جۇما, 13 جەلتوقسان 2019
1641 2 پىكىر 16 قاڭتار, 2018 ساعات 09:23

وزبەك ءدىني باسقارماسى اقش مەملەكەتتىك دەپارتامەنتىنىڭ بايانداماسىن "قاتە" دەيدى

وزبەكستان مۇسىلماندارى ءدىني باسقارماسى اقش مەملەكەتتىك دەپارتامەنتىنىڭ ءدىن ەركىندىگى تۋرالى بايانداماسىن "قاتە" دەپ ەسەپتەيدى. ۆاشينگتون وزبەكستاندى ازاتتاردىڭ ءدىني نانىم-سەنىم ەركىندىگىن بۇزاتىن ون ەلدىڭ قاتارىنا ەنگىزگەن ەدى.

"ايتا كەتەرلىك جايت، باياندامانى قۇراستىرعاندار وزبەكستاندا جۇمىس ىستەيتىن 16 ءدىني كونفەسسيا ۇيىمىنان اقپارات سۇراماعان. اتاپ ايتقاندا، مۇسىلماندار ءدىني باسقارماسى، تاشكەنت يسلام ۋنيۆەرسيتەتى جانە يمام بۇحار اتىنداعى حالىقارالىق عىلىمي-زەرتتەۋ ورتالىعىنا ەشكىم حابارلاسپاعان.

بەلگىسىز دەرەككوزدەرگە سۇيەنگەن امەريكالىق ماماندار وزبەكستانداعى ءدىن ەركىندىگىنە قاتىستى جالعان قورىتىندى جاساعان", - دەلىنگەن ءدىني باسقارما مالىمدەمەسىندە.

باسقارما دەرەگى بويىنشا، وتكەن جىلى ءدىن سالاسىندا ەلەۋلى وزگەرىستەر بولدى. اتاپ ايتقاندا، يسلام وركەنيەتى ورتالىعى جانە يمام بۇحاري جانە يمام ات-تەرميزي اتىنداعى حالىقارالىق زەرتتەۋ ورتالىعى اشىلعان. وبلىستاردا يسلام عىلىمىن زەرتتەۋگە ارنالعان بەس عىلىم مەكتەپ جۇمىس ىستەي باستادى.

رەسپۋبليكا بويىنشا 15 مەشىت سالىنىپ، 55-ءى جوندەلدى، دەپ حابارلادى وزبەكستان مۇسىلماندارىنىڭ ءدىني باسقارماسى.

Abai.kz

2 پىكىر