"سوت باس پروكۋراتۋرانىڭ "سەنتيابر" تەلەارناسىنا شاعىمىن قاراپ، 2016 جىلدىڭ 29 قىركۇيەگىندە ەفيردەن ەكسترەميستىك پيعىلداعى حابارلار كەتكەنىن راستايدى. تەلەارنامەن قوسا، www.september.kg" سايتىنىڭ جۇمىسىنا دا تىيىم سالىنسىن، - دەپ جاريالادى سۋديا جۇلدىز جۇماباەۆا.

ءابدىلدا قاپاروۆ تىكەلەي ەفيردەن اراۆاندا مەكتەپتىڭ اشىلۋى كەزىندە وزبەكستان ءانۇرانىنىڭ ورىندالۋىن ۇلتارازدىق الاۋىزدىق تۋعىزدى دەپ مالىمدەگەن. ول ەفيردە 2010 جىلى ماۋسىم وقيعاسى كەزىندە تۇراقتىلىقتى ساقتاۋعا بولىنگەن 3 ملن دوللاردى جىمقىردى دەپ سوورونباي جانە اسىلبەك جەەنبەكوۆتەردى ايىپتاعان. وسىدان كەيىن باس پروكۋراتۋرا بۇل حابارعا قاتىستى سوتقا ارىز تۇسىرگەن.

تەلەارنا باسشىلىعى سوتتىڭ شەشىمىمەن كەلىسپەيتىنىن ايتىپ، جوعارى ينستانتسيالارعا شاعىمداناتىنىن مالىمدەدى.

قازىرگى ۋاقىتتا وش وبلىستىق ىشكى ىستەر باسقارماسىنىڭ بۇرىنعى باسشىسى ءابدىلدا قاپاروۆ نارىن قالاسىنداعى جالپى قونىستانۋ مەكەمەسىندە جازاسىن وتەپ جاتىر. ول وش وبلىستىق سوتتىڭ شەشىمىمەن بيىل 21 ماۋسىمدا اعايىندى جەەنبەكوۆتەردىڭ ابىرويىنا نۇقسان كەلتىردى دەپ ايىپتالىپ، 4 جىلعا سوتتالعان.

"سەنتيابر" تەلەارناسى "اتا مەكەن" پارتياسىنىڭ جەتەكشىسى، وپپوزيتسيالىق ساياساتكەر ومىربەك تەكەباەۆقا تيەسىلى. ول تاياۋدا "جەمقورلىق" بابىمەن 8 جىلعا سوتتالدى.

Abai.kz