وزبەك عالىمدارى ەندى اباي مۇراسىن زەرتتەۋمەن اينالىسادى. وزبەكستاننىڭ ەكىنشى پرەزيدەنتى شاۆكات ميرزيەەۆ پارمەن بەرىپ، جارلىق شىعارىپتى.

13-ناۋرىز كۇنى وزبەكستان پرەزيدەنتى شاۆكات ميرزيەەۆ اباي قۇنانبايۇلىنىڭ مۇراسىن زەرتتەۋگە جانە حالىق اراسىندا كەڭىنەن ناسيحاتتاۋعا بايلانىستى قۇجاتقا قول قويدى. قۇجاتتىڭ باستى ماقساتى - قازاقستان مەن وزبەكستان اراسىنداعى مادەني-گۋمانيتارلىق قارىم-قاتىناستى دامىتۋ جانە وزبەك جاستارىن قازاق ادەبيەتىمەن تانىستىرۋ.

وزبەكستان رەسپۋبليكاسى پرەزيدەنتىنىڭ 2018 جىلدىڭ 13-ناۋرىزى كۇنگى №پج-3598 جارلىعىنىڭ نەگىزگى مازمۇنى مىناداي:

ۇلى اقىن، ويشىل اباي قۇنانبايۇلىنىڭ ەسىمى ءام ونىڭ شىعارماشىلىق باي مۇراسى – گۋمانيزم مەن ىزگىلىكتىڭ ەڭ جوعارعى يدەالى. ول تەك قازاق حالقىنا عانا ەمەس، بۇكىل تۇركى جۇرتىنا، سونىڭ ىشىندە ءبىزدىڭ وزبەك حالقى ءۇشىن دە وشپەس ءىز، باي رۋحاني مۇرا قالدىردى.

اباي قۇنانبايۇلىنىڭ بار ءومىرى مەن شىعارماشىلىعى وتانعا قالتقىسىز ادال قىزمەت ەتۋدىڭ، ونىڭ ۇلتتىق قۇندىلىقتارىن ءسۇيۋدىڭ جارقىن ۇلگىسى.

قازاقستان مەن وزبەكستان اراسىنداعى بايلانىس بۇگىنگىدەي جاڭا بەلەسكە شىققان ۋاقىتتا، اباي قۇنانبايۇلى سەكىلدى تۇلعالاردىڭ وشپەس مۇرالارىن ناسيحاتتاۋ، زەرتتەۋ ءبىز ءۇشىن ماڭىزدى بولماق.

ەكى ەلدىڭ اراسىنداعى تۋىستىق قارىم-قاتىناستى نىعايتۋ جانە مادەني-گۋمانيتارىق بايلانىستى ارتتىرۋ، سونداي-اق، وزبەكستان قوعامىن، اسىرەسە، جاس بۋىندى قازاق ادەبيەتىمەن جاقىن تانىستىرۋ ماقساتىندا:

1.مادەنيەت مينيسترلىگىنە، ورتا جانە جوعارعى الەۋمەتتىك ءبىلىم مينيسترلىگىنە، ۇلتتىق ءبىلىم مينيسترلىگىنە، سىرتقى ىستەر مينيسترلىگىنە، وزبەكستاننىڭ باسپا ءىسى جانە اقپارات اگەنتتىگىنە، وزبەكستاننىڭ جازۋشىلار وداعىنا، عىلىم اكادەمياسىنا، ءدىني باسقارماسىنا، مينيسترلەر كابينەتى جانىنداعى حالىقارالىق قاتىناستار كوميتەتىنە جانە ازاماتتىق قوعام وكىلدەرىنە - اباي قۇنانبايۇلىنىڭ مۇراسىن زەرتتەۋ جانە حالىق اراسىندا كەڭىنەن ناسيحاتتاۋ تۋرالى قابىلدانعان قۇجات نەگىزىندە جۇمىس جاساۋعا;

2.قۇجات نەگىزىندە  ۇلى اقىن، ءارى ويشىل اباي قۇنانبايۇلىنىڭ مۇراسىن زەرتتەۋ جانە حالىق اراسىندا كەڭىنەن ناسيحاتتاۋ ءىسى بويىنشا ۇيىمداستىرۋ كوميتەتىنىڭ قۇرامىن بەكىتۋگە;

3.ۇيىمداستىرۋ كوميتەتىنە 1 ايدىڭ ىشىندە ءتيىستى شارالاردىڭ جوسپارىن ازىرلەۋگە;

ونىڭ ىشىندە:

-اباي قۇنانبايۇلىنىڭ شىعارمالار جيناعىن باسپاعا ازىرلەۋگە جانە جارىققا شىعارۋعا، «قازاق-وزبەك ادەبي بايلانىسى» ادەبي-ساراپتامالىق ماقالالار جيناعىن شىعارۋعا;

-تاشكەنتتەگى «نيزامي» اتىنداعى  مەملەكەتتىك پەداگوگيكالىق ۋنيۆەرسيتەتىندە «اباي جانە وزبەك ادەبيەتى» ەكسپوزيتسياسىن ۇيىمداستىرۋعا;

-جىل سايىن اقىننىڭ تۋعان كۇنىندە، ياعني 10-تامىز كۇنى تاشكەنتتەگى اباي ەسكەرتكىشى الدىندا سالتاناتتى ءىس-شارا وتكىزۋگە;

-جىل سايىن وزبەكستان جوو ستۋدەنتتەرى اراسىندا «اباي شىعارمالارىنىڭ بىلگىرى» اتتى كونكۋرس وتكىزۋگە;

-اقىننىڭ ءومىرى مەن شىعارماشىلىعى جايىندا باق-تا، سونىڭ ىشىندە گازەت-جۋرنالدار مەن تەلە-راديولاردا ارنايى ماتەريالدار ازىرلەپ، جاريالاۋعا;

-وزبەكستاننىڭ ۇلتتىق تەلەراديوكومپانياسىنا اباي قۇنانبايۇلىنىڭ ءومىرى مەن شىعارماشىلىعى جايلى دەرەكتى فيلم ازىرلەۋگە جانە ناسيحاتتاۋعا;

-جالپى ءبىلىم بەرۋ مەكەمەلەرىندە، مامانداندىرىلعان ءبىلىم وشاقتارىندا، مەكتەپتەر مەن جوو-دا، اسكەري بولىمشەلەردە، ەڭبەك كوللەكتيۆتەرىندە ت.ب. قالامگەرلەرمەن كەزدەسۋلەر وتكىزىپ، اباي مۇراسى جونىندە كەڭىنەن ناسيحات جۇرگىزۋگە;

4.وزبەكستاننىڭ ۇلتتىق اقپارات اگەنتتىگىنە، وزبەكستاننىڭ ۇلتتىق تەلەراديوكومپانياسىنا، «جاحون» اقپاراتتىق اگەنتتىگىنە جانە وزگە دە بۇقارالىق اقپارات قۇرالدارىنا وسى جارلىقتى نەگىزگە الا وتىرىپ اۋقىمدى جۇمىستار جۇرگىزۋگە;

5.اتالعان جارلىقتىڭ ورىندالۋىن قاداعالاۋدى وزبەكستان رەسپۋبليكاسى پرەمەر-ءمينيسترى ا.اريپوۆكە جانە وزبەكستان رەسپۋبليكاسى پرەزيدەنتىنىڭ مەملەكەتتىك كەڭەسشىسى ح.سۇلتانوۆقا تاپسىرامىن!

Abai.kz