دۇيسەنبى, 25 ماۋسىم 2018
864 4 پىكىر 12 ناۋرىز, 2018 ساعات 03:23

سي تسزينپين بيلىكتە ماڭگى وتىرسا دا ءوز ەركى

بۇكىلقىتايلىق حالىق وكىلدەرى جينالىسى ەل پرەزيدەنتى سي ءتسزينپيننىڭ بيلىكتە وتىرۋ مەرزىمىن شەكتەيتىن باپتى وزگەرتۋدى باسىم كوپشىلىك داۋىسپەن ماقۇلدادى. ناۋرىزدىڭ 11-ءى كۇنى پەكيندەگى جيىندا ءۇش مىڭعا جۋىق دەلەگاتتىڭ ەكەۋى قارسى داۋىس بەرگەن، تاعى ءۇش ادام داۋىس بەرۋدەن قالىس قالعان.

قىتاي كونستيتۋتسياسىنا ەنگىزىلگەن بۇل وزگەرىس سي تسزينپينگە بيلىكتە شەكسىز مەرزىمدە وتىرۋعا مۇمكىندىك بەرەدى.

قىتايدىڭ ءوز ىشىندە وزگەشە ويعا قاتاڭ شەكتەۋ سالىنعان، ايتكەنمەن شەتەلدە ءبىلىم الىپ جاتقان قىتايدىڭ كەي ازاماتتارى جاڭا وزگەرىسكە قاتىستى الاڭداۋشىلىق بىلدىرگەن. سان-ديەگوداعى كاليفورنيا ۋنيۆەرسيتەتىندە سي ءتسزينپيننىڭ سۋرەتى مەن "Never My President" ("مەنىڭ پرەزيدەنتىم ەمەس") دەگەن پلاكاتتار ىلگەن. ودان وزگە كەمىندە تاعى سەگىز ۋنيۆەرسيتەتتە (اراسىندا اۆسترالياداعى وقۋ ورنى دا بار) قىتاي بيلىگىنىڭ شەشىمىنە قاتىستى سىن ايتىلعان.

بۇعان دەيىن كونستيتۋتسيادا قىتاي توراعاسى قىزمەتىنە ءبىر ادامنىڭ ەكى مەرزىمنەن ارتىق سايلانۋىنا شەكتەۋ قويىلىپ كەلگەن. مۇنداي ەرەجە زاڭعا 1982 جىلى قىتايدىڭ سول كەزدەگى باسشىسى دەن ءسياوپيننىڭ باستاماسى بويىنشا ەنگىزىلگەن. قىتاي حالىق رەسپۋبليكاسى قۇرىلعان 1949 جىلدان باستاپ 1976 جىلى قايتىس بولعانعا شەيىن ەلدى ۇزدىكسىز باسقارعان ماو تسزەدۋننىڭ تۇسىنداعىداي ومىرلىك ديكتاتۋرا قايتالانباسى ءۇشىن بيلىك جۇيەسىنە الگىندەي وزگەرىس ەنگىزىلگەن ەدى.

Abai.kz

4 پىكىر