تالدىقورعانداعى سالتانات سارايىندا مادەنيەت جانە ونەر قىزمەتكەرلەرىنىڭ كاسىبي مەرەكەسىنە وراي سالتاناتتى جيىن ءوتىپ، ۇزدىكتەر ماراپاتتالدى. «ۇزدىك وبلىستىق مادەنيەت مەكەمەسى» نوميناتسياسىنىڭ جەڭىمپازى اتانعان تاريحي-مادەني مۇرانى قورعاۋ جونىندەگى ورتالىق وبلىس اكىمى اماندىق باتالوۆتىڭ قولىنان «لادا ۋربان» اۆتوكولىگىنىڭ كىلتىن الدى. وزگە دە جۇلدەگەرلەرگە ارنايى ديپلومدار مەن اقشالاي سىيلىقتار بەرىلدى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

مادەنيەت قىزمەتكەرلەرىن مەرەيلى مەرەكەسىمەن قۇتتىقتاعان وبلىس اكىمى سالا ماماندارىنىڭ ەل رۋحانياتىن دامىتۋداعى رولىنە توقتالىپ ءوتتى:

- قۇرمەتتى مادەنيەت جانە ونەر سالاسىنىڭ قىزمەتكەرلەرى! سىزدەردى بۇگىنگى ءتول مەرەكەلەرىڭىزبەن شىن جۇرەكتەن قۇتتىقتايمىن! ۇلت رۋحانياتى مەن مادەنيەتى جولىنداعى ەڭبەكتەرىڭىزگە شىعارماشىلىق تابىس تىلەيمىن. ءاربىر ەلدىڭ رۋحاني كۇشى – ونىڭ مادەنيەتىمەن ولشەنەدى. ءتول مادەنيەتىمىز بەن ونەرىمىزدىڭ قانات جايىپ، ۇرپاقتان-ۇرپاققا جالعاسۋىنا وسىندا وتىرعان بارشاڭىزدىڭ ۇلەسىڭىز بار دەپ سانايمىن، - دەدى.

بۇدان سوڭ وڭىردە وسى سالانى قولداۋعا باعىتتالعان شارالارعا دا توقتالىپ ءوتتى.

- ەلباسىنىڭ «رۋحاني جاڭعىرۋ» باعدارلاماسى مادەنيەت سالاسىنىڭ دامۋىنا تىڭ سەرپىن بەرىپ وتىر. باعدارلاما اياسىندا وڭىردەگى 243 مادەنيەت ءۇيىن قالپىنا كەلتىرىپ، قايتا جاڭعىرتاتىن بولامىز. جالپى وتكەن جىلى 3 مادەنيەت نىسانى جاڭادان سالىنىپ، 8 مادەنيەت نىسانىنا كۇردەلى جوندەۋ جۇمىستارى جۇرگىزىلدى. ال 20-دان استام مادەنيەت نىسانىنىڭ جوبالىق-سمەتالىق قۇجاتتامالارىن ازىرلەۋگە، كۇردەلى جوندەۋى مەن قۇرىلىسىنا بارلىعى 2,8 ملرد. تەڭگە قاراجات ءبولىنىپ وتىر. جاڭا دراما تەاترىنىڭ دا قۇرىلىسى اياقتالۋعا جاقىن، قىركۇيەك-قازان ايلارىندا قولدانىسقا بەرىلەدى. ءى.جانسۇگىروۆ اتىنداعى مادەنيەت سارايىنىڭ كۇردەلى جوندەۋ جۇمىستارىنا وبلىستىق بيۋدجەتتەن 331 ملن تەڭگە قارجى ءبولىندى، - دەپ اتاپ وتكەن وبلىس باسشىسى ا. باتالوۆ مۇنداي قولداۋ شارالارىنىڭ جالعاسا بەرەتىنىن جەتكىزدى.

سالتاناتتى جيىن ماراپاتتاۋ شاراسىمەن جالعاستى. جىل بويى تىنىمسىز ەڭبەك ەتىپ، جەمىستى ناتيجە كورسەتكەن ونەر ۇجىمدارى، مادەنيەت مەكەمەلەرى، جەكەلەگەن ونەر يەلەرى وبلىس اكىمى اماندىق باتالوۆتىڭ قولىنان ماراپات الدى. اتاپ ايتساق، «ۇزدىك مادەنيەت قىزمەتكەرلەرى» اتالىمى بويىنشا ءاربىر اۋدان، قالانىڭ 20 ونەرپازى قۇرمەتكە يە بولدى. ولاردىڭ قاتارىندا اۋداندىق مادەنيەت ۇيلەرىنىڭ، اۋىلدىق كلۋبتىڭ اۋداندىق مادەنيەت جانە تىلدەردى دامىتۋ بولىمدەرىنىڭ ماماندارى بار. «ۇزدىك مادەنيەت ءۇيى»، «ۇزدىك كىتاپحانا»، «ۇزدىك مۋزەي»، «ۇزدىك حالىقتىق» جانە «ۇلگىلى ۇجىم» جانە باسقا دا نوميناتسيالار بويىنشا دا جەڭىمپازدار انىقتالدى. ماسەلەن، «ۇزدىك قولونەر شەبەرى» اتالىمىندا «ۇستا داركەمباي» مۋزەيىنىڭ سۋرەتشى رەستاۆراتورى قۇرمانعازى قادىروۆ قارا ءۇزىپ شىقسا، بيكەن ريموۆا اتىنداعى تالدىقورعان دراما تەاترىنىڭ ارتىستەرى كەندەباي تەمىربايۇلى مەن ءبىرجان شوشاباەۆ «ۇزدىك تەاتر ءارتىسى» اتاندى. «ۇزدىك ونەر ۇجىمى» رەتىندە «التىناي» بي ءانسامبلى تانىلدى. ولاردىڭ بارلىعىنا ارنايى ديپلوم مەن 100 مىڭ تەڭگەنىڭ سەرتيفيكاتى بەرىلدى.

«ۇزدىك وبلىستىق مادەنيەت مەكەمەسى» اتانعان وبلىستىق تاريحي-مادەني مۇرانى قورعاۋ جونىندەگى ورتالىققا «لادا ۋربان» اۆتوكولىگىنىڭ كىلتى تاپسىرىلدى.

سول سياقتى «مادەنيەت سالاسىنىڭ ۇزدىگى» توسبەلگىسى، قازاقستاندىق مادەنيەت، تۋريزم جانە اقپارات قىزمەتكەرلەرىنىڭ كاسىبي وداعىنىڭ «ەڭبەك داڭقى» توسبەلگىسى، قر مادەنيەت جانە سپورت مينيسترلىگىنىڭ جانە وبلىس اكىمىنىڭ قۇرمەت گراموتالارى مەن العىس حاتتارى تابىستالدى.

جيىندا ارىپتەستەرىن مەرەكەمەن قۇتتىقتاعان قازاقستاننىڭ حالىق ءارتىسى الماحان كەنجەبەكوۆا، «التىناي» بي ءانسامبلىنىڭ ءبيشىسى جۇلدىز ءابدىراحمانوۆا، ءى. جانسۇگىروۆتىڭ ادەبي-مەموريالدىق مۋزەيىنىڭ قىزمەتكەرى ايجان ورازباەۆا، «ءسۇيىنباي سازى» ءانسامبلىنىڭ جەكە داۋىستاعى ءانشىسى عاليا ابدىرەيىم جانە وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى اقان ابدۋاليەۆ شتات ءبولۋ، كونتسەرتتىك كيىم تىكتىرۋ، رەسپۋبليكانىڭ وزگە ايماقتارى مەن شەتەلگە گاسترولدىك ساپارلارعا شىعۋ، ماتەريالدىق تەحنيكالىق بازانى نىعايتۋ سياقتى ۇزدىكسىز قولداۋلارى ءۇشىن وبلىس باسشىلىعىنا ريزاشىلىقتارىن ءبىلدىردى. كەزدەسۋ سوڭىندا ءتىرى داۋىستاعى مازمۇندى، شاعىن كونتسەرتتىك نومىرلەر ۇسىنىلدى.

Abai.kz