ميانمادا قىرعىن بولىپ جاتىر. وسىنداعى ىسقىرىعى جەر جاراتىن، بىراق ايداعانى بەس ەشكى كەي جاندار گەنوتسيد جوق دەگەنگە سەندىرگىسى كەلەدى. "ول ءبىزدىڭ شارۋامىز ەمەس" دەيدى.

"ولار كوممۋنيستەرگە كەلگەندە، مەن ارەكەت ەتپەدىم - مەن كوممۋنيست ەمەس ەدىم. ولار سوتسيال-دەموكراتتارعا كەلگەندە مەن ۇندەمەدىم - مەن سوتسيال-دەموكرات ەمەس ەدىم. ولار كاسىپوداق بەلسەندىلەرىنە كەلگەندە مەن ارەكەت ەتپەدىم - مەن كاسىپوداق مۇشەسى ەمەس ەدىم. ولار ماعان كەلگەندە - مەنى قولدايتىن، قورعايتىن ەشكىمنىڭ قالماعانىن ءتۇسىندىم" دەگەن ەكەن نەمىس پاستورى مارتين نيمەللەر. راس-اۋ.

ونىڭ ۇلتى باسقا، ونىڭ ءدىنى باسقا، تۇراتىن قۇرلىعى بولەك دەپ وتىرا بەرسەك، باسىمىزعا ءىس تۇسسە بىزگە دە جانى اشيتىندار تاز باسىنداعى شاشتاي از قالار. 1921-22 جىلدارى كسرو ايماعىندا اشتىق بولعان ساتتە گەربەرت گۋۆەر باسقارعان American Relief Administration قورى كومەك بەرگەن ەدى. اتا جاۋىنا، دەموكراتياعا قارسى بولشەۆيكتىك جۇيەگە كومەك قولىن سوزعان بولاتىن. ويلاندىرارلىق!

ەندى كەي بىلگىشتەر ميانمادا گەنوتسيد بولىپ جاتقان جوق دەيدى. گەنوتسيد بولماسا بەس كۇندە 120 مىڭ حالىق نەگە بوسقىن اتاندى؟ بەس-اق كۇندە! گەنوتسيد جوق بولسا نەگە بۇۇ-ىن ميانما كىرگىزبەدى؟ گەنوتسيد بولماسا 3000 ادام نەدەن ءولدى؟ گەنوتسيد بولماسا الەم ەسى اۋىسىپ شۋلاپ جاتىر ما؟ ءيا، ەموتسيونالدى سۋرەتتەردىڭ اراسىندا ارانداتۋشىلىققا نەگىزدەلگەن جالعان اقپاراتتار جەتەرلىك. الايدا بۇل ول ەلدە گەنوتسيد جوق دەگەندى دالەلدەي المايدى عوي. گەنوتسيد بار، وسى ۋاقىتقا دەيىن روحيندجا حالقىنا ازاماتتىق بەرمەۋ زاڭىنىڭ ءوزى گەنوتسيد! ويتكەنى ازاماتتىعى جوق ادام نە ەمدەلە، نە ءبىلىم الا المايدى. دەمەك ونىڭ دەنساۋلىعى مەن تۇلعا بولىپ قالىپتاسۋىنا كەرى اسەرىن تيگىزۋى بۇل دا ادام قۇقىعىن بۇزۋشىلىق. ءيا، روحيندجاعا ءۇش قايناساق سورپامىز قوسىلمايدى. قىز الىسىپ، قىز بەرىسكەن قۇدا دا ەمەسپىز. جۇرەگىمىز مۇسىلمان بولعاندىقتان ەمەس، ادام بولعاندىقتان اۋىرۋدا. ادام! مەيلى ول قارا، مەيلى اق بولسىن، مەيلى يسۋستى، مەيلى مۇحامەدتى پايعامبارىم دەسىن، ونىڭ بارلىعى دا ادام. ادامعا جاسالعان ايۋاندىققا ءۇن قاتپاۋدىڭ ءوزى ايۋاندىق! ەشكىمدە ول جاققا اۆتومات اسىنىپ، اتتانعالى وتىرعان جوق! بىراق بۇل سۇمدىققا قارسى ءۇن ايتۋ ادامدىق پارىز!