اتامىز قازاق: «بالە – قايدا دەمە، اياق استىندا» دەگەندى كورەگەندىكپەن ايتقان. ورىستىڭ كەمەرەۆوسىندا ويىن-ساۋىق ورتالىعىنا كوڭىل كوتەرۋگە بارعان ونداعان ادامدار (اراسىنداعى باسىم بولىگى كۇناسىز سابيلەر...) تاعدىردىڭ جازۋىمەن ۇيلەرىنە ماڭگى قايتپاي قالدى...

كەمەروۆو قالاسىندا ساۋدا ورتالىعىنداعى ءورت قۇرباندارىنىڭ تۋىستارى ورتتەن 41 بالا قازا تاپقانىن مالىمدەدى. قازا تاپقان بالالاردىڭ ءتىزىمى تۋىستارى قۇرعان شتابتا جازىلىپ، ءىلىندى...

ناۋرىزدىڭ سوڭعى كۇندەرىندە كەمەروۆو قالاسى اكىمدىگىنىڭ الدىنا جۇزدەگەن قالا تۇر­عىنى جينالدى. ولار بيلىكتەن ءورت پەن قۇربان­دار تۋرالى شىنايى اقپارات بەرۋىن تالاپ ەتكەن. جينالعانداردىڭ كوپشىلىگى بيلىكتىڭ ءورت قۇرباندارى تۋرالى ەسەبىنە سەنبەيدى. نارازى جۇرت سونىمەن قاتار كەمەروۆو وبلىسىنىڭ گۋبەرناتورى امان تولەەۆتىڭ وتستاۆكاعا كەتۋىن تالاپ ەتكەن.

«زيمنيايا ۆيشنيا» ساۋدا جانە ويىن-ساۋىق ورتالىعىندا ءورت 25 ناۋرىز كۇنى كۇندىز باستالعان. رەسەي تەرگەۋ كوميتەتىنىڭ مالىمەتى بويىنشا، ورتتەن 64 ادام قازا تاپتى. بىراق، كۋاگەرلەر ءىس جۇزىندە قۇرباندار سانى «بۇدان الدەقايدا كوبىن» ايتادى...

كەشە عانا سايلاۋدا جەڭىسكە جەتكەن رەسەي پرەزيدەنتى ۆلاديمير پۋتين كەمەروۆو قالاسىنا جىلدام ۇشىپ باردى. ول ورتەنگەن «زيمنيايا ۆيشنيا» ساۋدا ورتالىعىندا قۇربان بولعانداردى ەسكە الاتىن ورىنعا گۇل قويىپ، قايعىلى وقيعاعا «سالاقتىق پەن ۇقىپسىزدىق» سەبەپ ەكەنىن مالىمدەدى.
ورىس ورمانىنداعى قانى قازاق جالعىز قازاق-گۋبەرناتورى امان تولەەۆ حالىققا ۇندەۋ جاريا­لاپ، ءوزىنىڭ قىزمەتىنەن كەتەتىندىگىن ءمالىم ەتتى... وسى كۇندەرى قازاقتىڭ ۇكىمەتباسى باقىتجان ساعىنتاەۆ ەلدەگى ساۋدا جانە ويىن-ساۋىق ورتالىقتارىنىڭ ءورت قاۋىپسىزدىگى تالاپتارىنا قانشالىقتى ساي ەكەنىن تەكسەرۋدى تاپسىردى.

«كەمەروۆوداعى ساۋدا ورتالىعىندا بولعان قايعىلى وقيعا بىزگە ساباق بولۋى ءتيىس. ىشكى ىستەر مينيسترلىگى ءورت ءسوندىرۋ قىزمەتىمەن جانە اكىم­دىكتەرمەن بىرىگىپ، ساۋدا ۇيلەرىندە تەكسەرۋ جۇرگىزىپ، قاجەتتى شارالاردى جاساۋى ءتيىس»، – دەدى باقىتجان ساعىنتاەۆ ۇيقىدان شوشىپ ويانعانداي...ءاي، قايدام! «بارماق باستى، كوز قىستى» ءھام سىبايلاس جەمقورلىق ورتتەي لاۋلاعان ەلدەردە قاۋىپسىزدىك تۋرالى ايتۋدىڭ ءوزى ارتىق. كىم ءبىلسىن، ۇكىمەتباسىنىڭ تاپسىرۋىمەن بۇل ماسەلەنى باقى­لاۋعا الۋدى موينىنا جۇكتەگەن پرەمەردىڭ ءبىرىنشى ورىنباسارى اسقار ءمامين ءماجىلىس زالىنىڭ تابالدىرىعىنان شىققان العاشقى قادا­مىندا-اق اسا جاۋاپتى تاپسىرمانى ۇمىتىپ كەتتى مە ەكەن؟!.

ال، جۇزگە تارتا ادامدى جالماپ، مىڭداعان جاندى قايعىعا ۇشىراتقان كەمەروۆو ءورتىنىڭ نەدەن تۇتانعانى ازىرگە بەلگىسىز... باستى سەبەپتى بىرەۋلەر «سىبايلاس جەمقورلىق»-تان كورسە، كەلەسىلەرى «قازاق-گۋبەرناتورى امان تولەەۆتى قىزمەتىنەن كەتىرۋ ماقساتىندا ادەيى ۇيىمداستىرىلعان قاستاندىق» دەپ باعالايدى...

قالاي بولعاندا دا، مەيلىڭ جەمقورلىق پەن ۇر­لىق-قارلىق; مەيلىڭ قاپەرسىزدىك پەن قاستاندىق بول­سىن، ادامنىڭ ومىرىمەن ويناۋ – بىردەي قاۋىپتى...

قاجىمۇقان عابدوللا

Abai.kz