Reuters اگەنتتىگىنە سىلتەمە جاساعان ازاتتىقتىڭ وزبەك رەداكتسياسىنىڭ حابارلاۋىنشا، 38 جاستاعى كارىموۆا-تيللياەۆا، ۋاقىتىنىڭ باسىم بولىگىن اكەسىنىڭ اتىنداعى قايىرىمدىلىق قورىنىڭ جۇمىسىنا كومەكتەسۋگە بولەتىنىن ايتتى.

"تاياۋدا ۋاقىتىمنىڭ كوبىن وتباسىما، جەكە ماقساتتارىما، يسلام كارىموۆ اتىنداعى قورعا جانە باسقا دا شىعارماشىلىق، قايىرىمدىلىق، مادەني جوبالارعا ءبولۋدى جوسپارلاپ وتىرمىن. وسىعان بايلانىستى ەلشى قىزمەتىمنەن باس تارتىپ وتىرمىن", - دەدى لولا كارىموۆا-تيللياەۆا سامارقانداعى وزبەكستاننىڭ يسلام مادەنيەتى جانە عىلىمي مۇرالارىنا ارنالعان كونفەرەنتسيادا.

قازىر باتىس ەلدەرىندە تۇرىپ جاتقان كارىموۆتىڭ كىشى قىزى ەندى وزبەكستانعا ورالۋ نيەتى بار-جوعىن انىقتاپ ايتپادى.

يسلام كارىموۆتىڭ ارتىندا ەكى قىزى - گۇلنارا جانە لولا قالدى. وتكەن ايدا وزبەكستان باس پروكۋراتۋراسى 45 جاستاعى گۇلنارا كارىموۆانىڭ "اۋىر ەكونوميكالىق قىلمىستار جاسادى" دەگەن ايىپپەن قاماۋدا وتىرعانىن حابارلاعان.

لولا كارىموۆا-تيللياەۆا 2013 جىلى BBC-گە بەرگەن سۇحباتىندا اپكەسىمەن بايلانىسىن ۇزگەنىنە 14 جىل بولعانىن مالىمدەگەن.

رەسمي تاشكەنت يسلام كارىموۆتىڭ قايتىس بولعانىن 2016 جىلى 2 قىركۇيەكتە حابارلاعان. كارىموۆ دۇنيە سالعان سوڭ پرەزيدەنت مىندەتىن سول كەزدە پرەمەر-مينيستر بولعان شاۆكات ميرزياەۆ اتقارعان. ول 2016 جىلى جەلتوقساندا وتكەن سايلاۋدا پرەزيدەنت بولىپ سايلانعان.

Abai.kz