قر مادەنيەت جانە سپورت ءمينيسترى ارىستانبەك مۇحامەديۇلى «رۋحاني جاڭعىرۋ» لوگوتيپىنە قاتىستى ءوز پىكىرىن ءبىلدىردى، - دەپ جازادى Abai.kz اقپاراتتىق پورتالى.

جاپونيانىڭ قازاقستانداعى ەلشىسى يتيرو كاۆاباتامەن كەزدەسۋ بارىسىندا ءمينيستردىڭ كيىمىندە ءتۇرلى-ءتۇستى قىراننىڭ بەينەسى جارقىراپ تۇرعان.

«بۇل ءتوس بەلگىنى مەن ۇلكەن ماقتانىشپەن تاعىپ جۇرەمىن. وتە ادەمى، ەستەتيكالىق تالعاممەن جاسالعان. مەنىڭ ويىمشا، بۇل لوگوتيپتەن ءبىز ۇيالماۋىمىز كەرەك. ەمبلەما ادامدارعا رۋح سىيلاپ، جىگەرلەندىرەدى. وزدەرىڭىز كورگەندەي، سۋرەتتە ءجۇز پايىز سايكەستىك جوق. مەن ءوزىم كوردىم. كەيبىر جەرلەرىندە ۇقساستىقتار بار، ارينە، دەگەنمەن تۇستەرى ءار ءتۇرلى. بۇل ماسەلەدە بىرەۋدى پلاگيات جاسادى دەپ ايىپتاۋ دۇرىس ەمەس دەپ سانايمىن»، - دەدى ارىستانبەك مۇحامەديۇلى.

كونسەرۆوتوريادا ۆيولونچەل كلاسىن وقىپ بىتىرگەن مينيستر ءوز سوزىندە مۋزىكالىق نوتادان ۇلگى كەلتىردى. ءمينيستردىڭ ايتۋىنشا، ءبىر-ءبىرىن مۇلدە تانىمايتىن مۋزىكانتتاردىڭ دا وتە ۇقساس كومپوزيتسيالارى بار.

«مىسالى، مۋزىكادا جەتى نوتا بار. ءاربىر سۋرەتشىنىڭ وزىندىك كوزقاراسى بولادى، كەيبىرەۋلەرىنىڭ تالعامى ءبىر-بىرىنە ۇقساس بولۋى مۇمكىن. فرانتسۋز سۋرەتشىسى قازاقتىڭ سۋرەتشىسىنەن كوشىرىپ الدى دەپ ايتا المايمىز»، - دەپ ازىلدەدى مينيستر.

قر مادەنيەت ءمينيسترى ەلدە قانداي جاعداي بولسا دا حالىق تەك «ءبىزدىڭ وتانداستارىمىزدى ايىپتاۋدى» ادەت قىلعاندى بايقاعانىن دا ايتتى.

– ماسەلەن، - دەيدى مينيستر، - فرانتسيادا ءداستۇرلى تۇردە وتەتىن كانن فەستيۆالىندە باس جۇلدەنى جەڭىپ العان سامال ەسلياموۆا رەسەيلىك رەجيسسەردىڭ ارقاسىندا باس كەيىپكەر اتاندى، ديماش قۇدايبەرگەن قىتايدىڭ «تۋىندىسى» دەپ بۇرا تارتىپ ءجۇر. ساۋەگەيلىكپەن اينالىسىپ جۇرگەن مۇندايلارعا تىيىم جاساۋ كەرەك. سامال دا، ديماش تا قازاقستاننان شىققان ونەر وكىلدەرى.

ايتا كەتەيىك، ينتەرنەت جەلىسىندە «رۋحاني جاڭعىرۋدىڭ» لوگوتيپىنە قاتىستى داۋ تۋىنداپ، ونى فرانتسۋزدىق ۇيىمنىڭ سۋرەتىمەن سالىستىرا وتىرىپ، جەلى قولدانۋشىلارى ءبىرشاما سىننىڭ استىنا العان بولاتىن.

ءوز كەزەگىندە، قر اقپارات جانە كوممۋنيكاتسيا ءمينيسترى داۋرەن اباەۆ مۇنى پلاگيات دەپ سانامايتىنىن ايتقان.

Abai.kz