اقسۋ قانت زاۋىتىندا قاڭتار ايىندا باستالعان جاڭعىرتۋ جۇمىستارى ءالى دە جالعاسۋدا. جاڭعىرتۋدىڭ ءبىرىنشى كەزەڭىندە زاۋىتتا تەحنولوگيالىق قۇرال-جابدىقتار جاڭارتىلادى. اتاپ ايتقاندا جاڭا تسەنتريفۋگالار، ۆاكۋمدىق اپپاراتتار، فيلترلەر جانە باسقا دا قاجەتتى جابدىقتار قويىلادى. جالپى 3 جىلعا بەلگىلەنگەن كاسىپورىندى جاڭعىرتۋ جۇمىسىنا 12 ملرد. تەڭگە ينۆەستيتسيا باعىتتالماق.

اقسۋ قانت زاۋىتىنىڭ وندىرىستىك قۋاتى 12 مىڭ توننانى قۇرايدى. وتكەن جىلى قازان ايىندا ىسكە قوسىلعان زاۋىتتا وسى ماۋسىمدا 67 797 توننا قانت قىزىلشاسى وڭدەلىپ، 4 مىڭ توننا قانت الىنعان.

«بۇرىن كوكسۋ ادانىنا ارنايى اپارىپ وتكىزەتىنبىز. 150 شاقىرىم جەردە ورنالاسقان اۋدان ورتالىعىنا ءبىر اق رەت اپارامىز، ونىڭ ۇستىنە كەزەكتە تۇراتىنبىز. زاۋىتتىڭ قايتا ىسكە قوسىلعانى قانداي جاقسى بولدى، كۇنىنە 4-5 رەت ءتاتتى ءتۇبىردى الىپ كەلىپ وتكىزەمىز»، - دەيدى شەكە شارۋا باۋىرجان ايمۇحانوۆ.

اقسۋ قانت زاۋىتىنىڭ ديرەكتورى مۇرات تولەگەنوۆتىڭ ايتۋىنشا، بيىل جاڭعىرتۋدىڭ ءبىرىنشى كەزەڭىنەن كەيىن 140 مىڭ توننا ءتاتتى ءتۇبىر وڭدەۋگە مۇمكىندىك تۋماق. زاۋىتتا جومدى سىعىپ، قاپتايتىن تەحنولوگيالىق جەلىنىڭ ورناتىلىپ، ىسكە قوسىلاتىنى وسى جىلدىڭ باستى جاڭالىعى بولماق.

«ءبىز جومدى سىعىپ، قاپتايتىن يتالياندىق قۇرال-جابدىق ساتىپ الىپ جاتىرمىز. ەگەر بۇرىن جوم 4 ايدان ارتىق ساقتالمايتىن بولسا، اتالمىش تەحنولوگيالىق جەلىنى ساتىپ العاننان كەيىن بۇل پايدالى مال ازىعى ءبىر جىلعا دەيىن ساقتالىنادى. قازىر اقسۋ، سارقان، الاكول اۋداندارىندا ءبىزدىڭ دايىن ونىمدەرىمىزدى ساتىپ الۋعا نيەت ءبىلدىرىپ وتىرعان ءسۇت تاۋارلى فەرمالار، شارۋا قوجالىقتارى بار. تاۋار وتكىزۋ نارىعىن ودان ءارى كەڭەيتۋ دە ويىمىزدا. سونىمەن قاتار، زاۋىتتا بيىلعى جىلى سالماعى 25 پەن 50 كەلىلىك قانتتاردى قاپتايتىن 3 زاماناۋي جەلى ىسكە قوسىلادى. سونداي-اق، قۇرال-جابدىقتاردى جاڭعىرتۋ مەن جاڭاسىن ورناتۋ جۇمىستارى دا ءجۇرىپ جاتىر»، - دەدى مۇرات تولەگەنوۆ.

كەلەسى جىلى اتقارىلاتىن ەكىنشى كەزەڭدە جىلۋ ەلەكتر ورتالىعى جاڭعىرتىلىپ، وعان 4 جاڭا قازاندىق پەن تۋربينا ورناتىلماق. سول سياقتى بۋ گەنەراتورلارى دا اۋىستىرىلادى. جالپى زاۋىتقا رەسەيلىك، ۋكرايندىق، شۆەدتىك، يتالياندىق، گەرمانيالىق قۇرال-جابدىقتار دا قويىلادى.

زاۋىت باسشىسىنىڭ ايتۋىنشا، قازىر زاۋىتتا 190 ادام ەڭبەك ەتەدى، كوكتەمگى-جازعى ماۋسىمدا 250-280 ادام، ال ماۋسىمىنا 600 ادام جۇمىس ىستەيدى.

وبلىستىڭ قانت قىزىلشاسىن ءوسىرۋدى بۇدان ءارى دامىتۋ جوسپارلارىن ايتا كەلە وبلىس اكىمىنىڭ ورىنباسارى سەرىكجان بەسكەمپىروۆ ءوڭىردىڭ كوكتەمگى ەگىسكە دايىن ەكەنىن اتاپ ءوتتى.

«قانت قىزىلشاسىنىڭ فرانتسۋزدىق جانە نەمىس تۇقىمى ساتىپ الىنىپ، ولار قازىر ساراپتامادان وتكىزىلۋدە. 1 ساۋىردەن باستاپ بۇل تۇقىمدار شارۋالارعا بەرىلە باستايدى. سول سياقتى بيىلعى جىلى سولياركا جەڭىلدىكپەن بەرىلەدى. وعان وبلىس بويىنشا 6 وپەراتور بەلگىلەنىپ، جۇمىس ىستەيدى. بارلىق اۋىل شارۋاشىلىعى تەحنيكالارى دايىن. بيىلعى جىلى وڭىردە قانت قىزىلشاسىنىڭ القابىن 12 مىڭ گەكتارعا جەتكىزۋدى جوسپارلاپ وتىرمىز»، - دەيدى سەرىكجان بەسكەمپىروۆ.

ايتا كەتەيىك، وتكەن جىلى الماتى وبلىسىندا قانت قىزىلشاسىنىڭ القابى 9,2 مىڭ گا، ال قانت قىزىلشاسىنىڭ جالپى ءونىم جيىنتىعى 334 مىڭ توننا بولدى، كوكسۋ جانە اقسۋ قانت زاۋىتتارى 31 مىڭ توننا قانت شىعاردى.

الماتى وبلىسى اكىمدىگىنىڭ ءباسپاسوز قىزمەتى

Abai.kz