ەسىم-سويى كۇللى ورىس جۇرتىنا ءماشھۇر پورنوجۇلدىز 2018 جىلى رەسەيدە وتەتىن پرەزيدەنتتىك سايلاۋعا قاتىسپاق. ول كرەمل كرەسلوسىنا تالاساتىنىن رەسمي مالىمدەدى.

ەندى تۇپ-تۋرا ءتورت اي دەگەندە ورىس حالقى  ء"پۋتيننىڭ سايلاۋىن" وتكىزەتىنى تۋرالى جازعان ەدىك. قازىرگى پرەزيدەنت ۆلاديمير پۋتين ءوزىنىڭ دوداعا قاتىساتىنىن رەسمي مالىمدەمەسە دە، ساياسي ساراپشىلار ءپۋتيننىڭ ەكىنشى رەت قاتارىنان سايلاۋعا ءتۇسۋ قۇقى بار ەكەنىن جانە ءپۋتيننىڭ بۇل سايلاۋعا مىندەتتى تۇردە قاتىساتىنىن ايتادى.

ءپۋتيننىڭ جەڭىسى - 58 پايىز

ءتىپتى، الدىن الا بولجام جاسالىپ، جەڭىس ۆلاديمير ۆلاديميروۆيچكە بەرىلىپ قويعان. "كومسومولسكايا پراۆدا" دەيتىن ەسكى گازەت ءپۋتيننىڭ شامامەن 58 پايىز حالىقتىڭ داۋىسىن جينايتىنىن بولجاپ، پال اشىپتى.

ول ول ما، بۇكىل ورىستىڭ 83 پايىزى ءپۋتيننىڭ ەل باسقارۋىنا ءدان ريزا كورىنەدى. ساۋالناما قورىتىندىسى سولاي دەيدى.

سونىمەن، ينتريگاسى جوق سايلاۋدىڭ جەڭىمپازى بىرەۋ. ول - ۆلاديمير پۋتين.

ەندى ونىڭ دوداداعى وپپونەنتتەرى كىم دەگەنگە كەلسەك، قىزىق وسى جەردەن باستالادى. 

اۋەلى، ايگىلى تەلەجۇرگىزۋشى كسەنيا سوبچاك سايلاۋعا قاتىساتىنىن مالىمدەپ، سايلاۋ الدى ۇگىت-ناسيحاتىن باستاپ كەتكەن. ءوزىنىڭ قيقار قىلىعىمەناتى شىققان كسەنيا اناتوليەۆنا سوبچاك ساياساتكەرلەردىڭ شاڭىراعىندا تۋعان. رەسەيدىڭ بۇرىنعى ءام قازىرگى ساياسي ەليتاسىمەن تالاي رەت تاباقتاس بولعان.

كسەنيا سوبچاك - تەلەجۇرگىزۋشى ءام "دوم 2" جۇلدىزى

كسەنيانىڭ كىسى قىزىعارلىق قىلىعى (مادەني ەتيكاسى) ءام ساياسي باگاجى بار دەپ ايتا المايمىز.

دەگەنمەن ول بەينە ۇندەۋ جاساپ، ءوزىنىڭ سايلاۋعا قاتىساتىنىن، پرەزيدەنتتىك كرەسلودان ءۇمىتتى ەكەنىن جانە ءوزىن وپپوزيتسيا وكىلى سانايتىنىن اشىق ايتتى.

«مەن - كسەنيا سوبچاكپىن، جاسىم 35-تە. مەن ءومىر بويى رەسەيدە تۇرىپ، جۇمىس جاساپ كەلەمىن جانە ەلىمنىڭ كەلەشەگى مەن ءۇشىن وتە ماڭىزدى. مەن 18 جاسقا تولعاندا پۋتين رەسەي پرەزيدەنتى بولدى. سول جىلى تۋعان بالالار بيىل داۋىس بەرۋگە بارادى. بۇلاي جالعاسا بەرسە، مەنىڭ ۇلىم سايلاۋعا بارىپ داۋىس بەرەتىن جىلى دا كانديداتتار سول باياعى زيۋگانوۆ، جيرينوۆسكي مەن پۋتين بولۋى ابدەن مۇمكىن عوي...»، - دەيدى سوبچاك.

داۋ-دامايدىڭ ورتاسىندا جۇرەتىن كسەنيا سوبچاك جاقىندا ۆلاديمير پۋتينمەن كەزدەسىپتى. كەزدەسىپتى دە، ءوزىنىڭ ۇمىتكەر بولىپ، سايلاۋعا قاتىساتىنىن ايتىپتى.

«مەنىڭ ۇققانىم، ول (پرەزيدەنت ءپۋتيندى ايتىپ وتىر – رەد.) مەنىڭ بۇل شەشىمىمە قۋانا قويعان جوق»،- دەيدى سوبچاك. ۇمىتكەرلىككە ءۇمىتتى سوبچاكتىڭ ايتۋىنشا، پۋتين تىكەلەي جاۋاپ بەرمەگەن. تەك ءار ادامنىڭ شەشىم قابىلداۋعا قۇقىلى ەكەنىن جانە سول شەشىمى ءۇشىن جاۋاپ بەرەتىنىن ەسكەرتكەن.

سونىمەن سوبچاك - ۇمىتكەرلىكتەن ۇمىتكەر. ول دوداعا "دوپۋسك" الۋ ءۇشىن الدىمەن 300 مىڭ ادامنىڭ قولىن جيناۋى ءتيىس.

سوبچاكتىڭ سويقان مالىمدەمەسىن ورىس قوعامى ويىنعا اينالدىرعانداي بولدى. ماكسيم گالكين باستاعان سايقىمازاقتار كەلەمەجدەۋگە كوشتى. بىراق، كىسەكەڭ كەلە جاتىر ءالى.

پۋتين مەن پورنوجۇلدىز ەلەنا بەركوۆا ايقاسى

كەلەر جىلعى سايلاۋداعى ءپۋتيننىڭ تاعى ءبىر قارسىلاسى كسەنيانى ون ورايتىن، اتاقتى پورنوجۇلدىز.

ءيا، پورنوجۇلدىز ەلەنا بەركوۆا. بۇتىنان ءبىر ءداۋىردىڭ ۇرپاعى وتكەن بەركوۆا دا بەينە ۇندەۋ جاريالادى.ول بەينە جازبانى  "Instagram" جەلىسىندەگى پاراقشاسىندا جاريالادى. 

سايلاۋعا قانداي نيەتپەن قاتىساتىنىن قايدام، سەكس ونەرىنىڭ سۋرەتكەرى - ەلەنا بەركوۆا ءوزىنىڭ پرەزيدەنت بولعاندا نە ىستەيتىنىن ايتتى.

ينتيم سۋرەتتەرى مەن ۆيدەولارى ارقىلى تانىمال بولعان قىز اجىراسۋدى مۇمكىن ەمەستەي ەتىپ، قىرىق سانتيمەتردەن جوعارى بەلدەمشە كيۋگە تىيىم سالىپ، مەكتەپتەردە سەكسۋالدىق تاربيە بەرۋدى، بالالاردىڭ دۇنيەگە كەلۋىنە رۇقسات بەرەتىن قۇجات جانە زورلىق ءۇشىن ءولىم جازاسىن ەنگىزەتىنىن ايتتى.

مىنە، سولاي. ءبىرى "دوم 2" دەيىن جوبا ارقىلى تانىمال بولسا، ءبىرى - پورنو اكتريسا.

1,1 ميلليون وقىرمانى بار انفيسا چەحوۆا

ويبوي، ۇمىتىپ بارادى ەكەنمىن، ءپۋتيننىڭ تاقتالستارىنىڭ ىشىندە انفيسا چەحوۆا دا بار.

ورىستىڭ سەكسۋالدىق ساۋاتىن اشۋمەن تەلەەكران ارقىلى اينالىساتىن انفيسا چەحوۆا ەگەر "ينستاگرامم" جەلىسىندە 200 مىڭ لايك جينالسا، سايلاۋعا تۇسەتىنىن مالىمدەگەن.

رەسەيدەگى ەشكىم بىلمەيتىن "يگى ىستەر" پارتياسى باسقا-باسقا ەمەس، ءدال وسى تەلەجۇرگىزۋشى انفيسا چەحوۆاعا ۇسىنىس ايتىپ، سايلاۋعا تۇسۋگە ۇگىتتەپتى.

ونىڭ الەۋمەتتىك جەلىسىندە 1,1 ميلليون جانكۇيەرى بار ەكەنىن ەسكەرسەك، انفيسانىڭ دا 3-4 ورىندارعا ءۇمىتتى بولۋعا ءۇمىتى بار ەكەنى انىق.

قۇقىق قورعاۋشى ەكاتەرينا گوردون دا سايلاۋعا تۇسپەك

ۆلاديمير ءپۋتيننىڭ كەلەسى قارسىلاسى - ەكاتەرينا گوردون. بۇل بيكەش قۇقىق قورعاۋشى. ءوزىن-ءوزى ۇسىنىپ، سايلاۋعا تۇسۋگە نيەتتى ەكەنىن ءوزى مالىمدەگەن.

"مەنىڭ اتى-ءجونىم ەكاتەرينا گوردون. جاسىم 37-دە. جانە مەن دە ءوز قۇقىمدى پايدالانىپ، سايلاۋعا تۇسپەكپىن. مۇمكىن مەن پرەزيدەنت اكىمشىلىگىنىڭ باتاسىن الماعان جالعىز كانديدات شىعارمىن", -دەيدى گوردون.

ءتۇيىن. سولتۇستىكتەگى سايلاۋدىڭ سيقى وسى. ازىرگە بولاشاق كانديدات ءام جەڭىمپاز ۆلاديمير ءپۋتيننىڭ سىلقىمدارى سايلاۋعا بىلەك سىبانا كىرىسىپ كەتكەن ەكەن.

جۇرتقا ءجۇزى تانىستاردىڭ ىشىندە كسەنيا سوبچاك، ەلەنا بەركوۆا، انفيسا چەحوۆا، ەكاتەرينا گوردون مەن ۆلاديمير جيرينوۆسكي بار. ءيا، ۆلاديمير جيرينوۆسكي. ايگىلى ليبەرال-دەموكرات ءام پسەۆدو بۋنتار.

بۇل جولى دا پرەزيدەنت بولماققا بەكىنگەن جيرينوۆسكيدىڭ جولى بەلگىلى. سايلاۋ دوداسى كەزىندە ءپۋتيندى جەكپە-جەككە شاقىرادى. اۋزىنا كەلگەن، انىعىندا تەكسەرىلگەن، ماقۇلدانعان ءماتىنىن مانەرلەپ وقىپ، اياق-قولىن وڭدى-سولدى سەرمەيدى. پۋتين دەباتقا شىقپايدى. جيرينوۆسكي ەكىنشى يا بولماسا ءۇشىنشى پوزيتسيانى يەمدەنەدى.ءبىتتى.

نۇرگەلدى ابدىعانيۇلى

Abai.kz