بەيسەنبى, 15 ءساۋىر 2021
«سوقىر» فەميدا 12018 9 پىكىر 1 تامىز, 2018 ساعات 09:44

قاسىموۆتىڭ قاراماعىنداعىلار قىلمىستىڭ ءىزىن جاسىرۋمەن اينالىسىپ ءجۇر

قازاقستان پوليتسياسى قاۋىپسىزدىكتى قورعاي ما، الدە قورلاي ما؟ قىلمىسپەن كۇرەسۋشىلەردىڭ قىلمىسكەرلەردى بۇركەمەلەيتىنى جايلى جۇرت اراسىندا الىپ-قاشپا ءسوز كوپ. سەنەمىز بە؟ الدە گەنەرال قاسىموۆتىڭ قاراماعىنداعىلار ۇرى-قارىنى «كرىشاۆات ەتەدى» دەگەن جۇرت ءسوزىن جاي ءبىر وسەك دەپ ەسەپتەيمىز بە؟

ساۋالدى وسىلاي توتەسىنەن قويدىق. ەندى تارقاتىپ ايتايىق. ايدىڭ كۇنى امانىندا اينا ءۇشىن اجالدىڭ ارقانىنا بايلانعان دەنيستىڭ قازاسىنان كەيىن جۇرتتىڭ پوليتسياعا سەنىمى سۋ سەپكەندەي شايىلدى. «قاسىمىزعا ءبىر-ءبىر كۇزەتشى الىپ جۇرەمىز بە، قايتەمىز» دەگەنگە دەيىن باردىق. سەبەبى، ءبىزدىڭ پوليتسيا ءبىزدىڭ قاۋىپسىزدىگىمىزدى قورعاي المايتىنىن كورسەتتى. اينا ۇرلىعى ءبىزدىڭ قوعامنىڭ ايناسى بولدى. قوعامنىڭ قوياسىن اقتاردى. قۇقىق قورعاۋ سالاسى قىزمەتكەرلەرىنىڭ قاۋقارسىزدىعى مەن قىلمىسكەرلەردى قورعايتىنى سول كەزدە ايتىلدى.

جۇرت ىشكى ىستەر مينيسترلىگىن تاپجىلماي تۇپ-تۋرا 7 جىل باسقارعان قالمۇحامبەت قاسىموۆتىڭ وتستاۆكاسىن تالاپ ەتتى. ويتكەنى، قاسىموۆتىڭ مينيسترلىگى تۇسىندا ەل ىشىندە قىلمىس كوبەيدى.

قاسىموۆ باسقارۋىنىداعى رەگرەسسيا

جوعارىداعى جۇرتتىڭ ءسوزىنىڭ جانى بار. ەسىمىزدە. 2013 جىل. قر ىشكى ىستەر ورگاندارىنىڭ مىڭنان استام قىزمەتكەرى قىلمىستى بۇركەمەلەگەنى جانە ستاتيستيكانى بۇرمالاعانى ءۇشىن جازاعا تارتىلعان. ستاتيستيكا دەدىك قوي. ساندار سويلەسىن: قىلمىستى جاسىرعانى جانە قىلمىستى تىركەۋگە قاتىستى باسقا دا زاڭ بۇزۋشىلىقتار ءۇشىن 1200 قىزمەتكەر جاۋاپقا تارتىلدى. ول كەزدە دە مينيستر قاسىموۆ ەدى. جاڭاعى دەرەكتى سول قاسىموۆتىڭ ءوزى ايتقان.

قازىر 2018 جىل. پالەندەي وزگەرىپ كەتكەن دۇنيە جوق. باياعى جارتاس ءبىر جارتاس. ءسوزىمىز سۇيىق شىقپاس ءۇشىن ءبىرلى-جارىم دەرەك كەلتىرەيىك، اۋەلى.

كوكشەتاۋدا 2016 جىلى جاسوسپىرىمدەر اراسىنداعى ۇساق قىلمىس 9,4 پايىز بولعان. 2017 جىلى بۇل كورسەتكىش 33,3 پايىزعا كوبەيگەن.

قىزىلوردادا اسكەريلەر اراسىنداعى قىلمىس 80 پايىزعا ارتقان. 2018 جىلدىڭ دەرەگى بۇل.

اتىراۋدا جاسوسپىرىمدەر اراسىنداعى قىلمىس 2 ەسەگە، اقتوبەدە زورلىق كورسەتۋ دەرەگى كوبەيگەن. كىسى زورلاۋدىڭ 38 فاكتىسى تىركەلگەن. بۇل 2017 جىلدىڭ دەرەگى.

اقتاۋدا كىسى ءولتىرۋ قىلمىسى 50%-عا، دەنساۋلىققا قاساقانا اۋىر زيان كەلتىرۋ 73%-عا، زورلاۋ 63,6%-عا، ەسىرتكىمەن بايلانىستى قىلمىستار 12,9%-عا وسكەن.

ەلىمىز بويىنشا جۇكتى ايەلدى ءولتىرۋ وقيعالارى 5 ەسەگە كوبەيگەن. بۇل 2017 جىلدىڭ دەرەگى.

ال مەملەكەتتىك كىرىستەر دەپارتامەنتىنىڭ بيىلعى جىلعى دەرەگى بويىنشا، اۋىر قىلمىستار سانى 2 ەسەگە ارتقان. دالىرەك ايتساق، 22 پايىزدان 52 پايىزعا دەيىن كوبەيگەن. نەمەسە 405 قىلمىستىق ىستەن 828 ىسكە كوبەيگەن. سالىق تولەۋدەن جالاتىرۋ فاكتىلەرى بويىنشا دا قىلمىستار سانى 2 ەسەگە وسكەن.

ەندى باس پروكۋراتۋرانىڭ دەرەگى:

قازاقستاندا ادام ءولتىرۋ دەرەگى كوبەيگەن. باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ رەسمي مالىمەتتەرىنە سۇيەنسەك، جەكە تۇلعالارعا قاتىستى قىلمىستىڭ وسى ءبىر اۋىر ءتۇرىنىڭ سانى 18,3%-عا ارتقان. 2018 جىلدىڭ 6 ايىندا 529 قازاقستاندىق الدەكىمنىڭ قولىنان قازا تاپقان. ال بىلتىر وسى ۋاقىت ارالىعىندا 477 ادام مەرت بولىپتى. ادام ومىرىنە قاستاندىق جاساۋ دەرەگى دە 61,7%-عا ارتقان. ەگەر 2017 جىلدىڭ 6 ايىندا 42 ادامدى ولتىرۋگە ارەكەت جاسالسا، بيىل بۇل كورسەتكىش 68-گە جەتىپ وتىر. وزگە وڭىرلەرمەن سالىستىرعاندا، قىلمىستىڭ بارلىق ءتۇرى بويىنشا سوتقا دەيىنگى تەكسەرۋ امالدارى الماتى، استانا قالالارىندا جانە تۇركىستان، الماتى وبلىستارىندا ءجيى جۇرگىزىلگەن ەكەن.

جۇرتتىڭ پوليتسياعا سەنبەۋىنە نە سەبەپ؟

2015 جىلعى دەرەك بويىنشا قازاقستاندا 100 مىڭ ادامعا 600 پوليتسيا قىزمەتكەرى بار ەكەن. بۇل قاسىموۆتىڭ دەرەگى. ال دەربەس باسىلىم «فوربس قازاقستاننىڭ» 2014 جىلعى دەرەگى بويىنشا 100 مىڭ ادامعا 32,2 پروكۋراتۋرا قىزمەتكەرى، 12,8 سوت، 608,8 پوليتسيا قىزمەتكەرى، 488,2 اسكەري قىزمەتكەر، 35,3 شەكاراشى جانە 52,1 سالىق قىزمەتكەرى تىركەلگەن. وسىعان قاراساڭىز، قازاقستان ازاماتتارى الەمدەگى ەڭ قاۋىپسىز ادام بوۋلى كەرەك-ءتى. سەبەبى، بۇۇ زەرتەۋى بويىنشا الەمنىڭ باسقا ەلدەرىندە 100 مىڭ ادامعا 300 پوليتسەيدەن تىركەلگەن.

كەز كەلگەن مەملەكەتتە قۇقىق قورعاۋ ورگاندارىنىڭ قىزمەتكەرلەرى ازاماتتاردىڭ مۇددەسى ءۇشىن قىزمەت ەتەدى. زاڭ بويىنشا سولاي بولۋى ءتيىس. البەتتە، بەس ساۋساقتىڭ بىردەي ەمەستىگىن ەسكەرسەك، ولاردىڭ اراسىندا الا دا بار، قۇلا دا. بىراق جاعىمسىز جايت پەن زاڭ بۇزۋشىلىق جاپپاي ەتەك الا باستاسا، قوعامنىڭ ءحالى مۇشكىل. بۇگىندە قوعامداعى پوليتسيا، سوت پەن پروكۋراتۋراعا دەگەن سەنىمسىزدىكتى جوققا شىعارا المايمىز. قر كونستيتۋتسياسىندا تايعا تاڭبا باسقانداي كورسەتىلگەن تالاپتار مەن باپتاردى وزدەرى بۇزاتىن قۇقىق قورعاۋشىلار كەزدەسەدى.

وسىنداي زاڭسىزدىقتاردان قانشاما ادام زارداپ شەگiپ جاتىر؟ قۇقىق قورعاۋ ورگاندارىنىڭ ەشبiرiنەن ادiلەت تاپپاي، تاۋەلسiز باسىلىمداردىڭ ەسiگiن قاعىپ جۇرگەن حالىق قانشاما؟ قازاقستانداعى پوليتسەيلەر پاراعا قىزىقپايدى، ءادiل جۇمىس iستەيدi دەپ كiم ايتا الادى؟ ق.قاسىموۆ ايتا الا ما؟

ەرجان مەن ەرلاننىڭ ماسەلەسى

ءجا، اڭگىمەمىزدىڭ توركىنىنە ورالايىق. كەشە ءبىزدىڭ رەداكتسيامىزعا ەكى جىگىت كەلدى. قازاقستان ازاماتتارى. «پوليتسيا قول قۋسىرىپ، قاراپ وتىر. قىلمىسكەرلەر بوستاندىقتا تايراڭداپ ءجۇر» دەپ ارىزدارىن ايتتى. اراشا سۇرادى. ءبىز ءسوز بەردىك.

جىگىتتەر ايدىڭ كۇنى امانىندا كولىكتەرىن «ۇرلاتىپتى». ۇرلاتتى دەگەنگە كەلمەس، ۇردا-جىقتىققا سالىپ، تارتىپ اكەتكەن ەكەن. جىگىتتەردىڭ ايتۋىنشا، قوقان-لوقى كورسەتىپتى.

ارىزدانىپ كەلگەن جىگىتتەردىڭ ەسىم-سويلارى ەرجان اپان مەن ەرلان بەكمىرزا. كولىكتىڭ يەسى - ەرجان ايپان. سەنىمحات بويىنشا كولىكتى ەرلان بەكمىرزاعا بەرگەن. سالوننان ساتىپ العان. سۋ-جاعا اۆتوكولىكتى ەرلاننىڭ جۇرگىزۋشىسى قولدى قىلعان كورىنەدى. ءارى قاراي، ءىستىڭ قالاي بولعانىن جىگىتتەردىڭ وزدەرى ەگجەي-تەگجەيلى بايانداپ بەردى.

«پوليتسيا قيمىلسىز وتىر. ال قىلمىسكەرلەر بوستاندىقتا ءجۇر»

ەرجان ايپان، اقمولا وبلىسىنىڭ تۇرعىنى:

- مەنىڭ ەسىمىم ەرجان. 1986 جىلى قىتايدىڭ شىڭجاڭ ولكەسىندە تۋعانمىن. قازىر اقمولا وبلىسىندا، شورتاندى اۋدانى، نوۆا-كۋبانكا اۋىلىندا تۇرامىن.

2017 جىلى شىلدە ايىندا، دوسىم ەرلان بەكمىرزاعا كولىك الىپ بەردىم. ءبىز ەرلان ەكەۋىمىز بالا كەزدەن بىرگە كەلە جاتقان جاقىن دوستارمىز. ەرلان كاسىپ باستاۋعا مەنەن كومەك سۇراعان سوڭ،  «فورد موندەو» دەگەن كولىكتى سالوننان ساتىپ الدىق. قۇنى 7 ميلليون 700 مىڭ تەڭگە بولدى. ول كولىكتى، بىلتىر 1-شىلدەدە اتىراۋدان الدىق.

كولىك مەنىڭ اتىما تىركەلگەن. ەرلانعا ساقتاندىرۋ ءپوليۋسى ارقىلى كولىكتى جۇرگىزۋگە رۇقسات بەرەتىن سەنىمحات جاسادىق. ءسويتىپ، ەرلان اتىراۋدان الماتىعا كولىكتى ءمىنىپ كەتكەن ەدى.

ەرلاننىڭ ۋسيەۆا الماگۇل دەگەن تانىسى بولدى. ساۋدا جاساپ جۇرگەندە تانىسقان ەكەن. سول كىسىگە قارىز بولىپ قالىپتى.  قارىزىن ءوز ۋاعىندا قايتارا الماعان. ونىسى شامامەن 600 مىڭ تەڭگەدەي ەكەن.

ءسويتىپ جۇرگەندە الماگۇل ەرلانعا ايتىپ ءجۇرىپ، كۇيەۋىن جۇمىسقا الۋىن وتىنەدى. كۇيەۋى ناريمان دەگەن كىسى. ەرلان ماعان حابارلاستى. الماگۇلدىڭ كۇيەۋى ناريمان دەگەندى جۇرگىزۋشىلىككە جۇمىسقا الاتىنىن ايتىپ، كولىك جۇرگىزۋگە سەنىمحات جازىپ بەرۋىمدى سۇرادى. سەنىمحات بەردىك. ەرلان ەكەۋى الگى كولىكتى اۋىسىپ ءمىنىپ ءجۇردى. ەرلان كۇندىز، ناريمان تۇندە جۇرگىزەدى ەكەن.

2017 جىلدىڭ 6-تامىزى، تۇنگى ۋاقىتتا ناريمان، الماگۇل جانە قۋانىش ءۇشىنشى ادام بار، ەرلاننىڭ ۇيىنە كەلىپ، قارىزدىڭ اقىسىنا كولىكتى تارتىپ الماق بولادى.

الىپ كەتكەندە دە قوقان-لوقى جاساپ، «اتىپ كەتەمىز، ءولتىرىپ كەتەمىز» دەگەن سوزدەردى ايتىپ، ەشكىمگە ايتپاۋىن تالاپ ەتەدى.

ءسويتىپ، الماتىنىڭ گرەس دەگەن جەرىنەن مەنىڭ كولىگىمدى تىركەۋدەن شىعارادى. قۋانىش دەگەن جىگىت مەنىڭ قولىمدا جاساپ، جالعان قۇجات ازىرلەگەن. ونى نوتاريۋستان بەكىتىپ الادى. اقىرىندا 26-تامىز كۇنى تالعاردىڭ بەساعاش دەگەن جەرىنەن كولىكتى قايتا ەسەپكە تۇرعىزادى. ول كەزدە كولىكتى الماگۇلدىڭ اتىنا اۋدارىپ جىبەرەدى.

بىلتىر الماتى قالاسى، بوستاندىق اۋداندىق ءاىىب تەكسەرىپ بەرگەنى بويىنشا، كولىك تامىزدىڭ 6-كۇنى تارتىپ الىنعان. 26-تامىز كۇنى قايتا ەسەپكە تىركەلگەن.

وسى ەكى ارادا ەرلان الماگۇلگە حابارلاسىپ، ماسەلەنى ءوزارا شەشپەك بولعان. الايدا ولار سوزگە كەلمەي قويعان.

ءبىز 2017 جىلدىڭ 28-قىركۇيەگىندە الماتى قالاسى بوستاندىق اۋدانىنىڭ ءاىىب-نە ارىز تۇسىردىك. ارىزىمىزدى تىركەدى. بىزگە ارىزىمىز تىركەلگەنى تۋرالى تالون بەردى. ەرتەسى كۇنى ءبىزدى شاقىرىپ، سۇراق-جاۋاپ الىندى.

تەرگەۋ باستالدى. ناريماندى كىناسىز دەپ تانىدى. ويتكەنى، وعان سەنىمحاتتى ءوزىمىز بەرگەن ەدىك. ول بويىنشا ناريماننىڭ كولىكتى ايداپ اكەتكەنى زاڭ بۇزۋشىلىق ەمەس ەكەن. ناريماندى ۇيىنە جىبەردى. ال قۋانىش پەن الماگۇلدى تەرگەۋ يزولياتورىنا الىپ قالدى. تەرگەۋ جۇمىستارى بولدى. اراسىندا ءبىزدى دە شاقىرىپ تۇردى. كۇنى-ءتۇنى تەرگەۋ جاسالدى. تەرگەۋ 5 كۇنگە جالعاستى.

بارلىق جاعداي سول جەردە ايتىپ بەردىك. كەيىن ولار ادۆوكات جالدادى. كەپىلمەن شىعىپ كەتكەنىن بىلەمىن. مەنىڭ قولتاڭبامنىڭ نۇسقالارىن الدى.

بوستاندىق اۋداندىق ىشكى ىستەر بولىمىنەن ءبىر سۇراعانىمدا: «ءىستى سوتقا جىبەرگەلى جاتىرمىز» دەگەن. كەيىن ءبىر سۇراعانىمدا: «نوتاريۋستى تەكسەرىپ جاتىرمىز» دەدى. تاعى ءبىر سۇراعانىمدا: «بۇكىل قۇجاتاردى جينادىق، ەندى پروكۋراتۋراعا جىبەردىك» دەگەن. تەرگەۋشى  ەرسۇلتان دەگەن كىسى ەدى. سول بوستاندىق اۋداندىق ءىىب-دە تەرگەۋشى ەكەن.

باسىندا الماگۇلدەر وزدەرىنىڭ قىلمىسى اشكەرە بولاتىنىن ءبىلىپ، ەرلاندى دا وزدەرىمەن بىرگە اكەتپەك بولدى عوي. بىراق، ەرلان ءوزىن اقتاپ الدى، ول جەردە.

قازىر مىنە، سول ءىستى تەك سوتقا جىبەرۋ عانا قالدى عوي. بىراق، ءالى كۇنگە قيمىل جوق. الگىلەر ۇستالعاندا كولىكتى ءاىىب-نە اكەپ تاپسىرعان. كولىك 5 ايداي ءاىىب تەرريتورياسىندا تۇردى. قازىر ايىپتۇراعىنا جىبەرگەن ەكەن. مەن قازىر كولىكتىڭ ناقتى قاي ايىپتۇراعىندا تۇرعانىن دا بىلمەيمىن. ماعان ەشكىم ايتقان جوق.

بۇگىن بارىپ جولىققانىمدا ءاىىب ماعان: "ولارمەن وزدەرىڭ كەلىسىپ كورسەڭدەرشى" دەگەندى ايتتى. بۇل قالاي سوندا؟

مەندە ول ازاماتتاردىڭ ءوز كىنالارىن مويىنداعان بەينەجازباسىنا دەيىن بار. ماعان كەلىپ، ارىزىمدى قايتىپ الۋ ءۇشىن اقشا ۇسىندى. كولىكتى قايتارىپ بەرىپ، ۇستىنە تاعى اقشا قوسىپ بەرمەك تە بولدى.

ال ەندى مىنە، پوليتسياعا ارىز بەرگەنىمىزگە 10 ايدان اسىپ بارادى. نە ولاردىڭ ۇستىلەرىنەن قىلمىستىق ءىس قوزعالماعان. سوندا پوليتسيا قىلمىسكەرلەردى جاسىرىپ وتىر ما، جوق الدە جۇمىستارىنا ءجۇردىم-باردىم قاراي ما؟ پوليتسيا قيمىلسىز وتىر. ال قىلمىسكەرلەر بوستاندىقتا ءجۇر. بۇل ەلدە زاڭ بار ما؟ ءوز كىناسىن مويىنداعان ادامدار نەگە جاۋاپقا تارتىلمايدى؟

«استانادا كنب-دا ءبىزدىڭ جاقسى تانىسىمىز بار. سەنى ءبىر وقپەن-اق، جوق ەتەمىز» دەدى.

ەرلان بەكمىرزا، الماتى قالاسىنىڭ تۇرعىنى:

- مەنىڭ ەسىمىم ەرلان. 1987 جىلى قحر-دا تۋعانمىن. 2007 جىلى قازاقستانعا كوشىپ كەلدىك. 2008 جىلى قازاقستان ازاماتتىعىن الدىم. قازىر الماتى قالاسىندا تۇرامىن.

2017 جىلى قاليمولدانوۆ ناريمان دەگەن كىسىنى ءوزىمنىڭ كومەكشىم، ياعني شوپىرىم رەتىندە جۇمىسقا العان ەدىم. ءسويتىپ، كولىك جۇرگىزۋگە سەنىمحات بەرگەن ەدىك. ماشينا ەرجاننىڭ اتىندا تىركەلگەن. مەنىڭ ايتۋىم بويىنشا، ەرجان ناريمانعا سەنىمحات بەردى. ءسويتىپ، مولشەرمەن 20 كۇندەي ول مەنىڭ جۇرگىزۋشىم بولدى.

ارامىزداعى كەلىسپەۋشىلىكتەرگە بايلانىستى ءبىر كۇنى جاڭاعى ناريمان بار، ونىڭ ايەلى بار، سوسىن قوڭىرباەۆ  قۋانىش دەگەن جاركەنتتىڭ كىسىسى بار، مەنىڭ ۇيىمە كەلدى. ناريماننىڭ ايەلىنىڭ اتى – الماگۇل ۋسيەۆا دەگەن كەلىنشەك.

ولار مەنىڭ ۇيىمە تۇنگى 22:00 مولشەرىندە كەلىپ، ماعان قوقان-لوقى جاساپ، مەنىڭ رۇقساتىمسىز كولىكتى تارتىپ اكەتتى. بۇل وقيعا 2017 جىلدىڭ 6-تامىزى كۇنى بولدى.  سودان مەن بۇلارمەن كەلىسىم جاساۋعا تىرىستىم. مەنى تىڭداعان جوق.

مەنىڭ بىردەن پوليتسياعا ارىزدانباعانىمنىڭ دا سەبەبى بار. قورىقتىم. ويتكەنى بۇلار مەنى «ءولتىرىپ كەتەمىز» دەپ قورقىتتى. «استانادا كنب-دا ءبىزدىڭ جاقسى تانىسىمىز بار. سەنى ءبىر وقپەن-اق، جوق ەتەمىز» دەدى. بۇل سول كولىكتى تارتىپ اكەتەتىن ءتۇنى ايتىلدى.

ارادا قاربالاس جۇمىستار بولدى. ەرجاننىڭ دا قولى بوساعان جوق. ال قىركۇيەك ايىندا ەرجان الماتىعا كەلىپ، پوليتسياعا ارىز جازدىق.

سويتسەك، 2017 جىلدىڭ 26-تامىزى كۇنى كولىكتى باسقا بىرەۋدىڭ، جاڭاعى ناريماننىڭ ايەلى الماگۇلدىڭ اتىنا اۋدارىپ جىبەرىپتى. ول بىلاي بولعان.

سەنىمحات ناريمانعا بەرىلگەن. ال قوڭىنباەۆ قۋانىش دەگەن ەرجاننىڭ قولىن جاساپ، ءوزى قويعان.سودان كەيىن نوتاريۋس ارقىلى كولىكتى الماگۇلدىڭ اتىنا اۋدارعان. ال ول كەزدە ەرجان ارىتاۋدا بولعان. كەيىن الماگۇل ءوزىنىڭ كۇيەۋى ناريمانعا قايتادان سەنىمحات بەرىپ، كولىكتى ناريمان جۇرگىزىپ جۇرگەن. گرەس جاقتاعى گاي-عا اپارىپ تىركەتكەن.

پوليتسياعا 2017 جىلدىڭ 28-قىركۇيەكتە ارىز بەردىك. پوليتسيا  باستاپقىدا ءبىزدى قولداپ، ءىستى اياعىنا دەيىن جەتكىزۋىمىزگە كەڭەس بەرگەن. كەيىن بۇل ويلارىنان اينىپ قالسا كەرەك، ءىستىڭ اياعى سايابىرسىپ قالدى.  بۇل بويىنشا ەشكىم قامالعان دا جوق. كوپ بولسا 24 ساعات يزولياتوردا وتىرعان شىعار. وندا دا الماگۇل ۋساەۆا مەن قوڭىرباەۆ قۋانىش قانا ۇستالعان.

تەرگەۋ ۇزاق بولدى. ءبىز وزىمىزگە قاتىستى بارلىق جاۋاپتى بەردىك. سودان بەرى مىنە، 10 اي بولدى. نە قىلمىستىق ءىس قوزعالعان جوق. نە سوت بولعان جوق. قازىر الگى كۇدىكتىلەر قايدا ەكەنىن دە بىلمەيمىز.

ايتپاقشى، كولىكتىڭ ءوز اتىنا اۋدارعاننان كەيىن، الماگۇل ول كولىكتى الماتىداعى تولە بي كوشەسىنىڭ بويىندا ورنالاسقان «تاس لومبارد» دەگەن جەرگە كەپىلگە قويىپ، نەسيەگە 3 ميلليون العان ەكەن.

ءبىزدى ۋايىمداتىپ وتىرعان ماسەلە – پوليتسيا نەگە ءبىر شارا قولدانباي وتىر؟ كۇدىكتى دەگەن ادامدار قازىر بوستاندىقتا ءجۇر. كەشە بارعانىمىزدا: «ولاردى كورىپ تۇراسىڭدار ما؟» دەپ بىزدەن سۇراپ وتىر. نەگە قىلمىسكەرلەر جاۋاپقا تارتىلمايدى؟ پوليتسيا ولاردى نەگە جىبەرە سالدى؟ وسىنىڭ بارلىعى ءبىزدى نەبىر كۇدىكتى ويلارعا جەتەلەيدى. ءبىزدىڭ ءبىر عانا قالاۋىمىز بار. ول قىلمىسكەرلەر جاۋاپقا تارتىلسىن. كولىگىمىزدى قايتارىپ الساق بولدى.

بۇل جەردە بىرنەشە ماسەلە بار. كولىكتى ۇرلاۋ، تارتىپ الۋ، قوقان-لوقى كورسەتۋ، زاڭسىز قۇجات جاساۋ، ۇيىمداسقان قىلتىستىق توپ قۇرۋ ت.ب. پوليتسيا وسىنىڭ بارلىعىنا كوز جۇمىپ وتىرعانى قالاي؟

ءتۇيىن.

«Abai.kz» اقپاراتتىق پورتالى ەركىن اقپارات الاڭى. اتالعان ماقالادا اتى اتالعان ازاماتتاردىڭ دا ايتار ءۋاجى بولسا، ءبىز جاريالاۋعا ءازىرمىز.

ازىرگە جوعارىداعى ەرجان ايپان مەن ەرلان بەكمىرزانىڭ ارىزى نەگىزىندە جۇرگىزىلگەن تەرگەۋ جۇمىستارىنىڭ ناتيجەسىندە قىلمىستىق ءىس قوزعالماعانىن بىلدىك.

بۇعان جاۋاپتى الماتى قالاسى، بوستاندىق اۋداندىق ىشكى ىستەر باسقارماسىنىڭ باسشىسى مەن ونىڭ قاراماعىنداعى قىزمەتكەرلەردىڭ اتالعان ماسەلەگە قاتىستى جاۋاپتارىن جاريالايتىن بولامىز. «Abai.kz» اقپاراتتىق پورتالى بۇل ءىستى باقىلاۋدا ۇستايتىن بولادى.

نۇرگەلدى ابدىعانيۇلى

Abai.kz

9 پىكىر