2017 جىلدىڭ 4 قاراشاسىندا نەكراسوۆ اتىنداعى №9 مەكتەپ-گيمنازيادا “وتان – انا” ەسكەرتكىشىنىڭ ىرگەسىندە جارتى عاسىر بويى ساقتالعان امانات حاتتىڭ اشىلۋ ءراسىمى ءوتتى.

الدىمەن 100-دەن اسا قوناقتار - ارداگەر ۇستازدار كەرن س.ن.، سپيرينا ن.پ.، ناحراتوۆا گ.م.، شەشينا ۆ.ي.، نيكيتينا م.ۆ.، حۋسانوۆا ش.ح. مەن 1960, 1970, 1980, 1990, 2000 جىلعى ءبىتىرۋشى تۇلەكتەر لەگى بولىپ ساپقا تۇرىپ “وتان-انا” ەسكەرتكىشىنە تاعزىم جاساپ ەسكەرتكىشتى گۇل دەستەلەرمەن كومكەردى. قولىنا فاكەل ۇستاعان شمارين ميحايل ەسكەرتىش ىرگەسىندەگى بەسجۇلدىز سيپاتىنداعى الاۋدى تۇتاتتى. 1967 جىلعى ءبىتىرۋشى تۇلەكتەر وسيپوۆا ولگا، شمارين ميحايل، گۇلحان ساديقىزى جانە سول كەزدەگى ۇستازدارى سپيرينا نەللي پەتروۆنا ەلۋ جىل ەلجىرەتكەن، قىزىل بارقىتپەن كومكەرىلگەن جاستىققا قويىلعان امانات حاتتى ايالاي ساپ تۇزەپ الاڭدى اينالا حاتتىڭ ءماتىنىن جاريالاۋ ءۇشىن مىنبەرگە كوتەرىلدى. شەكسىز ريزاشىلىق سەزىممەن، كوتەرىڭكى لەپپەن، كوڭىل تولقىنىنىڭ دىرىلىمەن اماناتتالعان ورىس تىلىندەگى حات ءماتىنى جاريالاندى.

حاتتا مەكتەپ عيماراتىنىڭ تاقىر الاڭقاي جەرگە 1939 جىلى سالىنعانى، مەكتەپ ۇجىمى مەن تۇلەكتەر مەكتەپ اۋلاسىن كوركەيتۋگە ۇلەس قوسىپ ەڭبەكتەنگەندەرى، ماۋەلى باۋ-باقشاسى جايقالىپ تۇرعانى، وتان ءۇشىن وت كەشكەن سوعىس قۇرباندارىنا ارناپ “وتان-انا” ەسكەرتكىشىن ماڭگىلىككە تۇرعىزعاندارىن جەتكىزە بايانداعان.

بۇگىنگى كەزەڭ كەلبەتى ەرتەڭگى تاريح ەنشىسى بولىپ قاتتالماقشى. سالتاناتتى جيىننىڭ شىمىلدىعىن اشقان مەكتەپ ديرەكتورى ج.ا.ورىنباەۆا ءىس-شارانىڭ ماڭىزدىلىعىنا توقتالىپ، جاس بۋىن ۇرپاققا ايتار ويلارىن حاتقا تۇسىرگەندەرىن ايتىپ ءوتتى. تاريحتىڭ كۋاسى بولعان كەمەڭگەر ۇستازدارىمىزعا، مەكتەپ تۇلەكتەرىنە ارنايى ءسوز بەرىلدى. جاھاندانۋ الەمىنە جۇتىلماي مەملەكەتىمىزدى، ەلدىگىمىز بەن ەرلىگىمىزدى ادامزات ءۇشىن ماڭگىلىك ەتۋ ءۇشىن ەڭبەك ەتىپ جۇرگەن بۇگىنگىنىڭ كەيىپكەرلەرى سالماقتى دا ساليقالى ويلارىن تىڭ سەرپىنمەن 20 جىلدان سوڭ اشىلاتىن وسيەت حاتقا ءتۇسىرىپ جازدى. 11 سىنىپ وقۋشىلارى – امىربەكوۆا نازىم قازاق تىلىندە، زاگيدۋللينا يۋليانا ورىس تىلىندە، فايزۋراحمانوۆا زارەما اعىلشىن تىلىندە “بولاشاققا حاتتىڭ” ءماتىنىن كوپشىلىك الدىندا جاريا ەتتى.

وتانشىلدىق رۋحتى بارىنەن بيىك ۇستاۋ ناسيحاتتالىپ، ادامشىلىق قاسيەتتىڭ جوعارى تۇعىردا بولۋ كەرەكتىگى حاتتا كورسەتىلدى. تەحنولوگيانىڭ قارىشتاپ دامۋ كەزەڭىندە ادىلەتتىلىكتى تۋ ەتىپ، الەم ءبىلىمىنىڭ كەڭىستىگىنە ەنۋ ءۇشىن بار مۇمكىندىكتەرىن پايدالانۋ قاجەتتىلىگى، جاڭا تاريحي بەتبۇرىستا دامىعان 30 ەلدىڭ قاتارىنا ەنۋ ماقساتىندا ەلباسىمىز ن.ءا.نازارباەۆتىڭ “100 ناقتى قادام” جوسپارى بويىنشا اتقارىلىپ جاتقان اۋقىمدى ءىسشارالار لەگى، لاتىن گرافيكاسىنا ءوتۋدى قولدايتىندىقتارى جانە جاس ۇرپاققا ارنالعان قاداۋ-قاداۋ 20 وسيەت ءسوز حاتتا ايشىقتالىپ كورسەتىلدى. “بولاشاققا حات” ءماتىنىن جاريالاعاننان سوڭ، اسپان تۇستەس كوك بارقىتپەن كومكەرىلگەن جاستىققا قويىلعان كاپسۋلاداعى حاتتى مەكتەپ ديرەكتورى ج.ا.ورىنباەۆا 2017-2018 وقۋ جىلىنداعى مەكتەپ ءبىتىرۋشى تۇلەكتەرمەن بىرگە سالتاناتتى تۇردە ەسكەرتكىش ماڭىنا جەتكىزدى.

“وتان-انا” ەسكەرتكىشىنىڭ ىرگەسىنە 2037 جىلى جاريا بولاتىن “بولاشاققا حات” ارنايى قوراپقا سالىندى. بۇل ايتۋلى ءىس-شارا ەكى بۋىن وكىلدەرىنىڭ اراسىندا رۋحاني ۇرپاقتار ساباقتاستىعىن ورناتتى.

ء“جۇز رەت ايتقاننان، ءبىر رەت كورگەن ارتىق” دەگەندەي، سەزىمدى شۋاققا بولەگەن تولعانىستى تاريحي ءسات جادىمىزدا ۇزاق ساقتالارى حاق. سالتاناتتى جيىن سوڭى اق داستارحان باسىندا جالعاسىن تاپتى. ا.ن. پۋدوۆكينا مەن ۆ.ا. گەراسيموۆالاردىڭ ۇيىمداستىرۋىمەن وتكىزىلگەن سالتاناتتى كەشتىڭ ماڭىزى تاعىلىمعا تولى بولدى. ينتەراكتيۆتى تاقتادان بايىرعى تۇلەكتەردىڭ توپتاما سۋرەتتەرى، ۆيدەوروليكتەر كورسەتىلىپ، جانعا جاعىمدى قىزىقتى ۇمىتىلماس ەستەلىكتەر ايتىلدى. شاكىرتتىك ادەپپەن التىن ۇيا مەكتەپتەرىنىڭ تاۋدان بيىك تابالدىرىعىن اتتاپ كەلگەن تۇلەكتەر بالالىق شاقتارىنا ءبىر ۋاق ساياحات جاساپ، باۋىرمال قۇشاقتار ايقاسىپ، جادىراپ مارە-سارە بولىپ قيماستىقپەن تارقاستى.

مەكتەپ ديرەكتورى ج.ا.ورىنباەۆانىڭ باسشىلىعىمەن حاليلوۆا گ.ت.، مۋحاشەۆا ب.ح.، ميحايلينا گ.ا.، مۋراتوۆا گ.، ناۋرىزباەۆا گ.م.،جورىقباەۆا س.ك.، كونونەنكو ي.ۆ.، ەسەنكۋلوۆ س.س.، داداشەۆ ب.ا.، سۇلتانبەكوۆا ا. ت.ب. ۇستازداردىڭ اتسالىسۋىمەن «ءبىر جاعادان باس، ءبىر جەڭنەن قول شىعارۋدىڭ» ارقاسىندا جارتى عاسىرلىق تاربيەلىك ماڭىزى بار ەلگە ۇلگى بولارلىق سالتاناتتى تاريحي ءىسشارا ءوز مارەسىنە جەتتى.

ۇلىلىقتىڭ ولشەمى مەن سىرى – تىرشىلىك پەن ادامدار اراسىنداعى جىلىلىق. ءومىر دەگەن قۇبىلىستا ادامزاتتىڭ ءبىر-بىرىنە دەگەن مەيىرىم شۋاعى، بولاشاققا سەنىم ارتقان جالپى ادامشىلىقتىڭ شۋاعى ەشۋاقىتتا سونبەسىن!

نەسىپكۇل وتەباەۆا، قازاقستان جۋرناليستەر وداعىنىڭ مۇشەسى

Abai.kz