تەلەكورەرمەندەر ءۇشىن جاعىمدى جاڭالىق. تاياۋ كۇندەرى، انىعىن ايتساق، 26-قاراشادا  «جەتىنشى» ارنا ەفيرىنەن جاستارعا ارنالعان جاڭا جوبا «جار-جار» تەلەكلۋبى جارىققا شىقپاق. اتالعان باعدارلامانىڭ پروديۋسەرى  - تەلەكورەرمەندەردىڭ كوزايىمىنا اينالعان بۇرىنعى «ايالى الاقان» باعدارلاماسىنىڭ اۆتورى ءارى جۇرگىزۋشىسى بولعان بيبىگۇل داۋلەتبەكقىزى.

-   بيبىگۇل، «ايالى الاقان» باعدارلاماسى جابىلعاننان كەيىن ءسىزدى كورەرمەن قاۋىم جوعالتىپ الدى.

-   ءيا، «قازاقستان» ارناسىنان «ايالى الاقان» باعدارلاماسىنىڭ جابىلعانىنا دا ءبىراز ۋاقىت بولدى. باعدارلاما جابىلسا دا، كورەرمەندەرىمدى جوعالتىپ العان جوقپىن. وسى كۇنگە دەيىن حابارلاسىپ، ارالاسىپ تۇرامىز. وزدەرىڭىز جاقسى بىلەسىزدەر، «ايالى الاقاننىڭ» كوشىرمەسى ىسپەتتەس قازىر ارنادا «جان جىلۋى» دەگەن باعدارلاما ءجۇرىپ جاتىر. فورماتى دا، ءتىپتى جۇرگىزۋشىسىنىڭ كيىم كيىسىنە دەيىن اينا-قاتەسىز كوشىرىپ العان  باعدارلامانى شىعارىپ وتىرعان باسشىلىققا تاڭىم بار. ارنادان كەتكەن سوڭ، ويىمدى جيناقتاپ، كوكەيىمدە جۇرگەن جوبالاردى جۇزەگە اسىرۋ ءۇشىن ءبىراز ويلانىپ، تولعاندىم.

-  نەگە تەلەارنا باسشىلىعىن زاڭدى تۇردە سوتقا بەرمەيسىز؟

تەلەكورەرمەندەر ءۇشىن جاعىمدى جاڭالىق. تاياۋ كۇندەرى، انىعىن ايتساق، 26-قاراشادا  «جەتىنشى» ارنا ەفيرىنەن جاستارعا ارنالعان جاڭا جوبا «جار-جار» تەلەكلۋبى جارىققا شىقپاق. اتالعان باعدارلامانىڭ پروديۋسەرى  - تەلەكورەرمەندەردىڭ كوزايىمىنا اينالعان بۇرىنعى «ايالى الاقان» باعدارلاماسىنىڭ اۆتورى ءارى جۇرگىزۋشىسى بولعان بيبىگۇل داۋلەتبەكقىزى.

-   بيبىگۇل، «ايالى الاقان» باعدارلاماسى جابىلعاننان كەيىن ءسىزدى كورەرمەن قاۋىم جوعالتىپ الدى.

-   ءيا، «قازاقستان» ارناسىنان «ايالى الاقان» باعدارلاماسىنىڭ جابىلعانىنا دا ءبىراز ۋاقىت بولدى. باعدارلاما جابىلسا دا، كورەرمەندەرىمدى جوعالتىپ العان جوقپىن. وسى كۇنگە دەيىن حابارلاسىپ، ارالاسىپ تۇرامىز. وزدەرىڭىز جاقسى بىلەسىزدەر، «ايالى الاقاننىڭ» كوشىرمەسى ىسپەتتەس قازىر ارنادا «جان جىلۋى» دەگەن باعدارلاما ءجۇرىپ جاتىر. فورماتى دا، ءتىپتى جۇرگىزۋشىسىنىڭ كيىم كيىسىنە دەيىن اينا-قاتەسىز كوشىرىپ العان  باعدارلامانى شىعارىپ وتىرعان باسشىلىققا تاڭىم بار. ارنادان كەتكەن سوڭ، ويىمدى جيناقتاپ، كوكەيىمدە جۇرگەن جوبالاردى جۇزەگە اسىرۋ ءۇشىن ءبىراز ويلانىپ، تولعاندىم.

-  نەگە تەلەارنا باسشىلىعىن زاڭدى تۇردە سوتقا بەرمەيسىز؟

-  سوتقا بەرەيىن دەپ ويلاعانمىن. ءيا، قولىمداعى باعدارلامانىڭ قۇجاتتارى زاڭدى بولدى. باعدارلامانىڭ اۆتورلىق قۇقىعى دا قورعالعان بولاتىن. وسى ىسكە شىنداپ كىرىسكەنىمدە، زاڭ ورىندارى مەنى جاقتار ەدى. الايدا، «قازاقتا سۋ ىشكەن قۇدىعىڭا تۇكىرمە» دەگەن وتە جاقسى ءسوز بار. سول سوزدەن اتتاپ كەتە المادىم.  تالاي جىل قىزمەت ەتكەن كيەلى ورتانى لاستاعىم كەلمەدى. ونىڭ ۇستىنە، ارنا باسشىلارىنا بولا، كومەككە ءزارۋ جانداردى ۇمىتتەرىنەن ايىرعىم كەلمەدى. قازاقستاندا قانشاما ادامنىڭ مەنىڭ باعدارلاماما ءزارۋ بولىپ وتىرعانىن بىلەمىن. ولار «ايالى الاقانعا» ۇلكەن ۇمىتپەن قارايتىن. مەنى كوشىرسە دە ادامدارعا كومەكتەسە بەرسىن دەدىم. سول سەبەپتى سوتقا دا، باسقاعا دا جۇگىنبەدىم. باس امان بولسا ءالى تالاي باعدارلامانى دۇنيەگە اكەلەتىنىمە سەنىمدى بولدىم.

-   بىزگە ايتار جاعىمدى جاڭالىعىڭىز بار كورىنەدى. جاڭالىعىڭىزبەن بولىسە وتىرساڭىز؟

-  ويىمدا جۇرگەن بىرنەشە جوبا بار ەدى. سول جوبالارىمنىڭ جاقىندا بىرەۋىن ەفيرگە شىعاردىم. «كينو.kz» دەپ اتالاتىن ءبىرىنشى باعدارلامامنىڭ ەلىمىزدەگى رەسپۋبليكالىق «جەتىنشى» ارنادان كورسەتىلىپ جاتقانىنا ءبىر ايدىڭ ءجۇزى بولىپ قالدى. مۇنداعى نەگىزى ماقساتىمىز -  قازاق كينوسىنىڭ  مايتالماندارىن دارىپتەۋ. العاشقى باعدارلامامىز بەلگىلى اكتەر نۇرجۇمان ىقتىمباەۆقا ارنالدى. ال، ەكىنشى جوبام جاستارعا ارنالادى. قاراشا ايىنىڭ 26-دا ەفيرگە شىعاتىن  جوبام «جار-جار» دەپ اتالادى. نەگىزىنەن بۇل جوبا ومىردەن ءوز جارتىلارىن تابا الماي جۇرگەن قىز-جىگىتتەردى تابىستىرۋعا باعىتتالعان. تەلەكلۋبتى تانىمال اكتريسا داناگۇل تەمىرسۇلتانوۆا جۇرگىزەدى.

-  جوبانى جارىققا شىعارعالى وتىرعان «جەتىنشى» ارنا بىلۋىمىزشە، تاياۋدا عانا اشىلدى. بۇل ارنانى بىرەۋ كورەدى، بىرەۋ كورمەيدى دەگەندەي. جوباڭىزدى وسى ارناعا بەرگەندە قورىققان جوقسىز با؟ باعدارلاما ءۇشىن باستى ماقسات جوعارى كورسەتكىشكە يە بولۋ عوي.

-  سۇراعىڭىز ورىندى. ارينە، قورقىنىش باسىمداۋ. ايتسە دە نار تاۋەكەلگە بەل بۋىپ وتىرمىن. «جار-جار»-دىڭ الداعى ۋاقىتتا وسى ارناداعى ەڭ بەلدى باعدارلاما  بولاتىنىنا سەنىمدىمىن.

-  جوبانىڭ عۇمىرى قانشالىقتى ۇزاق بولماق؟

-  ول جاعىن ايتا المايمىن. باسشىلاردىڭ پاتشا كوڭىلى بىلەدى.

-  بۇل باعدارلاما قازاقى مەنتاليتەتكە قايشى كەلمەي مە؟

-  نەنى ايتقىڭىز كەلگەنىن ءتۇسىندىم. جەڭگەتايلىق دەگىڭىز كەلىپ وتىر عوي. نەگە ءبىزدىڭ مەنتاليتەتكە ساي ەمەس، اتا-سالتىمىزدا وسى جەڭگەلەرى ەمەس پە قايىن ىنىلەرىنە قىز تاڭداپ، قايىن سىڭلىلەرىن جىگىتتەرمەن تانىستىراتىن. سوندىقتان مەن بۇل جەردەن ەشقانداي سوكەتتىكتى كورىپ وتىرعان جوقپىن. قازىرگى تاڭدا بويداقتار سانى ارتىپ بارادى. ءجۇرىپ قالعان جىگىتتەر مەن وتىرىپ قالعان قىزدار كوبەيىپ بارا جاتىر. وسى باعدارلاما ارقىلى جاستاردى ءبىر-بىرىمەن تانىستىرماقپىز. ارى قاراي ولاردىڭ وزدەرى بىلەدى. جاراسىپ  جاتسا قۋانامىز. مىسالى، الدىڭعى حابارىمىزدا تانىسقان ەكى جۇپ ءبىر-ءبىرىن شىنىمەن ۇناتىپ قالىپتى. قازىر جاقسى ارالاسىپ تۇرادى ەكەن.

-  ايتىڭىزشى، نەلىكتەن وسى فورماتتاعى باعدارلاما اشقىڭىز كەلدى؟

-  بۇل جوبا بۇگىن ويلانىپ، ەرتەڭ دۇنيەگە كەلە سالعان جوبا ەمەس.  «جار-جاردى» وسىدان 2-3 جىل بۇرىن شىعارعىم كەلگەن. الايدا، مۇنداي باعدارلامالار ۇزاق ويلانۋدى، جان-جاقتى دايىندىقتى تالاپ ەتەتىنىن ەسكەردىم.  «كتك» ارناسىندا اشقان «الاقان» دەگەن باعدارلامامنىڭ كەزەكتى ءبىر سانىندا قارتتار ۇيىنە بارىپ، ونداعى قارتتاردى تۇسىرگەن بولاتىنبىز. قارتتارمەن اڭگىمە بارىسىندا سونداعى 75 جاستاعى اتايدىڭ ءبىر اجەيگە كوڭىلى بار ەكەنىن بىلدىك. اتانىڭ ۇناتاتىنىن جاڭاعى اجەيگە ايتقان بولاتىنبىز. كەيىن قارتتار ءۇيىنىڭ ديرەكتورى بىزگە حابارلاسىپ، اتاي مەن اجەنىڭ ۇيلەنگەندەرىن ايتتى. «ايالى الاقان»  باعدارلاماسىنان سالتانات ەسىمدى ارۋدىڭ 18 جىلدان كەيىن اناسىن تاپقانىن كورسەتكەن بولاتىنبىز. سول حابار شىققان سوڭ، ءبىزدىڭ تەلەفونىمىزعا مازا بولمادى. حابارلاسقاندار سالتاناتقا قۇدا ءتۇسىپ جاتتى. وسىنىڭ ءبارىن كورە كەلە، نەگە وسى جاستاردى ءبىر-بىرىمەن تابىستىراتىن باعدارلاما اشپاسقا دەگەن ويعا قالدىم. از ۋاقىتتىڭ ىشىندە وسى باعدارلامانى قولعا الىپ، ەندى مىنە ەفيرگە بەرگەلى وتىرمىز.

-  تەلەكلۋب نەلىكتەن «جار-جار» دەپ اتالدى؟

-  «جار-جار» دەپ اتالۋ سەبەبى، قازاقتا ەكى جاستىڭ ۇيلەنۋ تويىندا مىندەتتى تۇردە «جار-جار» ءانى ايتىلادى، ءبارىڭىز بىلەسىزدەر.  سول ءاندى نەگىزگە الا وتىرىپ، اتىن وسىلاي دەپ قويۋدى ۇيعاردىق.

-  ال، تەلەكلۋبقا قاتىساتىن كەيىپكەرلەردى قالاي تاباسىزدار، تاڭدايسىزدار؟

-  ءبىر نارسەنى باسا ايتقىم كەلەدى. مۇندا ءبىز كەيىپكەرلەردى شىنايى ومىردەن الامىز. باعدارلاماعا كەلگەن قىزدار مەن جىگىتتەر ءبىر-ءبىرىن مۇلدە تانىمايدى. ءتۇسىرىلىم بارىسىندا ولاردى ادەيى بولەك بولمەلەرگە وتىرعىزامىز. ولار تەك باعدارلاما بارىسىندا عانا كورىپ، سول جەردە تانىسادى. العاشىندا قورقىنىشتىڭ بولعانى راس. شىنىمەن قىز-جىگىتتەر كەلىسە مە، جوق پا دەپ ويلادىق. جالپى، ءبىزدىڭ قازاق حالقى ۇياڭ بولىپ كەلەدى عوي. الايدا، جاستاردىڭ قىزىعۋشىلىعىن كورىپ ريزا بولدىق. رەداكتسيامىزعا وزدەرى حابارلاسىپ، كەلىپ جاتىر. ءتىپتى ساحنادا جۇرگەن بويداق انشىلەر مەن حالىققا تانىمال كىسىلەر  دە بولاشاقتا مىندەتتى تۇردە قاتىساتىندىقتارىن جەتكىزدى. مەنىڭ ويىمشا، قىزىقتىڭ ءبارى ءالى الدا.

- الداعى جوسپارلارىڭىزبەن بولىسە وتىرساڭىز؟

- الدا ىستەلەتىن جۇمىس تا، ويدا جۇرگەن جوسپارلار دا جەتەرلىك. ويىمدا جۇرگەن بىرنەشە جاڭا جوبالارىم بار. سولاردى جۇزەگە اسىرماقپىن. ولار ازىرگە قۇپيا ارينە. الداعى ۋاقىتتا كورەتىن بولاسىزدار. ال، ازىرگە «جەتىنشى» ارنا ەفيرىنەن قاراشانىڭ 26-دا كەشكى ساعات 18-00-دە، قايتالاۋى قاراشانىڭ 28-دە كۇندىزگى ساعات 15-15-تە كورسەتىلەتىن «جار-جار» تەلەكلۋبىن كورۋگە شاقىرامىن.

- اڭگىمەڭىزگە كوپ راحمەت. تاۋىڭىز شاعىلماي، ارقاشان بيىكتەردەن كورىنە بەرىڭىز!

"اباي-اقپارات"