بۇگىن الماتى قالاسىندا ورنالاسقان حالىقارالىق ادام قۇقىقتارىن قورعاۋ ۇيىمىنىڭ قازاقستانداعى بيۋروسىنىڭ كەڭسەسىندە شەكارالىق پوليتسيا قىزمەتكەرلەرى الىپ كەتكەن سايراگۇل ساۋىتبايدى قولداعان ءبىر توپ بەلسەندى ءباسپاسوز جيىنىن وتكىزدى.

جيىنعا سايراگۇلدىڭ كۇيەۋى ءۋالي سىلام مەن ەكى بالاسى، قوعام بەلسەندىلەرى، "اتاجۇرت جاستارى ەرىكتىلەرى" بىرلەستىگىنىڭ جەتەكشىلەرى سەرىكجان ءبىلاش پەن قىدىرالى ورازۇلى جانە باق وكىلدەرى قاتىستى.

ءبىز سايراگۇلدىڭ كۇيەۋى ءۋالي سىلامدى سوزگە تارتىپ، 22-مامىر كۇنى بولعان وقيعانىڭ جاي-جاپسارىن سۇراپ بىلدىك.

ءۋالي سىلام، قر ازاماتى:

-مەنىڭ اتى-ءجونىم ءۋالي سىلام بولادى. كەلىنشەگىمنىڭ اتى-ءجونى سايرانگۇل ساۋىتباي. 1976 جىلدىڭ قىركۇيەك ايىندا تۋعان.

مىنە، كەلىنشەگىمدى الىپ كەتكەنىنە 4 كۇن بولدى.  ۇيگە كەلگەن كىسىلەر العاشىندا جىلى-جۇمساق سويلەپ: ء"بىز بارلىعىنا كومەكتەسەمىز. قۇجاتتارىڭدا جاساپ بەرەمىز. سەن بىزبەن بىرگە جۇرسەڭ بولدى"- دەدى. بىزگە ايتقان ۋاجدەرى - سايرانگۇل شەكارادان قاشىپ وتكەن ەكەن.

شىن مانىندە قىتايدا قىسىمعا شىداماي، جانىن شۇبەرەككە ءتۇيىپ، بەرى قاراي ءوتىپ كەتكەن. ۆيزاسى جوق.

ونىڭ قالاي وتكەنىن مەن سۇرادىم. ماعان دا ايتپاي قويدى. "بالالاردىڭ اماندىعى ءۇشىن مەن ايتپايمىن. مەن قازاقستاننىڭ ازاماتتىعىن العانشا ىشىمدە بولادى. ولتىرسەڭ دە ايتپايمىن" دەدى. مەن قايتا-قايتا سۇرادىم.

سول كۇنى سايرانگۇلدى الىپ كەتۋگە كەلگەن ازاماتتار قاراپايىم كيىمدە بولدى. بىرەۋى قىزمەتتىك كۋالىگىن كورسەتتى. باۋىرجان قۋانىش دەگەن جىگىت ەكەن. اسكەري شەنى - مايور. بۇلاردىڭ قايدان كەلگەنىن بىلمەدىم. كەيىن ءبىر بىلگەنىم - الماتىدان كەلىپتى.

كەلىنشەگىم قازىر قورعاستا وتىر. ونىڭ قازاقستانعا كەلگەنىنە 1 ايدان اسا ۋاقىت بولدى. شىنىن ايتسام، ءبىز قاتتى قورىقىپ وتىرمىز.

قىتايدا بالا-باقشا ديرەكتورى بولىپ قىزمەت ىستەگەن. ءوزىنىڭ ماعان ايتىپ بەرگەنى بويىنشا، ساياسي لاگەرگە ادام اپارعان، وقىتۋشى اپارعان. لاگەردىڭ جاعدايىن ءبىراز بىلەتىن كورىنەدى. ءوزى وقىتۋشى بولماعان.

وسى قازاقستانعا قاشاردىڭ الدىندا سايرانگۇلدىڭ ءوزىن جاڭاعى لاگەرگە قاماماق بولعان ەكەن. ءسويتىپ، جان ساقتاۋ ءۇشىن بەرى قاشقان.

سايرانگۇلدى اسكەريلەر قورعاسقا الىپ كەتىپ، ءىنىم سىزدەرگە حابارلاسقان سوڭ، ءبىزدىڭ بايدىبەك بي اۋىلىنداعى ۇيىمىزگە قارا دجيپ مىنگەن بەلگىسىز ءبىر ادامدار كەلىپ، قوقان-لوقى كورسەتتى. ول كەزدە ۇيدە مىنا ەكى بالام عانا جۇرگەن. وقيعا تۇستەن كەيىنگى ساعات 4-5 شاماسىندا بولعان.

سايرانگۇلدىڭ قىزى:

-ءداۋ قارا دجيپ مىنگەن ەكى ادام كەلدى. بىزگە قازاقشا سويلەدى. "مەن سەنىڭ اناڭا كومەكتەسەمىن" دەدى. مەنەن انامنىڭ قايدا ەكەنىن سۇرادى. مەن ايتپاي قويدىم. ول كەزدە انامدى اسكەريلەر الىپ كەتكەن ەدى. ۇيدە ءىنىم ەكەۋىمىز عانا بولعانبىز.

وزدەرىن تانىستىرعان جوق. بىراق، مەنىڭ جانە ءىنىمنىڭ اتىن بىلەدى ەكەن.

مەن پرەزيدەنتىمىزدەن سۇرايمىن، مەنىڭ انامدى قىتايعا جىبەرمەسىنشى. انام قىلمىسكەر ەمەس. ول ءبىز ءۇشىن قاشىپ كەلدى. انام ەگەر قىلمىسكەر بولسا، قازاقستاننىڭ تۇرمەسىندە بولسىنشى.

قوسىمشا: بۇگىن بەلگىلى ادۆوكات ابزال قۇسپان ءۋالي سىلام مەن "قورعاس" شەكارا بەكەتىندە قاماۋدا وتىرعان سايرانگۇل ساۋىتبەككە قۇقىقتىق كومەك كورسەتۋگە ءازىر ەكەندىگىن ايتىپ، "Abai.kz" اقپاراتتىق پورتالىنا ءوز پىكىرىن بىلدىرگەن ەدى. 

بۇگىن سايرانگۇلدىڭ كۇيەۋى ءۋالي سىلام نوتاريۋس ارقىلى ادۆوكات ابزال قۇسپاننىڭ اتىنا "سەنىمحات" جاساتقانى بەلگىلى بولدى.

ەستەرىڭىزگە سالا كەتەيىك، كۇنى كەشە عانا «Abai.kz» اقپاراتتىق پورتالىنىڭ رەداكتسياسىنا اسان نۇربولات ەسىمدى ازامات باس سۇعىپ، جەڭگەسى سايراگۇل ساۋىتبايدى شەكارالىق پوليتسيا (ۇقك) وكىلدەرى كەلىپ، الىپ كەتكەنىن حابارلادى. سودان كەيىن پورتالىمىزدا  «شەكارالىق پوليتسيا وكىلدەرى «قىتاي سۇراتىپ جاتىر» دەپ جەڭگەمدى الىپ كەتتى»  اتتى ماقالا جاريالاندى.

نۇرگەلدى ابدىعانيۇلى

Abai.kz