندار ەستىلدى.