جەكسەنبى, 16 مامىر 2021
2528 0 پىكىر 31 مامىر, 2018 ساعات 09:23

قىرعىزستان تۇرمەسىندە ءۇش تۇتقىن اۋزىن تىگىپ تاستادى

قىرعىزستاننىڭ №16 تۇزەتۋ كولونياسىندا ءۇش تۇتقىن اۋىزدارىن تىگىپ تاستاعان. جازانى ورىنداۋ جونىندەگى مەملەكەتتىك قىزمەتى (جومق) مالىمەتىنشە، ولار وزدەرىن ايىپ يزولياتورىنا اۋىستىرۋىنا نارازىلىعىن وسىلاي كورسەتكەن.

«ۇشەۋى ىشكى ءتارتىپتى بۇزدى. ولار بىرنەشە رەت ءتارتىپتى بۇزعان. كولونيا باسشىلىعىنىڭ شەشىمىمەن ولار ءبىر ايعا ايىپ يزولياتورىنا جىبەرىلدى. ولار بۇل شەشىمگە نارازى بولىپ، ومبۋدسمەنگە شاعىمدانىپتى. اقيقاتشى ينستيتۋتىنىڭ وكىلى تۇرمەگە كەلىپ، زاڭدىلىقتىڭ ساقتالعانىن كوزىمەن كورىپ كەتتى»، - دەپ مالىمدەيدى جومق ءباسپاسوز حاتشىسى ەلەونورا ساباتاروۆا.

اۋىزدارىن تىگىپ تاستاعان ءۇش تۇتقعىننىڭ تۋىستارى ولاردى تۇرمەدە ءجيى ۇرىپ-سوعاتىنىن ايتىپ، اقيقاتشى ينستيتۋتىنا شاعىمدانعان. اتالعان ينستيتۋتتىڭ بوستاندىعى شەكتەلگەن مەكەمەلەردە ادام قۇقىقتارىنىڭ ساقتالۋىن باقىلايتىن ءبولىم باسشىسى البەرت كولوپوۆ 28 مامىردا تۇرمەگە كەلىپ، نارازىلىق بىلدىرگەندەردىڭ تىلەگىن تىڭداعان.

"ولاردى ءبىر ايعا ايىپ يزولياتورىنا اۋىستىرعان ەكەن. بۇل شەشىمگە نارازىلىق ءبىلدىرىپ، ۇشەۋى دە اۋىزدارىن تىگىپ، قارىندارىن جارعان. ولار وزدەرىن ناشار سەزىنەتىندەرىن، اۋرۋحاناعا اۋىستىرۋىن سۇرادى. بىرەۋى قولىنا دا زاقىم كەلتىرىپتى" دەدى البەرت كولوپوۆ.

باسشىلىقپەن كەلىسسوزدەن كەيىن تۇرمە ءتارتىبىن بۇزعان ءۇش تۇتقىندى ايىپ يزولياتورىنا ءبىر اي ەمەس، بەس كۇن وتىرعىزۋعا شەشىم قابىلدانعان. تۇتقىنداردىڭ اتى-ءجونى اتالمايدى.

Abai.kz

0 پىكىر