قر ۇقك شەكارا قىزمەتىنە قاراستى «قورعاس» شەكارا بەكەتىنىڭ قىزمەتكەرلەرى تۇتقىنداعان قازاق ايەلى سايراگۇل ساۋىتبايدىڭ ىسىنە قاتىستى جاڭا دەرەكتەر شىقتى.

بۇگىن تالدىقورعان قالاسىنداعى ۋاقىتشا تەرگەۋ يزولياتورىندا (ۋتي) قاماۋدا وتىرعان سايراگۇل ساۋىتباي الماتى وبلىستىق اۋرۋحاناسىنا جەتكىزىلگەن بولۋى بەك مۇمكىن. وسى اۋانداعى اقپار «ۆاتساپ» جەلىسى ارقىلى رەداكتسيامىزعا جەتتى.

ءبىز سايراگۇل ساۋىتبايدىڭ قورعاۋشىسى، بەلگىلى زاڭگەر ابزال قۇسپان مىرزادان اتالعان اقپاراتتىڭ انىق-قانىعىن بىلمەك بولىپ، حابارلاستىق.  قىزمەت بابىمەن استانا قالاسىندا ءىس-ساپاردا جۇرگەن ابزال قۇسپان مىرزانىڭ اۋزىنان ەستىپ بىلگەنىمىزدى جازايىق، ەندى.

«سايراگۇل ساۋىتباي تالدىقورعانداعى ۋاقىتشا تەرگەۋ يزولياتورىندا قاماۋدا وتىر. وتكەندە وزدەرىڭىزبەن بىرگە تەرگەۋگە باردىق. ول كەزدە جاعدايى جاقسى بولعان. قازىر سايراگۇلدى الماتى وبلىستىق اۋرۋحاناسىنا جەتكىزىپتى. مەن وتكەندە تالدىقورعاننان شىعىپ، الماتى، استانا قالالارىنا جۇمىس بابىمەن كەتكەن ەم. قازىر سايراگۇلگە دەرەۋ ارادا بارۋعا مۇمكىندىگىم بولماي تۇر. ال اقپاراتتىڭ راس-وتىرىگىنە كوز جەتكىزۋ ءۇشىن، اۋرۋحانا مەن تەرگەۋ يزولياتورىنا حابارلاسىپ سۇراۋلارىڭىزعا ابدەن بولادى»، - دەدى ادۆوكات ابزال قۇسپان.

ايتا كەتەيىك، ابزال مىرزاعا اتالعان اقپاراتتى بەلگىسىز بىرەۋلەر جەتكىزگەن ەكەن. وندا سايراگۇل ساۋىتبايدىڭ الماتى وبلىستىق اۋرۋحاناسىنىڭ نەيروحيرۋرگيا بولىمىنە جەتكىزىلگەندىگى تايعا تاڭبا باسقانداي انىق ايتىلعان.

ءبىز تالدىقورعان قالاسىنداعى ەسكەلدى بي كوشەسى 283-ءۇي دەگەن مەكەن-جايدا ورنالاسقان وبلىستىق اۋرۋحاناعا حابارلاستىق. قابىلداۋ بولىمىندەگى مەدبيكە قىز ءوزىن – نۇرسۇلتانقىزى الميرا تۇراقوۆا دەپ تانىستىردى.

سوڭعى 1 اپتانىڭ شەگىندە (19-25 ماۋسىم ارالىعىندا) اۋرۋحاناعا جەتكىزىلگەن ادامداردىڭ ءتىزىمىن تەكسەرىپ شىعىپ، سايراگۇل ساۋىتباي ەسىمدى ادامنىڭ تىركەلمەگەنىن ايتتى.

سونان سوڭ №2-تالدىقورعان قالالىق اۋرۋحاناسىنا حابارلاستىق. اتالعان اۋرۋحانا گاۋحار انا كوشەسى 87 دەگەن مەكەن-جايدا ورنالاسقان ەكەن.

سودان سايراگۇلدى جەتكىزۋى مۇمكىن دەگەن تالدىقورعان قالالىق كوپسالالى اۋرۋحاناسىنا حابارلاستىق. توقتاسىن ەراسىل ەسىمدى ازامات تەلەفون تۇتقاسىن كوتەردى. ءوزى كەزەكشى دارىگەر (مەدبرات) ەكەن. سايراگۇل ساۋىتباي ەسىمدى ازاماتشانىڭ اۋرۋحانادا جاتقان ادامدار تىزىمىندە جوقتىعىن ايتتى.

تالدىقورعان قالاسىنداعى بىرنەشە اۋرۋحاناعا حابارلاسىپ، سايراگۇلدى تاپپاعان سوڭ، تالدىقورعان قالاسىنداعى ۋاقىتشا تەرگەۋ يزولياتورىنا حابارلاسىپ، سايراگۇلدىڭ قايدا ەكەندىگىن سۇرادىق. ەسىم-سويى ماقسات ەڭسەباەۆ دەگەن ۋتي  قىزمەتكەرى، قابىلداۋ بولىمىندە وتىرعان قىزمەتكەر بىزگە سايراگۇلدىڭ تەرگەۋ يزولياتورىندا جاتقانىن ايتتى.

«سايراگۇل ساۋىتباي بىزدە جاتىر. دەنساۋلىعى جاقسى. ارتىنان ىزدەپ كەلۋشىلەر كوپ ەمەس. سايراگۇلگە قاتىستى اقپاراتتاردى بىزدەگى ارنايى بولىمنەن (سپەتسوتدەل) سۇراپ بىلە الاسىزدار»، - دەدى بىزگە.

ەڭسەباەۆ نۇسقاعان نومەرگە حابارلاستىق. الايدا ەشكىم تەلەفون تۇتقاسىن كوتەرمەدى.

ەستەرىڭىزگە سالا كەتەيىك، 22-مامىر كۇنى الماتى وبلىسى ەڭبەكشىقازاق اۋدانىنا قاراستى بايدىبەك بي اۋىلىنان اسكەري كۋالىگى بار ەكى ادام سايراگۇلدى تۇتقىنداپ كەتكەن. سودان سايراگۇلدى «قورعاسقا» اپارىپتى.

24-مامىر كۇنى رەداكتسيامىزعا سايراگۇلدىڭ قايىن ءىنىسى نۇربولات اسان كەلىپ، بولعان جايدى بايانداپ بەرگەن. «اسان نۇربولات: شەكارالىق پوليتسيا وكىلدەرى «قىتاي سۇراتىپ جاتىر» دەپ جەڭگەمدى الىپ كەتتى» اتتى ماقالا العاش بولىپ «Abai.kz» اقپاراتتىق پورتالىندا جاريا بولدى. بۇل قازاق قوعامىندا قىزۋ تالقىلانىپ، سايراگۇلدىڭ ۇستىنەن قىلمىستىق ءىس قوزعالدى. سايراگۇل قازاقستاندا قالدىرىلدى.

25-مامىر كۇنى بەلگىلى زاڭگەر ابزال قۇسپان سايراگۇلدىڭ ىسىنە قاتىستى پىكىر ءبىلدىرىپ، ونى ءوز قورعاۋىنا الاتىنىن مالىمدەدى. «سايراگۇل ساۋىتبايدى قىتايعا قايتارۋ – ەلدىگىمىزگە سىن!» اتتى ابزال مىرزانىڭ ماقالاسى «Abai.kz» اقپاراتتىق پورتالىندا جاريالاندى.

25-مامىر. الماتى قالاسىندا ورنالاسقان حالىقارالىق ادام قۇقىقتارىن قورعاۋ ۇيىمىنىڭ قازاقستانداعى بيۋروسىنىڭ كەڭسەسىندە ءباسپاسوز جيىنى ءوتتى. وعان سايراگۇلدىڭ كۋيەۋى ءۋالي سىلام مەن بالالارى كەلىپ قاتىستى. بولعان جايدى باق وكىلدەرىنە ەگجەي-تەگجەيلى بايانداپ بەردى.

اتالعان جيىننان كەيىن سايتىمىزدا: «سايراگۇلدىڭ قىزى: انام قىلمىسكەر بولسا، قازاقستاننىڭ تۇرمەسىندە وتىرسىنشى» اتتى ماقالا جاريا بولدى.

29-مامىر. 2018 جىل. رەداكتسيامىزعا شەكارالىق پوليتسيا قىزمەتكەرلەرى تۇتقىنداعان سايراگۇل ساۋىتبايدىڭ ادۆوكاتى ابزال قۇسپان مىرزا حابارلاستى. اتالعان ءىس بويىنشا كەيبىر باسسىزدىق ارەكەتتەر جايلى اشىق ايتا كەلىپ، مالىمدەمە جاسادى. «بۇل ەلدە ء"اي" دەيتىن اجە، "قوي" دەيتىن قوجا - باس پروكۋراتۋرا. ول قايدا قاراپ وتىر؟» اتتى ماقالا دا سايتىمىزدا جاريا بولىپ، قىزۋ تالقىعا ءتۇستى.

30-مامىر. ابەكەڭ الماتىعا كەلدى. سايراگۇل مەن ونىڭ تەرگەۋشىسى ۆلاد انتونوۆپەن جولىعىپ، ىسكە كىرىسۋ ءۇشىن ادۆوكات ابزال قۇسپان باستاپ، بەلگىلى جۋرناليست ساۋلە ابىلداحانقىزى، «اتاجۇرت جاستارى» ەرىكتىلەر بىرلەستىگىنىڭ جەتەكشىسى سەرىكجان ءبىلاشۇلى، «Abai.kz» اقپاراتتىق پورتالىنىڭ رەداكتورى، ياعني وسى جولداردىڭ اۆتورى نۇرگەلدى ابدىعانيۇلى بار، پانفيلوۆ اۋدانىنا، «قورعاس» شەكارا بەكەتىنە جول تارتتىق.

بۇل كەزدە سايراگۇل ساۋىتباي پانفيلوۆ اۋدانىنىڭ ورتالىعى جاركەنت قالاسىنداعى ۋاقىتشا تەرگەۋ يزولياتورىندا قاماۋدا جاتقان. وسىدان سوڭ سايراگۇلدى تالدىقورعان قالاسىنداعى ۋاقىتشا تەرگەۋ يزولياتورىنا اۋىستىرعان. بۇل تۋرالى ماتەريالمەن تانىسامىن دەگەن وقىرمانعا، مىنە سىلتەمە: https://abai.kz/post/71269

19-ماۋسىم. 2018 جىل. سايراگۇلدىڭ جايىن تاعى قاۋزاماق بولىپ ءبىر توپ بەلسەندى، سايراگۇلدىڭ جولداسى ءۋالي ءسىلام، ۇلى ۇلاعات، قىزى ۇكىلاي، قاينىسى نۇربولات، قوعام بەلسەندىلەرى ساۋلە ابدىلداحانقىزى، Cەرىكجان ءبىلاش، قىدىرالى ورازۇلى جانە جۋرناليست نۇرگەلدى ابدىعانيۇلى تالدىقورعانعا باردىق. وسى جولى ادۆوكات ابزال قۇسپان تەرگەۋگە قاتىسىپ شىقتى. ۋتي-داعى سايراگۇلدىڭ حال-جاعدايى جايلى اقپاراتتى سول كەزدە جازدىق. ول تۋرالى مىنا سىلتەمەدەن وقىپ تانىسا الاسىزدار. https://abai.kz/post/72215

وسى رەتتە ايتا كەتەيىك، كۇنى بۇگىنگە دەيىن سايراگۇل ساۋىتباي ىسىنە قاتىستى «Abai.kz» اقپاراتتىق پورتالىندا  وننان اسا ماقالا جازىلدى. وسى ماقالالار ارقىلى ءبىز «ءبىر ادامنىڭ تاعدىرى - ۇلتتىڭ تاعدىرى» ەكەنىن بۇقاراعا دالەلدەدىك دەپ ويلايمىز.

ال سايراگۇلدىڭ قازىرگى جاعدايىنا قاتىستى اقپارات ءالى دە انىقتالۋ ۇستىندە. دەگەنمەن قۇزىرلى ورگان وكىلدەرى تاراپىنان سايراگۇلدىڭ دەنساۋلىعىنا قاتىستى كەيبىر مالىمەتتەر جاسىرىن ۇستالۋى مۇمكىن دەگەن كۇدىگىمىز دە جوق ەمەس.

سايراگۇلدىڭ ەرلىككە پارا-پار «قىلمىسى» - ءدۇيىم جۇرتتىڭ تالقىسىندا. ءبىر عانا سايراگۇلدىڭ جايى - بۇكىل قىتايداعى قازاقتىڭ تاعدىرىن كوز الدىمىزعا كەلتىرەدى. سوندىقتان دا، ءبىزدىڭ قۇزىرەتتى ورگاندار سايراگۇل ساۋىتبايعا كەشىرىممەن قاراپ، بوستاندىققا شىعارۋعا ءتيىس. سايراگۇل سەكىلدى ازاماتتاردىڭ بارىنە ازاماتتىقتى جىلدام جاساپ، ءوز قازاعىمىزعا قورعان بولا الساق، ۇرپاق الدىنداعى مىندەتىمىزدىڭ ورىندالعانى...

نۇرگەلدى ابدىعانيۇلى

Abai.kz