تاجىكستاننىڭ مادەنيەت مينيسترلىگى ۇلتتىق ناقىشتاعى كيىم ۇلگىلەرىن كوپشىلىك نازارىنا ۇسىندى. مينيسترلىك كيىمدەردىڭ ءتۇرلى نۇسقالارىن دايىنداعان: كۇندەلىكتى كيەتىن كويلەك، قالا ساياباعىندا سەرۋەندەۋگە ارنالعان كيىم، تەاتر جانە كونتسەرت زالدارىنا كيەتىن كويلەك، سالتاناتتى كويلەك.

جاڭا كيىم ۇلگىلەرىن تانىستىرعاندار اراسىندا كۋلياب قالاسىنىڭ 51 جاستاعى تۇرعىنى حوسيات شەروۆا دا بار. ول - "يسلام مەملەكەتى" ساپىندا سيريادا وققا ۇشقان تاجىك سودىرىنىڭ اناسى. باحتيەر شەروۆ 2014 جىلى سيريادا ولتىرىلگەن دەلىنەدى.

اناسى ۇلتتىق كيىم كيگەنىن بالاسى جاقتىرمايتىنىن ايتقان. "ول مەنىڭ اراب كيىمىن كيگەنىمدى قالاسا كەرەك. "وزگە مادەنيەتتىڭ" جەتەگىندە كەتكەن بالام اقىرى يم ساپىنا قوسىلىپ كەتتى", - دەيدى حوسيات شەروۆا. ەندى ول "وزگە مادەنيەتپەن" كۇرەسۋدى قولعا العان.

"حوسيات شەروۆا ءوزىنىڭ كيىم ۇلگىلەرىن كورسەتتى، ولار بىزگە قاتتى ۇنادى. حوسيات - بارلىق مادەني شاراعا قاتىساتىن بەلسەندى ايەل", - دەيدى كۋلياب ايماعى مادەنيەت باسقارماسىنىڭ باسشىسى حايرۋللو توحيروۆ.

Abai.kz