تالدىقورعاندا ءتورتىنشى توقسان باستالعالى 8 وقۋشى ساباققا قاتىسپاعان. ەندىگى ورامال تاققان 11-سىنىپ وقۋشىسى ۇبت-عا كىرە الماۋى مۇمكىن. قالالىق ءبىلىم ءبولىمىنىڭ باسشىسى ورامال تاققان وقۋشىعا تەستىلەۋگە كىرمەيتىنىن كەسىپ ايتتى. بۇل تۋرالى 31 ارنا حابارلايدى.

11-سىنىپتا وقيتىن جانسايا قاماشەۆا «كيمەشەكتى شەشۋ مەككەدەگى قاعبا تاسىن قۇلاتقانمەن تەڭ» دەيدى. ول ورامالدى 3-ءىنشىن سىنىپتان بەرى تاعىپ كەلەدى ەكەن. ەندى التىن بەلگىگە ۇمىتكەر بولىپ وتىرعان قىز ورامال ءۇشىن ۇبت-عا كىرە الماۋى مۇمكىن.

«ءبىلىم الۋ قۇقىعىمىزدان ايىرىپ جاتىر. ءبىز نە ىستەيمىز؟ ءبىز نە ىستەۋىمىز كەرەك، ءبىزدى كىم قورعايدى؟ بارىنە كىرىپ شىقتىق، وبلىستىق، قالالىق ءبىلىم باسقارماسىنا، ءىىد، جەمقورلىققا قارسى باسقارمالاردىڭ بارىنە باردىق. ەشقايسىنان كومەك بولعان جوق. وبلىس اكىمى دە، قالالىق اكىم دە ماڭايلاتقان جوق»، – دەيدى جانسايا قاماشەۆانىڭ اناسى قۇرالاي مۇساحانوۆا.

سونىمەن قاتار №14 مەكتەپتە وقيتىن تاعى ءبىر وقۋشى ورامال ءۇشىن مەكتەپكە كىرە الماي جۇرگەن كورىنەدى.

«جەتەكتەپ شىعارىپ تاستايدى. ديرەكتوردىڭ ءوزى مەڭگەرۋشىمەن بىرگە شىعارىپ تاستايدى. بالالاردىڭ ساباققا كىرمەيتىنىن ايتادى. نەگە كىرمەيتىنىن سۇراسام، «باسىنداعى ورامالىن شەشسىن» دەيدى»، – دەيدى تالدىقورعان قالاسىنىڭ تۇرعىنى ايگۇل بولاتقىزى.

ال تالدىقورعان قالالىق ءبىلىم ءبولىمىنىڭ باسشىسى بۇل ارەكەتتەردىڭ زاڭدى ەكەنىن ايتۋدا. ولار ءبىلىم مينيسترلىگىنىڭ 2016 جىلى 26 قاڭتاردا بەكىتكەن 26-بۇيرىعىنىڭ اياسىندا وسىنداي شارا اتقارىلىپ جاتىر، دەيدى.

«سول بۇيرىقتىڭ 13-ءشى تارماعىندا ناقتى كورسەتىلگەن، ياعني مەكتەپ فورماسىنا ءتۇرلى ءدىني كونفەسسيالارى بار ەلەمەنتتەردى قوسۋعا بولمايدى. ءتورتىنشى توقسان بويى 8 وقۋشىنى ءبىز كىرگىزگەن جوقپىز. سەبەبى ءبىلىم ءمينيسترىنىڭ بۇيرىعى تالابىنىڭ ورىنداعان جوق. وسى سەبەپتى كىرگىزگەن جوقپىز.»، – دەيدى تالدىقورعان قالالىق ءبىلىم ءبولىمىنىڭ باسشىسى جاندوس جولدىحانوۆ.

ءبىلىم بولىمىندەگىلەردىڭ سوزىنشە، ءتورتىنشى توقساننان بەرى مەكتەپكە كىرە الماي جۇرگەن وقۋشىلار الدىڭعى توقسانداعى ۇلگەرىمىنە قاراپ قورىتىلاتىن بولادى. الايدا ولار ورامالىن شەشپەسە، جاڭا وقۋ جىلىندا دا مەكتەپكە كىرە المايدى.

Abai.kz