بەيسەنبى, 28 ناۋرىز 2024
وسى عوي ەندى... 8684 10 پىكىر 27 قىركۇيەك, 2017 ساعات 10:18

250 قانداس ساعىنتاەۆتان اراشا سۇرايدى

قازاقستان رەسپۋبليكاسىنىڭ

پرەمەر-ءمينيسترى

ب.ءا. ساعىنتاەۆقا

 

قۇرمەتتى باقىتجان ءابدىرۇلى!

ءبىز قحر-ورالىپ، جامبىل وبلىسى، تاراز قالالىق كوشى-قون پوليتسياسىنان ىقتيارحات العان 250-دەي ەتنيكالىق قازاق شىلدە ايىنان بەرى ۇرەيمەن كۇن كورىپ جاتىرمىز.

سەبەبى، ءبىزدىڭ تۇراقتى تىركەۋگە تۇرىپ العان ىقتيارحاتىمىز جالعان ەكەن دەگەن اقپارات تارادى. ونى راسىمدەگەن قالالىق كوشى-قون پوليتسياسى باسقارماسىنىڭ باسشىسى مەن ونىڭ بىرنەشە ينسپەكتورى قاماۋعا الىنىپ، تەرگەۋ جۇرگىزىلىپ جاتىر.

ءبىز بۇل جايسىز جاعدايدى 2017 جىلعى 17 شىلدە كۇنى «كتك» تەلەارناسىنىڭ «جاڭالىقتار» ءبولىمىنىڭ ءجۋرناليستى رۋسلان ابدىحالىقتىڭ «تارازداعى كوشى-قون پوليتسياسى ارقىلى قۇجات راسىمدەگەن قانداستار ەلدەن قۋىلۋى مۇمكىن» دەگەن اقپاراتىن ەستىگەندە ءبىر-اق بىلدىك.

سودان بەرى بۇل ماسەلە باق پەن الەۋمەتتىك جەلىلەردە ءجيى-ءجيى كوتەرىلىپ، قىزۋ تالقىعا ءتۇسىپ جاتىر. بۇل ماسەلە تارازدان ىقتيارحات العان قانداستارىمىزدى دا، جالپى قاۋىمدى دا، ءبىزدى دە قاتتى الاڭداتىپ وتىر.

جاقىندا قازاق كوشىنە جاناشىر بولىپ جۇرگەن اعالارىمىزدىڭ اقىلىمەن سول جاپا شەككەن قانداستارىمىزدىڭ باسىم ءبىر بولىگى «WhatsApp» جەلىسىندە «تاراز-لۋكا (ىقتيارحات)» دەگەن توپ قۇرىپ، ورتاق پىكىرگە كەلىپ، وسى جۇمىستىڭ ءمان-جايىن ۇعۋ ءۇشىن، «نۇر وتان» پارتياسى ارقىلى حات جازىپ، قر ىشكى ىستەر مينيسترلىگىنەن جانە جامبىل وبلىسى ىشكى ىستەر دەپارتامەنتى، كوشى-قون قىزمەتى باسقارماسىنان جاۋاپ الدىق.

ول جاۋاپتا «...اتالعان 250 قحر قازاق ازاماتىن قازاقستان رەسپۋبليكاسىندا تۇراقتى تۇرۋعا قايتا قۇجاتتاندىرۋ، نە ماسەلەنى وڭ ناتيجەدە شەشىلۋى قىلمىستىق پروتسەستىڭ ءالى دە جالعاسۋىنا جانە سوتتىڭ ناقتى شەشىمىنىڭ جوقتىعىنا بايلانىستى مۇمكىن ەمەس» دەلىنىپتى.

شىنىن ايتقاندا، ءبىز دەلدالدار مەن جەمقورلاردىڭ قۇربانى بولىپ وتىرمىز. سونداي-اق، بۇل جاعدايعا ۇشىراۋىمىزعا 2013 جىلى 15 جەلتوقساندا ورالماندارعا ءتورت جىلسىز ازاماتتىق بەرىلمەيتىن ەتىپ قاتاڭ قابىلدانعان «حالىقتىڭ كوشى-قونى تۋرالى» زاڭى دا باستى سەبەپتىڭ ءبىرى ەكەنى شىندىق! سەبەبى، اتالمىش زاڭدا الماتى مەن استانا قالالارىنا ورالمانداردى تۇراقتى تىركەۋگە تۇرۋ شەكتەلگەن. تىركەلگەن كۇننىڭ وزىندە تولەم قابىلەتىن كورسەتۋ شارتى قويىلعان. سول سەبەپتى، ءبىز ول كەزدە قالايدا قازاقستاندا تۇراقتاپ قالۋدىڭ قامىن ويلادىق.

قۇدايعا شۇكىر، ءبارىمىز ەلباسىمىزدىڭ دانا ساياساتىنىڭ ارقاسىندا،  قاسيەتتى قازاقستانىمىزدا ءوسىپ-ءونىپ، كوبىمىز بالالى-شاعالى بولدىق. ءوز تىرشىلىگىمىزدى ءوزىمىز جاساپ جاتىرمىز. ۇلى ەلىمىزگە ۇلەسىمىزدى قوسامىز دەگەن نىق سەنىمدەمىز!

ارينە، ءبىزدىڭ كوبىمىز تىركەلگەن ۇيدە تۇرمادىق. بۇل كەمشىلىكتەرىمىزدى مويىندايمىز، ول ءۇشىن ايپپۇل تولەۋگە دە دايىنبىز. ءبىر ءبولىمىزدىڭ  ىقتيارحاتىمىزدى بازادا جوق دەيدى. ال، بۇل ىقتيارحاتتاردىڭ زاڭدى نەمەسە زاڭسىز ەكەنى تۋرالى شەشىمدى، ارينە، سوت شىعارادى. سوسىن باسشىسىمەن بىرگە قاماۋعا الىنعان تاراز قالالىق كوشى-قون پوليتسياسى باسقارماسىنىڭ بىرنەشە ينسپەكتورى زاڭ الدىندا ءوز جازالارىن الارى ءسوزسىز.

سىزدەن ءبىزدىڭ قۇجاتتارىمىزدى قايتا رەتتەپ، قالپىنا كەلتىرىپ، قازاقستاندا قالۋىمىزعا كومەكتەسۋىڭىزدى وتىنە سۇرايمىز.

كەتكەن كەمشىلىكتەر ەكى جاققا دا اششى ساباق بولدى!

زور قۇرمەت جانە ۇمىتپەن:

قىتايدان كەلىپ، جامبىل وبلىسى،

تاراز قالاسىنان

ىقتيارحات العان

250 قازاقتان (66 ادامنىڭ قولى قويعان)

حاتتى ۇيىمداستىرىپ، رەداكتسياعا ۇسىنعان اۋىت مۇقيبەك

Abai.kz

10 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1559
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2250
عيبىرات

قايسار رۋحتى عازيز جان

مۇحتار قۇل-مۇحاممەد 3499