"الاش جولى" قوعامدىق بىرلەستىگى تىركەۋىنىڭ كۇشىن جويۋ تۋرالى استانانىڭ ەسىل اۋداندىق مەملەكەتتىك كىرىس باسقارماسىنىڭ بەرگەن تالاپ-ارىزىن اۋدانارالىق ەكونوميكالىق سوتتىڭ سۋدياسى ماقسات سەمبين 17 قاراشادا قاراپ، سول كۇنى ونى قاناعاتتاندىرعان. سوت شەشىمى قازاقستان جوعارعى سوتىنىڭ "سوت كابينەتى" سايتىندا جاريالانعان.

ازاماتتىق بەلسەندى باقىتجان تورەعوجينا قوعامدىق قوزعالىستى جابۋ تۋرالى سوت شەشىمى الدىن الا سوت وتىرىسى باستالعان جۇما كۇنى جەدەل شىعارىلعانىن ايتادى.

"تاۋەلسىز" ءارى "بەيتاراپ" قازاق سوتىنىڭ ازاماتتىق بەلسەندىلەردى ساياسي تاپسىرىسپەن قۋعىنداۋ سيپاتى مەن جىلدامدىعىنا كەيدە تاڭ قالاسىڭ" دەيدى ول.

"الاش جولى" قوعامدىق بىرلەستىگىنە قارسى بەرىلگەن تالاپ-ارىز بويىنشا استانانىڭ مامانداندىرىلعان اۋدانارالىق ەكونوميكالىق سوتىنىڭ سۋدياسى ماقسات سەمبيننىڭ 17 قاراشادا شىعارعان شەشىمىندە قوزعالىستى تىركەۋ تۋرالى ادىلەت مينيسترلىگىنىڭ 2017 جىلعى 17 شىلدەدە قابىلداعان قاۋلىسىنىڭ كۇشى جويىلعانى ايتىلعان. سوت شەشىمى جاريالانعان كۇننەن باستاپ ءبىر ايدىڭ ىشىندە وعان قاتىستى اپەللياتسيالىق شاعىم بەرۋگە بولادى دەپ كورسەتىلگەن.

سوتقا بەرىلگەن تالاپ-ارىز يەسى "الاش جولى" قوزعالىسىنىڭ قۇرىلتايشىلارى رەتىندە كورسەتىلگەن 10 ادامنىڭ ەكەۋى "ونى قۇرۋعا قاتىسىمىز جوق" دەپ ايتقانى سەبەپتى سوتتان قوعامدىق بىرلەستىكتىڭ تىركەۋىن جويىپ، ۇيىمدى جابۋدى سۇراعان بولاتىن. بۇل تالاپتى سوتقا قاتىسقان ادىلەت مينيسترلىگىنىڭ وكىلى دە قولدادى. سۋديا ماقسات سەمبين جۇما كۇنى سوتقا جۋرناليستەردى قاتىستىرعانىمەن، سوت زالىندا بەينە جانە اۋديو جازبا جۇرگىزىلمەيتىنىن العا تارتىپ، ازاتتىق تىلشىلەرىنە سوت بارىسىن كامەراعا تۇسىرۋگە تىيىم سالعان.

بىرلەستىك مۇشەلەرىنىڭ نەگىزگى تىڭداۋ وتكىزبەي، بىردەن جارىسسوزگە كىرىسۋدى ۇسىنعان سۋدياعا نارازىلىق تانىتىپ، ونى اۋىستىرۋ تۋرالى قالالىق سوت توراعاسىنىڭ اتىنا جازعان ارىزدارى قاناعاتتاندىرىلمادى. بۇعان قارسى بولعان قوزعالىس مۇشەلەرى پروتسەسكە قاتىسۋدان باس تارتىپ، ەگەر سوت بىرلەستىكتى جابۋ تۋرالى شەشىم شىعارسا، اپەللياتسيالىق شاعىم تۇسىرەتىندەرىن مالىمدەگەن.

"الاش جولى" قوزعالىسى 2017 جىلدىڭ 17 شىلدەسىندە قوعامدىق بىرلەستىك بولىپ رەسمي تۇردە تىركەلگەن. قوزعالىستىڭ بيلىككە قويعان تالاپتارىنىڭ اراسىندا قازاقستاندا اۋىل شارۋاشىلىعى جەرىن "شەتەلدىكتەرگە جالعا بەرمەۋ جانە ساتپاۋ" تۋرالى تالاپ تا بار.

Abai.kz