قازاق تىلىندە سويلەيتىن جۇمىسسىزداردىڭ قۇقىعى ورەسكەل بۇزىلىپ جاتىر، - دەپ جازادى ءوزىنىڭ "فەيسبۋكتەگى" جەكە پاراقشاسىندا قوعام قايراتكەرى ءام ەكس-دەپۋتات مۇرات ابەنوۆ.

ەلىمىزدە جۇمىسسىز جۇرگەندەردىڭ كوبىسى اۋىلدان قالاعا كەلگەن قازاق جاستارى. ونى "سەرپىن" باعدارداماسىن ىسكە اسىرىپ ءجۇرىپ جاقسى بىلەمىن. امال جوق، تۋعان ولكەسىنەن، اتا-اناسىنان الىستاپ قالاعا بارىپ جۇمىس ىزدەۋگە ءمəجبۇر. ولارعا بوس ورىن تابۋعا قانداي جاعداي جاسالعانىن بىلگىم كەلىپ "AstanaOpen" جوباسىنىڭ جوسپارى بويىنشا وتكەن اپتادا استانا قالاسىنىڭ حالىقتى جۇمىسپەن قامتۋ ورتالىعىندا بولدىم.

ورتالىقتىڭ كىرەبەرىستەن حالىق ءۇشىن جاعداي جاسالعانى كورىنىپ تۇر. ياعني جۇمىس ىزدەۋشىلەر ءۇشىن وتىراتىن ورىندار، بالالارعا ارنالعان كىشىگىرىم ويىن الاڭى، اقپاراتتىق تاقتايشىلار جانە ارنايى جۇمىسسىزدارعا وزدەرى بوس ورىن ىزدەيتىن اقپاراتتىق جيىنتىعى بار "enbek.kz" سايتىنىڭ پاراقشاسى اشىلعان كومپيۋتەرلەر قويىلعان.

ءبىر توپ كومپيۋتەردە وتىرعان جۇمىس ىزدەۋشىمەن جەكە سويلەستىم. مەن ءۇشىن ونىڭ "قالاي جۇمىس ىزدەپ وتىرعانى، كورسەتىلىپ جاتقان قىزمەتتەرگە ريزا ما" دەگەن سۇراقتارعا جاۋاپ العىم كەلدى. ولار جاقىنداعان بويدان "Enbek.kz" ەلەكتروندى ەڭبەك بيرجاسى جۇمىسىنا ءوز شاعىمىن ءبىلدىردى.

"ەڭبەك پورتالىندا قازاق تىلىندە مۇلدەم اقپارات جوق" دەيدى.

سودان كەيىن الگى جىگىتپەن بىرگە ورتالىقتىڭ تولىق قىزمەتىن الۋ ماقساتىندا، حالىققا قىزمەت كورسەتۋ بولىمىنە باردىق. ورتالىق قىزمەتكەرىنەن اۋىزشا قازاق تىلىندە اقپاراتتار الدىق. الايدا، مەن "ەnbek.kz" ەلەكتروندى بيرجاسىنىڭ" مەملەكەتتىك تىلدە قىزمەت كورسەتپەيتىنى جايلى ەسكەرتۋلەر ايتقان ەدىم. بىراق، حالىقتى جۇمىسپەن قامتۋ ورتالىعىنىڭ قىزمەتكەرلەرى "ەلەكتروندى بيرجانىڭ" جۇمىسىنا قاتىستى ماسەلەنى شەشە المايتىندىعىن اتاپ ءوتتى. 

بىرگە وتىرىپ مىناداي كەمشىلىكتەردى تىركەدىك - «بوس ورىندار» تۋرالى مالىمەتتەر، ماماندىق اتاۋلارى بارلىعى تەك ورىس تىلىندە تولتىرىلعان.
قايتا-قايتا قازاق ءتىلىن تاڭداپ كوردىك. مىسالى كوپ تالاپ ەتىلەتىن ماماندىق - "دانەكەرلەۋشى" دەپ ىزدەپ كوردىك. انا تىلىمىزدە بوس ورىندار تۋرالى اقپارات شىقپادى. ال ورىس تىلىندە "سۆارششيك" دەپ كورسەتىپ ەدىك كوپتەگەن بوس ورىن تابىلدى.
سوندا "دانەكەرلەۋشى" بولىپ جۇمىسقا تۇرۋ ءۇشىن ورىس ءتىلىن ءبىلۋ مىندەتتى ما؟ 

وسىندا ءبىر كۇردەلى سۇراق تۋىندايدى: جۇمىس ىزدەۋشى قازاق تىلىندە سويلەپ-تۇسىنەتىن عانا ازامات دەلىك، ەندەشە ول اتالمىش بازاعا كىرىپ نەنى تۇسىنەدى؟

بۇل – سايتتى ازىرلەۋشى، ياعني ەڭبەك جانە حالىقتى الەۋمەتتىك قورعاۋ مينيسترلىگى قازاقستان رەسپۋبليكاسى كونستيتۋتسياسىنىڭ 7-بابىنا سايكەس ازاماتتاردىڭ كونستيتۋتسيالىق قۇقىقتارىن ورەسكەل بۇزىپ وتىر دەگەن ءسوز.

سونىمەن قاتار، «ءتىل تۋرالى زاڭنىڭ» بىرنەشە باپتارى بويىنشا زاڭبۇزۋشىلىقتار بار.

دەيتۇرعانمەن، حالىقتى جۇمىسپەن قامتۋ ورتالىعىنىڭ جۇمىسىن ءوزىم كورگەننەن كەيىن پىكىرىم وڭ. ورتالىق قىزمەتكەرلەرى بار مۇمكىندىگىنشە حالىقتى جۇمىسپەن قامتۋعا تىرىسىپ، ءوز قىزمەتى شەڭبەرىندە تالماي ەڭبەكتەنۋدە. ەسكەرتۋلەر بار. ەسكەرتۋلەر مەن شاعىمداردى ورتالىق ديرەكتورىنا ءوزىم جەكە جەتكىزدىم. ونىڭ «دۇرىستايمىز» دەگەن جاۋابىن الدىم.

ال قر ەڭبەك جانە حالىقتى الەۋمەتتىك قورعاۋ مينيسترلىگى بۇل زاڭ بۇزۋشىلىقتى تەز ارادا توقتاتۋ كەرەك. ازاماتتار ءوز ەلىندە مەملەكەتتىك تىلدە مەملكەتتىك مەكەمەدەن قىزمەت تالاپ ەتۋگە قۇقىعى بار.

وسى ەلەكتروندى بيرجاعا جۇمسالعان قارجىنى تەكسەرۋدى تالاپ ەتەمىز. ەگەر تەك ءبىر تىلدە جاسالعان بولسا - وندا قازاق تىلىنە بولىنگەن قارجى قايدا كەتتى؟

مۇرات ابەنوۆ

Abai.kz