گۇلجان قاراقۇسوۆانى كەلەكەلەپ، كۇلكىگە اينالدىرىپ جاتىرمىز. ول كىسى بۇلاي سويلەيمىن دەپ جەر بولدى.

ەندى ول كىسى قازاقشا سويلەي مە؟ كازاقشا سويلەۋگە تالپىنا ما؟ مەنىڭشە ەندى ول كىسى قازاقشا سويلەۋدەن اۋلاق جۇرەدى. ءدال سول كىسىدەي قازاقشاسى شالا، سويلەپ ۇيرەنەيىن دەسە، جۇرتتىڭ مازاعىنا قالاتىن مىڭداعان ادام بار عوي. سونداي قازاقشاسى ناشار كىسىلەردى كۇلكى ەتۋ ارقىلى ولاردىڭ قازاقشا بىلەيىن، ۇيرەنەيىن، سويلەيىن دەگەن نيەتىن ءتۇپ-تامىرىمەن ءوزىمىز جۇلىپ جاتىرمىز ەمەس پە؟

گۇلجان قاراقۇسوۆا كوبىرەك دايىندالىپ، كوبىرەك ماشىقتانىپ، قازاقشا جاقسى سويلەيتىندەي دەڭگەيدە بولۋى كەرەك ەدى، بىراق ول كىسى سول كۇنى قازاقشا بار بىلگەنىن ايتتى عوي. وسىلاي قازاقشا سويلەۋگە نيەتتى، ءبىر ءسوز بولسا دا قازاقشا ايتۋعا تىرىسىپ جۇرگەن ادامدى قولداپ، قاتەلىكتەرىن تۇزەۋگە كومەكتەسىپ، سول ارقىلى قازاقشا سويلەي تۇسۋىنە ءوز قولىمىزدا تۇرعان جاردەمدى بەرۋدىڭ ورنىنا ارزان كۇلكىگە ريزا بولىپ ءجۇرمىز.

ول كىسىنىڭ ويىن قازاقشا جەتكىزە الماعانىنا بۇكىل قوعام كىنالى. ول كىسىگە كۇلۋ ارقىلى وزىمىزگە كۇلىپ جاتىرمىز. بۇل كۇلەتىن ەمەس، وكىرىپ جىلايتىن جاعداي. قازاقشا سويلەگىسى كەلەتىندەرگە سويلەپ كەتۋگە كومەكتەسۋگە تىرىسايىق، ارزان كۇلكى باسقا جەردە دە جەتىپ جاتىر. قوعامىمىزدا قازاقشا سويلەۋ تۋرالى تالاپ بولعانىمەن، قوعام ء(سىز بەن ءبىز) قازاقشا جاقسى بىلمەيتىندەرگە قازاقشا سويلەۋگە جاعداي جاساپ بەرىپ وتىرعان جوق. تۋريست كەلۋى ءۇشىن وعان قولايلى جاعداي جاساپ بەرۋ كەرەك، كاسىپكەر كوبەيۋى ءۇشىن قولايلى جاعداي كەرەك، قازاقشا سويلەۋ ءۇشىن (اسىرەسە باس كەزىندە، جاڭادان سويلەي باستاعان كەزدە) جاعداي كەرەك. ءبىز ونداي جاعداي جاساپ بەرىپ وتىرعان جوقپىز، بىراق قازاقشا سويلە دەگەن تالابىمىز تاۋداي.

نۇرمۇحامەدتىڭ ساياتىنىڭ Facebook-تەگى پاراقشاسىنان

Abai.kz