اۋرۋحاناعا بارىپ قايتتىم. ول جاقتان شىققاندا مىنا توبەنى تەسىپ، ميىڭدى قايناتاتىنداي ىستىققا "جالوب" ايتپايمىن دەپ شەشتىم. بولا بەرسىن ىستىق! كۇيدىرسىن مەيلى! قاشانعا سوزىلار دەيسىز؟ بۇل دا وتپەلى. قىرىق كۇن شىلدە وتكەسىن وكپە كەڭ تىنىس الار. كورمەي جۇرگەن جاز با؟ بىلمەي جۇرگەن شىلدە مە؟ سەزىنبەگەن ىستىق پا ەدى؟

باستىسى، باس امان، دەن ساۋ بولسىن!

مەن اۋرۋحانادان وسىلاي جىگەرىمدى جانىپ قايتتىم. ويتكەنى...

پالاتادا دياگنوزى دا، ءحالى دە اۋىر ناۋقاستار جاتىر ەدى. ءبىرى سويلەي المايدى. ءتىلى كۇرمەتىلگەن. سۋ سۇراۋعا ءتىل جوق، قولمەن ىمدايىن دەسە قاسىنداعى ناۋقاستار دا ءوزى سياقتى اۋىر حالدەگى ادامدار. مەدبيكەنى داۋىستاپ شاقىرۋعا مۇمكىندىگى جوق، قولى جەتپەيتىن جەردەگى بوس ستاكاننان كوزىن الا الماي، تىلىمەن كەزەرىپ كەتكەن ەرنىن قايتا-قايتا جالاپ، باسىن شايقاي بەرەدى. ورنىنان تۇرىپ سۋ ىشەيىن دەسە، ءبىر جاق اياق-قول ىستەمەيدى...
ەكىنشى ادام اياق-قولى ۇيىپ، جانسىزدانىپ قالعان. قاپىرىق ىستىقتا تەرلەپ، كيىمى مەن توسەگى سۋ بولىپ كەتە بەرەدى. تەرلەي بەرىپ مويىندارى قىزارىپ، ءبورتىپ كەتىپتى. ونىڭ قىشيتىنى انىق ەندى. قاساقانا قاستىق قىلعىسى كەلگەندەي اششى تەر تاپ سول بورتكەن جەرگە قاراي اعىپ جاتىر. ونى سۇرتۋگە شاما قايدا، قول تۇگىلى ساۋساق قوزعالمايدى. جاتا بەرىپ جامباس استى دا جانىپ بارادى. قوزعالىپ، وزىنە ىڭعايلى ەتىپ ءبىر قىرىنان اۋىسۋ دا ارمان. ىستىقتا قوزعالىسسىز جاتا بەرگەننەن، ءارى اۋا وتپەي، تەرگە مالشىنعاننان ارقاسىنىڭ تەرىسى كۇلدىرەپ كەتىپتى.

جاپ-جاس مەدبيكە قىزدار كۇنىنە ەكى رەت ناۋقاستاردىڭ كيىمدەرىن اۋىستىرىپ، وزدەرىن دۋشقا ءتۇسىرىپ تۇرادى. قاسىقتاپ اس بەرىپ، تۇتىكشەمەن سۋ ىشكىزەدى. ولارعا دا تاڭنان كەشكە دەيىن تىنىم جوق: ءار پالاتا اراسىندا شاپقىلاپ ءجۇر. قوزعالا المايتىن، سويلەي المايتىن جانداردىڭ قالاۋىن كوزىنەن، ىمنان تۇسىنۋگە تىرىسادى. سالماعى اۋىر ناۋقاستى كوتەرىپ كولياسكاعا وتىرعىزىپ، شومىلدىرىپ، ورنىنا قايتا جاتقىزعاندا وزدەرىنىڭ دە ماڭدايلارىنان تەر سورعالاپ كەتەدى.

پالاتادا كونديتسيونەر قوسۋ قاۋىپتى: ونسىز دا تەرگە مالشىنىپ جاتقان اعزاسى ءالسىز قارت كىسىلەرگە ءۇپ ەتكەن جەلدىڭ ءوزى سالقىن بولىپ تيەدى. ەسىك-تەرەزەنى اشىپ قويۋعا "سكۆوزنياك" تا بولمايدى. سوندىقتان مەدبيكەلەر ءالسىن-ءالسىن جىلى سۋعا باتىرعان داكەمەن ناۋقاستاردىڭ بەتىن، موينىن، دەنەسىن ءسۇرتىپ بەرەدى. اندا-ساندا جەلدەتكىشتى سالقىنى تيمەسىن دەپ تەرىس قاراتا قويادى. ايتەۋىر بارىنشا امالداپ جاتىر. ولاردىڭ كۇن ىستىعىنا شاعىمدانۋعا شاماسى جوق. ناۋقاستاردىڭ دا، مەدبيكەلەردىڭ دە. بار ماقساتتارى - شىداۋ، ساۋىعۋ، ساۋىقتىرۋ.

وسىنى كورگەندە اياق-قولى ءبۇتىن، دەنى ساۋ، اس تا ءىشىپ، سويلەپ تە، باستىسى شاۋىپ جۇرگەن ءبىزدىڭ كۇن ىستىعىنا شاعىمدانىمىز وتە ۇيات دەپ شەشتىم.
بىلەمىن، كۇن ىستىق. جانىپ تۇر. جۇيكەگە تيەدى. بولا بەرسىن ىستىق! كۇيدىرسىن مەيلى! قاشانعا سوزىلار دەيسىز؟ بۇل دا وتپەلى. قىرىق كۇن شىلدە وتكەسىن وكپە كەڭ تىنىس الار. كورمەي جۇرگەن جاز با؟ بىلمەي جۇرگەن شىلدە مە؟ سەزىنبەگەن ىستىق پا ەدى؟

باستىسى، باس امان، دەن ساۋ بولسىن!

روزا بەكەتاەۆانىڭ Facebook-تەگى پاراقشاسىنان

Abai.kz