سارسەنبى, 19 اقپان 2020
1704 0 پىكىر 1 اقپان, 2018 ساعات 09:34

قىرعىزستان جانە تاجىكستان پرەزيدەنتتەرى شەكارا ماسەلەسىن تالقىلايدى

قىرعىزستان پرەزيدەنتى سوورونباي جەەنبەكوۆ 1-2 اقپاندا رەسمي ساپارمەن دۋشانبەگە بارادى. بۇل تۋرالى 31 قاڭتاردا مەملەكەت باسشىسى اپپاراتى سىرتقى ىستەر ءبولىمىنىڭ مەڭگەرۋشىسى ايزادا سۋباكوجوەۆا جۋرناليستەرگە حابارلادى.

ونىڭ ايتۋىنشا، جەەنبەكوۆ تاجىكستان باسشىسى ەمومالي راحمونمەن شاعىن جانە كەڭەيتىلگەن توپتارمەن كەزدەسۋ وتكىزەدى.

ساپار بارىسىندا قىرعىز-تاجىك مەملەكەتتىك شەكاراسىن دەليميتاتسيالاۋ جانە دەماركاتسيالاۋ ماسەلەلەرى جونىندە پىكىر الماسۋ وتەدى.

"كۇن تارتىبىندە بىرنەشە وزەكتى ماسەلە قارالادى. ساۋدا-ەكونوميكالىق ارىپتەستىك ماسەلەلەرى ءسوز بولادى. ەكى ەل اراسىنداعى ساۋدا اينالىمى ءوسىپ كەلەدى، بىراق ونىڭ مولشەرى ودان دا كوپ بولۋى كەرەك. سول سەبەپتى تاراپتار وسى باعىتتا جۇمىس ىستەيدى", - دەدى ايزادا سۋباكوجوەۆا.

قىرعىزستان مەملەكەتتىك شەكارا قىزمەتىنىڭ مالىمەتى بويىنشا، 2017 جىلى رەسپۋبليكانىڭ تاجىكستانمەن شەكاراسىندا جانجال تۋعىزاتىن وقيعالار كوپ تىركەلگەن.

قىرعىزستان مەن تاجىكستان اراسىنداعى شەكارا 971 شاقىرىمعا سوزىلىپ جاتىر، سونىڭ 519 شاقىرىمىنىڭ مارتەبەسى انىقتالماعان. ەكى ەل شەكاراسىندا شامامەن 70 داۋلى جەر تەلىمى بار.

Abai.kz

0 پىكىر