دەلي اۋەجايىندا 1 ملن دوللارمەن قىرعىز ازاماتى ۇستالدى
ءۇندىستاننىڭ دەلي اۋەجايىندا 1 ملن دوللاردان استام قولما-قول اقشاسى بولعان قىرعىز ازاماتىن ۇستاعان. بۇل جونىندە ءۇندىستاننىڭ Business-standart.com, Tribuneindia.com سايتتارى حابارلاپ جاتىر.
باق تاراتقان مالىمەتكە قاراعاندا، نيۋ-دەلي اۋەجايىندا ۇستالعان ايەل "Air Manas" رەيسىمەن بىشكەككە ۇشپاق بولعان. وندا ۇستالعان ازاماتتىڭ اتى-ءجونى زۋحرا بالتاباەۆا 56 جاستا ەكەنى ايتىلعان.
ءۇندىستان باسىلىمدارىنىڭ جازۋىنشا، تەكسەرۋ كەزىندە ايەلدىڭ قول سومكەسىندە 60 مىڭ دوللار بولعان. ال جول جۇگىن تەكسەرگەندە 1 ملن 41 مىڭ 290 دوللار شىققان.
قازىرگى كەزدە ءۇندىستاننىڭ كەدەن قىزمەتى بۇل ءىستى تەكسەرىپ جاتقانى حابارلانعان. ۇندىستانداعى قىرعىزستان ەلشىلىگى بۇل جايىندا ازىرگە تۇسىنىكتەمە بەرمەدى. قىرعىزستاننىڭ سىرتقى ىستەر مينيسترلىگى اقپارات تەكسەرىلىپ جاتىر دەيدى.
Abai.kz
