قازاقستان پرەزيدەنتى نۇرسۇلتان نازارباەۆ قازاقستاندىقتاردى ورازا ايت مەرەكەسىمەن قۇتتىقتادى.

"قىمباتتى وتانداستار! سىزدەردى ورازا ايت مەرەكەسىنىڭ باستالۋىمەن شىن جۇرەكتەن قۇتتىقتايمىن! بۇل مەيرام الەمنىڭ بارشا مۇسىلماندارى رۋحاني تازارۋعا ۇمتىلاتىن رامازان ايىنىڭ اياقتالعانىن بىلدىرەدى. وسى كەزەڭدە قايىرىمدى ىستەر اتقارىپ، ءبىزدىڭ كومەگىمىز بەن جاناشىرلىعىمىزعا ءزارۋ جاندارعا قامقورلىق كورسەتۋگە دەگەن ىزگى نيەت پەن ىقىلاس ارتا تۇسەدى", - دەگەن ەدى ەلباسى ءوز قۇتتىقتاۋىندا.

بۇگىن قازاقستاننىڭ مۇسىلماندارى ءدىني باسقارماسىنىڭ توراعاسى سەرىكباي قاجى دا قازاقستاندىقتارعا قۇتتىقتاۋ حاتىن جولداپ وتىر.

قادىرمەندى قاۋىم!

بارشاڭىزدى مۇسىلمان ۇمبەتىنىڭ ۇلىق مەيرامى – ورازا ايتپەن شىن جۇرەكتەن قۇتتىقتايمىن. قاسيەتتى جۇما كۇنىمەن قاتار كەلگەن ايت مەيرامى قۇتتى-بەرەكەلى بولعاي!

ءبىزدىڭ حالقىمىز رامازان ايىن ەجەلدەن ەرەكشە قاستەرلەپ: «ون ەكى ايدىڭ سۇلتانى»، – دەپ قادىرلەگەن. ال مەرەكە كۇندەرى اعايىن-جۇرت ءبىر-بىرىنە «ايت قابىل بولسىن» ايتىپ، جىلى لەبىزدەرى مەن ىزگى تىلەكتەرىن ارناعان. اعايىن-تۋىسقا ايتتاپ بارۋ، بالالار مەن قادىرلى قوناقتارعا ايتتىق بەرۋ – سان عاسىردان بەرى جالعاسىپ كەلە جاتقان يگى ءداستۇر.

ورازا ايت – قوناقجايلىق پەن مەيىرباندىقتىڭ، دوستىق پەن تاتۋلىقتىڭ مەرەكەسى. ىزەتتىلىك پەن ىزگىلىككە، بىرلىك پەن يگىلىككە ۇندەيتىن بۇل مەيرام ەلىمىزدە تۇراتىن ءتۇرلى ۇلتتار مەن ۇلىستاردى دا ىنتىماققا ۇيىستىرا تۇسەدى.

«ايت» – «مەرەكەلەۋ»، «حال سۇراسۋ»، «ءبىر-ءبىرىن قۋانتۋ»، «قۋانىشقا توپتالۋ» دەگەن ءسوز. دەمەك، بۇل كۇندەرى وتباسىن، اعايىن-تۋىس، كورشىلەر مەن كومەككە مۇقتاج جانداردى قۋانىشقا بولەپ، العىسىن الۋدىڭ – ساۋابى ۇلكەن. جابىققان جاننىڭ كوڭىلىن جادىراتىپ، شاڭىراقتى شات-شادىمان كۇيگە بولەپ، سىيلىق ۇلەستىرۋ دە – مەرەكەنىڭ ءسانىن كەلتىرە تۇسەتىن ىزگى امالدىڭ ءبىرى.

ۇلىق مەيرامدا تولىق جۋىنىپ، جۇپار ءيىس سەبىنىپ، جاماعاتپەن ايت نامازىنا قاتىسۋدىڭ ساۋابى ەرەكشە. ايت نامازىنا بارۋدان بۇرىن قۇرمادان ءدام تاتۋ – پايعامبارىمىز مۇحاممەدتىڭ (وعان اللانىڭ سالاۋاتى مەن سالەمى بولسىن) سۇننەت امالى.

ورازا ايت – ءبىر اي بويى توزىمدىلىك تانىتىپ اۋىز بەكىتكەن، ىقىلاسپەن قايىرىمدىلىق جاساعان پەندەنىڭ قۇرمەت پەن ماراپاتقا، قۋانىش پەن ساۋاپقا كەنەلەتىن ءسات.

اللا تاعالا: «مەن پارىز ەتكەن ورازانى پەندەلەرiم وتەپ، اقىسىن الۋعا (ايت نامازىن وتەۋگە) مەشiتكە بەت الدى. ولار مەن ءۇشiن ورازا ۇستادى، مەنiڭ پارمەنiممەن اۋىز اشتى، ەندi قۋانىشقا كەنەلسiن...»,  – دەگەن. 

قۇرمەتتى باۋىرلار!

مۇسىلمان قاۋىمىنىڭ وسىناۋ شۋاقتى مەيرامىندا ءاربىر شاڭىراققا باياندى باقىت، اللانىڭ اماندىعى مەن بەرەكەتىن تىلەيمىن.

قاسيەتتى رامازان ايىندا ۇستاعان ورازامىز، جاساعان ءاربىر قايىرلى امالدارىمىز، دۇعا-تىلەكتەرىمىز قابىل بولسىن!

ەلىمىز امان، جۇرتىمىز تىنىش، اللانىڭ سىيى – تاۋەلسىزدىگىمىز باياندى بولعاي! ءامين!

سەرىكباي قاجى وراز،

قازاقستان مۇسىلماندارى ءدىني

باسقارماسىنىڭ توراعاسى، باس ءمۇفتي

Abai.kz