ءبىلىم جانە عىلىم مينيسترلىگى ۇبت باستالۋىنا بايلانىستى ءباسپاسوز ءماسليحاتىن وتكىزىپ، بيىلعى جاڭالىقتاردى جاريا ەتتى، - دەپ حابارلايدى اباي-اقپارات.

مەكتەپ بىتىرۋشىلەردىڭ ۇلتتىق بىرىڭعاي تەستى 20 ماۋسىم مەن 1 شىلدە ارالىعىندا وتەدى. بيىل 102 447 وقۋشى سىناق تاپسىرۋعا ءوتىنىش بەرگەن.

تۇلەكتەردىڭ 75 پروتسەنتى ۇبت-نى قازاق تىلىندە تاپسىرادى.

«بيىل 102 447 مىڭ تۇلەك ۇبت-عا قاتىسۋعا ءوتىنىش بەردى. ونىڭ ىشىندە 77 223 وقۋشى قازاق تىلىندە، ياعني 75,4%-ءى،  25 178 تۇلەك – ورىس تىلىندە، 24,6%، 46-سى اعىلشىن تىلىندە تاپسىرادى»، — دەدى قر بعم «ۇلتتىق تەستىلەۋ ورتالىعى» رمقك ديرەكتورى رامازان الىمقۇلوۆ.

ۇبت 167 پۋنكتە وتەدى، ونىڭ 48-ءى جوعارى وقۋ ورىندارىنىڭ بازاسىندا، ۇشەۋى – كوللەدجدە، 116-سى ورتا مەكتەپتەردە ورنالاسقان. ۇبت وتكىزۋ كەزىندە 1206 اۋديتوريا جۇمىلدىرىلادى. بارلىق اۋديتوريا 100 پروتسەنت دايىن. بەينەكامەرالارمەن، ۇيالى تەلەفون بايلانىسىن باساتىن قۇرىلعىلارمەن، مەتالل دەتەكتورلارمەن جابدىقتالعان.

ۇبت فورماتى ەش وزگەرگەن جوق، بەس پاننەن تۇرادى. ۇشەۋى – مىندەتتى، ەكەۋى تاڭداۋ ءپانى. بارلىعى 120 سۇراق، تۇلەكتەر ءۇشىن 140 بالل جيناۋ مۇمكىندىگى ساقتالادى.

ۇبت 3 ساعات 50 مينۋتقا سوزىلادى.

اپپەلياتسيا بەرۋ ءتارتىبى وزگەرمەيدى

ۇبت وتكىزۋ تەحنولوگياسىنىڭ ساقتالۋىن باقىلاۋ ءۇشىن وڭىرلەرگە ءبىلىم جانە عىلىم مينيسترلىگىنىڭ 1815 وكىلى جىبەرىلدى. سونداي-اق جەرگىلىكتى جەرلەردە مەمللەكەتىك كوميسسيالار قۇرىلۋدا، ولاردىڭ سانى – 1002 ادام. رەسپۋبليكالىق اپپەلياتسيالىق كوميسسيانىڭ قۇرامىنا 55 ادام كىرەدى. جەرگىلىكتى اپپەلياتسيالىق كوميسسيانىڭ قۇرامى وتكەن جىلمەن سالىستىرعاندا 1500 ادامعا ۇلعايىپ، 5010 ادامدى قۇراپ وتىر.

«جەرگىلىكتى جەرلەردەگى كوميسسيالار قانداي دا بىر جاعداي تۋىنداسا، ونىڭ جىلدام شەشىلۋىنە سەپتىگىن تيگىزەدى دەپ ويلايمىز»، — دەدى الىمقۇلوۆ.

اپەللياتسيا بەرۋ ءتارتىبى دە وزگەرمەيدى. ياعني، كەلەسى كۇنى ساعات 13.00 دەيىن ءار تۇلەك اپپەلياتسيا بەرۋگە قۇقىلى. جەرگىلىكتى اپپەلياتسيالىق كوميسسيا ماقۇلداعان جاعدايدا، ماتەريالدار رەسپۋبليكالىق كوميسسياعا جولدانادى.

العاش رەت Call-ورتالىق جۇمىس ىستەيدى

بيىل العاش رەت Call-ورتالىق ىسكە قوسىلدى. ءنومىرى 8-800-080-71-77.

جىلدام اقپارات الماسىپ، تۋىنداعان پروبلەمالاردى شەشۋگە كومەكتەسەدى.

«جەرگىلىكتى اتقارۋشى ورگاندار شالعاي ەلدى مەكەندەردە تۇراتىن تۇلەكتەردى ۇبت پۋنكتەرىنە جەتكىزۋگە، تاماق، ءۇي-جايمەن قامتاماسىز ەتۋگە مىندەتتى. سونىمەن قاتار، ۇبت بارىسىن باقىلاعىسى كەلەتىن اتا-انالارعا دا جاعدايى جاساۋى ءتيىس»، — دەدى الىمقۇلوۆ.

تەستىلەۋ ناتيجەسىن Telegram-نان بىلۋگە بولادى

تەستىلەۋ ناتيجەسىن بۇرىنعىداي ۇلتتىق تەستىلەۋ ورتالىعىنىڭ سايتىنان بىلۋگە بولادى. سونىمەن قاتار بيىل Telegram كومەگىمەن دە بىلۋگە مۇمكىندىك بار. ول ءۇشىن ءار تۇلەك ءوزىنىڭ جەكە كودىن (يكت،ينديۆيدۋالنىي كود تەستيرۋەموگو) ەنگىزۋى شارت»، — دەپ ءتۇسىندىردى ءبىلىم جانە عىلىم ۆيتسە-ءمينيسترى اسحات ايماعانبەتوۆ.

Telegram-كانالدىڭ اتاۋىن بۇگىن كەشكە ءبىلىم جانە عىلىم مينيسترلىگىنىڭ رەسمي سايتىنان قاراپ الۋعا بولادى.

سونىمەن قاتار، تەستىلەۋ ناتيجەلەرى mail.kz سايتىنا دا شىعادى. مۇندا دا ءار تۇلەك ءوزىنىڭ جەكە كودىن ەنگىزۋى كەرەك.

«ەشكىمدى شەشىندىرىپ تەكسەرمەيمىز»

«ەگەر مەتالل رامكادان وتكەن كەزدە، ارنايى سيگنال شىقسا، وندا كوميسسيا ەكى-ءۇش رەت وتكىزىپ، تەكسەرۋگە قۇقىلى. بىراق ۇبت تاپسىراتىن تۇلەكتەردى ءبىز ەشقاشان شەشىندىرىپ تەكسەرگەن ەمەسپىز، شەشىندىرمەيمىز دە. بۇعان ءۇزىلدى-كەسىلدى تىيىم سالىنعان»، — دەدى مينيسترلىك وكىلى.

ديماش، گولوۆكين تۋرالى تۋرالى سۇراق بولا ما؟

ءبىلىم جانە عىلىم مينيسترلىگى بيىل تەستىلەۋ سۇراقتارىندا شوۋ-بيزنەس وكىلدەرى تۋرالى سۇراقتار بولمايتىنىنا سەندىردى.

«بىرىنشىدەن، مينيستر وسىنداي سۇراقتار بولادى دەپ  ۋادە بەرگەن جوق. ەكىنشىدەن، ۇبت-دا وقۋ ساۋاتتىلىعى دەگەن ءپان بار، ياعني وقۋشى ءماتىندى وقىپ، ءتۇسىنىپ، سۇراقتارعا جاۋاپ بەرۋى كەرەك. وسىعان بايلانىستى، وندا تاريحي تۇلعالارعا قاتىستى ءۇزىندى بولۋى مۇمكىن، بىراق، جالپى، بيىل شوۋ-بيزنەس وكىلدەرى كەزدەسەتىن ماتىندەردى قولدانعان جوقپىز. بارلىق تەست سۇراعى مەكتەپ باعدارلاماسى اياسىندا»، — دەدى الىمقۇلوۆ.

Abai.kz