رەسەيدىڭ سىرتقى ىستەر ءمينيسترى سەرگەي لاۆروۆ كۇنى كەشە عانا مالىمدەمە جاساپ، قازاقستاننىڭ ىشكى شارۋاسىنا ارالاسقان ەدى. بۇعان قاتىستى "سىرتقى ساياساتتاعى ءار قادامىمىز ءۇشىن لاۆروۆتان رۇقسات الامىز با؟"  دەگەن ماقالا جازعان ەدىك.

"قازاقستان اقش-پەن ۆيزاسىز رەجيم ورناتۋى ءۇشىن بىزبەن اقىلداسۋى كەرەك ەدى. مۇنداي ماسەلە مىندەتتى تۇردە كەلىسىم جاساۋدى تالاپ ەتەدى. سەبەبى، ەۋرازيالىق وداق اياسىندا دا ۆيزاسىز رەجيم ورناعان. ادامدار ەمىن-ەركىن كەلىپ-كەتىپ ءجۇر", - دەپ شالا بۇلىنگەن. وعان قوسا، بۇل جونىندە ماسەلە قازاقستاننىڭ سىرتقى ىستەر ءمينيسترى قايرات ابدىراحمانوۆپەن سويلەسەتىنىن ايتقان.

باسقا مەملەكەتتىڭ ىشكى شارۋاسىنا ارالاسپاسا باسى اۋىرىپ، بالتىرى سىزدايتىن كرەمل ساياساتكەرى، ساياساتكەرى دەگەندى تىرناقشاعا الىپ، داۋكەسى دەۋگە بولاتىن (ديپلومات الەم ەلدەرىمەن ديالوگ قۇرۋدى باستى ماقسات ەتۋى كەرەك. ايتكەنمەن، لاۆروۆتىڭ بىتىمگە كەلۋىنەن، كەرتارتپالىعى باسىم) سەرگەي لاۆروۆتىڭ ادەتكى تىرلىگى عوي بۇل. قازاقستان  رەسەيدەن باسقا ەلدەرمەن ديالوگ جاساي قالسا، وسىلاي كۇڭكىلدەپ وتىرادى.

وكتەم سويلەپ ۇيرەنىپ قالعان رەسەي ساياساتكەرلەرى نەمەسە سولاردىڭ سويىلىن سوعاتىندار سويقاندى ارەكەتكە بارعان سايىن ءبىزدىڭ بيلىكتىڭ دە ءيىنى ءتۇسىپ، ءيى كەتىپ قايتكەندە ورىستىڭ قىبىن تاۋىپ، ىعىنا جىعىلۋعا بەيىم تۇراتىن ادەتى بار ەدى. سول جامان ادەتتەن بىرتە-بىرتە ارىلىپ كەلە جاتقاندايمىز.

كەشەگى لاۆروۆتىڭ لەپىرىپ سويلەگەنىنە بۇگىن قازاقستاننىڭ سىرتقى ىستەر مينيسترلىگى جاۋاپ بەرىپتى. الگى قازاقستان مەن اقش اراسىنداعى ۆيزاسىز رەجيم جايلى ايتقان.

"قانداي دا ءبىر مەملەكەتتىڭ ادامدارىنا ۆيزالىق رەجيمدى الىپ تاستاۋ نەمەسە ورناتۋ ول - كەز كەلگەن تاۋەلسىز مەملەكەتتىڭ ىشكى شارۋاسى. كەز-كەلگەن تاۋەلسىز مەملەكەتتىڭ قۇقىسى بار. ەۋرازيالىق وداق - ساياسي بىرلەستىك ەمەس. ەاەو-نى قۇراتىن كەزدە سانالى تۇردە بۇل ۇيىمدى ساياسيلاندىرۋدان باس تارتقانبىز. ونىڭ ىشىندە ۇلتتىق، مەملەكەتتىك سۋۆەرەنيتەت ماسەلەسى دە كىرەدى".  

بۇل ءسوزدى قر سىرتقى ىستەر مينيسترلىگىنىڭ ءباسپاسوز قىزمەتىنىڭ جەتەكشىسى ءانۋار جايناقوۆ ايتقان.

"ەۋرازيالىق ەكونوميكالىق وداق ساياسي ماسەلەلەردى شەشۋمەن ەمەس، ەكونوميكالىق ماسەلەلەردى شەشۋمەن اينالىسۋى كەرەك", - دەپتى ءانۋار جايناقوۆ.

نۇرگەلدى ابدىعانيۇلى

Abai.kz